Diospa prometesqan wawa

Jesuspa nacesqan qhepamanqa Belén llaqtapin Josewan Mariawanqa qhepakuranku. Chaypin Diospa kamachisqanman jina Jesuspa qhari kaynin qarachata kuchuranku pusaq p’unchayninpi kashaqtin (Levítico 12:2, 3). Chay p’unchayllapitaqmi “Jesús” nispa suticharanku ángel Gabrielpa nisqanman jina. Chay tiempopi runakunaqa pusaq p’unchayninpin qhari wawachakunaman sutita churaqku.

Diospa kamachikuyninman jinaqa, qhari wawata onqokuq warmikunaqa 40 p’unchaymantan templota rinanku karan ch’uyanchakuna ofrendata apaspa. Chaymi Josewan Mariawanqa Jerusalenta riranku 40 p’unchayninpi Jesús kashaqtin. Jerusalenqa cercallan kasharan Belén llaqtamantaqa (Levítico 12:4-8).

Onqokuq warmikunaqa juj borregota juj urpitawanmi apananku karan ch’uyanchakunankupaq. Wajcha kaqkunan ichaqa iskay urpita otaq iskay palomata apananku karan. Mariaqa iskay urpillatan aparan, chaymi rikuchin pisi qolqellayoq kasqanta.

Templopin kasharan juj runa Simeón sutiyoq, payqa santo espirituq kallpachasqanmi chay p’unchay temploman jamusqa. Paymanmi Dios prometesqa manaraq wañupushaspa Cristota rikunanpaq. Chaymi Simeonqa Joseman Mariamanwan achhuykuspa Jesusta marq’arikuran.

Jinaspa niran: “Kunanqa, ancha jatun Señorníy, nisqaykiman jina kusisqa wañukapusaq, ñan ñawiyqa rikunña kachamusqayki salvaqta, paytan churanki llapa runakuna rikunanpaq, payqa waj nacionmanta runakunaq tutayasqa ñawinta qhawarichiq k’anchaymi, Israel llaqtaykipaqpas llifllikishaq k’anchaymi”, nispa (Lucas 2:29-32).

Chayta uyarispan Josewan Mariawanqa anchata admirakuranku. Chaymantataq Simeonqa paykunata bendeciran, jinaspa Mariata niran: “Kay wawaraykun Israel llaqtapi wakinkuna urmanqaku, wakintaq sayarinqaku”, nispa (Lucas 2:34). Chaymantan willallarantaq juj espada jina sonqonta nanay k’irinanmanta.

Chaypin kashallarantaq Ana sutiyoq profetizapas, payqa 84 watanpiñan kasharan, payqa mana faltaytan templota riq. Paypas Joseman Mariamanwan achhuykuspan Diosman graciasta qoran, jinaspa llapa chaypi kaqkunaman Jesusmanta willayta qallariran.

Tukuy chaykunan allinta rikuchiran Jesusqa Diospa kachamusqanpuni kasqanta. ¡Maytachá Josepas Mariapas chaywanqa kusikuranku!