Juan Jesusmanta astawan yachayta munan

Bautizaq Juanqa wata jinaña carcelpi kasharan chaypas, uyarisharanmi Jesuspa milagrokuna ruwasqanmantaqa. Maytachá payqa admirakuran Naín llaqtapi viudaq wawanta kausarichisqanmanta willaqtinku. Chaywanpas Juanqa kikin Jesuspuni pichus pay kasqanmanta willanantan munasharan. Chaymi iskay discipulonkunata Jesusman kacharan: “¿Qanchu kanki jamunan karan chay, icha jujtachu suyakusaqku?”, nispa tapumunankupaq (Lucas 7:19).

¿Jesusmanta iskayaspachu Juan chhaynata tapuchisharan? Manan. Payqa Dios sonqo runan karan, chaymantapas Jesusta bautizashaspan payqa rikuran Diospa espiritun Jesusman uraykamushaqta, chaypin Diospa kunkantapas uyariran. Juan iñiyninpi pisiyapushanman karan chayqa, manachá Jesuspas allintachu paymanta rimanman karan. Chhaynaqa, ¿imanaqtintaq chhaynatari tapuchiran?

Juanqa kikin Jesuspuni “arí, noqan Mesiasqa kani” ninantan munashanman karan, chhaynapi carcelpi kashanankama aguantananpaq. Chaymantapas Juanqa yacharantaq Diospa ajllasqan Mesiasqa juj rey, juj salvaq ima kananta chayqa, payqa tapukusharanchá imaraykus chhaytukuy killakuna carcel-llapiraq kasharan chayta. Yaqapaschá piensasharan Jesuspa qhepanta jujraq jamunanpaq, chhaynapi Mesiaspa ruwananta tukupananpaq. Chayraykun payqa “¿icha jujtachu suyakusaqku?” nispa tapuchinman karan.

¿Imatan Jesús ruwaran Juanpa discipulonkuna chayta tapuqtinku? Chay raton payqa askha onqosqakunata qhaliyachiran, jinaspa Juanpa discipulonkunata niran: “Juanman kutispa willamuychis imachus uyarisqaykichista rikusqaykichistawan: Ñausakunan qhawarinku, such’ukunan puririnku, lepra onqoyniyoqkunan qhaliyachisqa kanku, roqt’ukunan uyarinku, wañusqakunan kausarichisqa kanku, wajchakunamantaq allin willakuykunata willakushan”, nispa (Mateo 11:4, 5).

Juanqa munasharanchá carcelmanta Jesús orqopunanta, Jesusmi ichaqa chhaynata kutichispa Juanta entiendechisharan chay uyarisqan milagrokunallata ruwanan kasqanta.

Juanpa discipulonkuna kutipuqtinkun Jesusqa runakunaman willaran Juanqa Jehová Diospa kachamusqan ‘willaq’ kasqanta, jamunan karan chay Elías ima kasqantawan (Malaquías 3:1; 4:5, 6). Jinaspa niran: “Cheqaqtan niykichis: Warmimanta naceqkunamantaqa manan pipas bautizaq Juanmanta aswan kuraqqa kanchu, chaywanpas janaq pacha gobiernopiqa aswan juch’uy kaqmi Juanmanta aswan kuraqqa”, nispa (Mateo 11:11).

Chayta nispan Jesusqa rikuchisharan Juanqa mana janaq pachaman rinanchu kasqanta. Juanqa askha runataña yanaparan Jesusta chaskinankupaq chaypas, manaraq Jesús cieloman jaykuna ñanta kichashaqtinmi payqa wañupuran (Hebreos 10:19, 20). Chaywanpas Juanqa Dios sonqo profeta kasqanraykun kay pachapi tiyanqa Diospa gobiernon kamachikamuqtin.