Jesús qhaliyachin supaypa junt’aykusqan waynata

Pedrowan, Santiagowan, Juanwan ima orqomanta uraykamuspan Jesusqa askha runakunata rikuran. Chaypin kamachikuy simita wakin yachachiqkuna Jesuspa discipulonkunawan discutishasqaku. Runakunataq Jesusta rikuspa payta napaykuq phawarimuranku, jinan payqa tapuran: “¿Imamantan paykunawan discutishankichis?”, nispa (Marcos 9:16).

Jinan juj runa payman k’umuykuspa niran: “Yachachikuq, wawaymanmi junt’aykun upayachiq espíritu, [...] maypiña jap’ispapas pampamanmi wijch’un, jinan wawayqa phosoqota aqtumun kirunkunatapas k’achachachin, manataq kallpanpas kanchu. Discipuloykikunatan nini chay espirituta qarqonankupaq, ichaqa manan atinkuchu”, nispa (Marcos 9:17, 18).

Chay yachachiqkunaqa yaqapaschá Jesuspa discipulonkunamanta burlakusharanku chay runaq wawanta mana qhaliyachiyta atisqankumanta. Chaychá Jesusqa runakunaman kutirispa niran: “Yau mana iñiyniyoq juchasapa runakuna, ¿jayk’aqkaman qankunawan kasaq? ¿Jayk’aqkaman aguantasaykichis?”, nispa. Jinaspa chay runata niran: “Kayman pusamuy wawaykita”, nispa (Lucas 9:41).

Jinan waynacha payman achhuykushaqtin chay espirituqa ataquewan jap’ichispa pampaman wijch’uran, chaymi waynachaqa phosoqota aqtuspa qhospakacharan. Jinan Jesusqa chay runata tapuran: “¿Jayk’aqmantapachan khayna kashan?”, nispa. Paytaq niran: “Juch’uychanmantapachan. Sapa kutillanmi chay espirituqa wañuchiyta munaspa ninamanñataq unumanñataq wijch’uykun. Imallatapas ruwayta atinki chayqa, khuyapayaspa yanapaykuwayku”, nispa (Marcos 9:21, 22).

Chay runaqa sinchi llakisqan kasharan Jesuspa discipulonkuna wawanta mana yanapayta atisqankumanta. Chaymi Jesusqa kallpachananpaq niran: “¿Imanaqtinmi ninki: ‘Atinki chayqa’, nispa? Iñiqpaqqa tukuy imapas atikunmi”, nispa. Jinan chay runaqa kaq rato fuerteta niran: “¡Iñinin! ¡Yanapaykuway astawan iñinaypaq!”, nispa (Marcos 9:23, 24).

Jinan Jesusqa askha runakuna phawaylla jamushasqanta rikuspa chay millay espirituta niran: ‘Yau upayachiq roqt’uyachiq espíritu, lloqsiy paymanta, amañataq jayk’aqpas paymanqa jaykunkichu’, nispa. Jinan chay espirituqa qaparkachaspa ataquewan jap’ichispa ima chay waynachamanta lloqsiran, waynachataq wañusqa jina karan, chaymi yaqa llapa runakuna: “¡Wañurapunmi!”, niranku (Marcos 9:25, 26). Jesustaq makinmanta jap’ispa aysariran, jinan waynachaqa jatariran, chhaynapitaq “qhaliyapuran” (Mateo 17:18). Chayta rikuspan runakunaqa anchatapuni admirakuranku.

Jesús discipulonkunata predicaqta kachaqtinqa atirankun paykunaqa supaykuna qarqoyta. Chaymi Jesusta tapuranku: “¿Imanaqtintaq noqaykuri mana qarqoyta atiraykuchu?”, nispa. Jinan Jesusqa niran: ‘Pisi iñiyniyoq kasqaykichisraykun. Chaymantapas chhayna espiritukunataqa Diosmanta mañakuspallan qarqokun’, nispa (Marcos 9:28, 29). Chay espirituta qarqonapaqqa allin iñiyta, Diosmanta mañakuytawanmi necesitakuran.

Chaymi Jesusqa niran: “Iñiyniykichischus mostaza muju sayayllapas kanman chayqa, kay orqotan niwaqchis: ‘Kaymanta jaqayman suchuriy’, nispa, jinan suchurinman, manataq imapas qankunapaqqa mana atikuqqa kanmanchu”, nispa (Mateo 17:20).

Jehová Diosta servinapaq wakin sasachakuykunaqa jatun orqokuna jinan kanman. Chaywanpas, allin iñiyniyoq kasunchis chayqa, atisunmi chaykuna venceyta.