“Noqan kani kausarimpuypas kausaypas”

Perea ladomanta jamuspan Jesusqa Judeapi Betania llaqtacha cercaman chayaran, chay llaqtachaqa kinsa kilometropi jinan Jerusalenmanta kasharan. Chaypin Mariawan Martawanqa Lázaro turankumanta waqasharanku, askha runataqmi paykuna kallpachaq jamusqaku.

Chayllamanmi Martaman willaranku Jesús chayamushasqanmanta, chaymi payqa phawaylla riran, payman aypaspataq niran: “Señor, kaypi kawaq karan chayqa, manachá turayqa wañunmanchu karan. Chaywanpas yachanin, Diosmanta tukuy imatapas mañakuqtiykiqa qonasuykita”, nispa (Juan 11:21, 22). Tawa p’unchayña Lázaro wañupuran chaypas, Jesusqa atinmanraqmi karan yanapayta, chaymi Martaqa chayta niran.

Jinan Jesusqa niran: “Turaykiqa jatarimpunqan”, nispa. Chaymi Martaqa niran: “Noqaqa yachanin tukukuy p’unchaypi kausarimpuy kaqtin jatarimpunanta”, nispa (Juan 11:23, 24). Martaqa iñiranmi qhepa tiempoman kausarimpuy kananpi. Chaypin Abrahanpas, Diosta serviq juj runakunapas iñiranku.

Jesusqa Diospa atiyninwanqa atinmanmi karan chay rato Lazarota kausarichiyta, chaymi Martata niran: “Noqan kani kausarimpuypas kausaypas. Pipas noqapi iñiqqa, wañunmanña chaypas, kausarimpunqan. Pipas kausaqqa jinaspa noqapi iñiqqa manan jayk’aqpas wañunqachu”, nispa (Juan 11:25, 26).

Chhaynaqa, ¿manachu jayk’aqpas discipulonkuna wañupunanku karan? Manan chaytachu Jesusqa nisharan, hasta paypas wañupuranmá (Mateo 16:21; 17:22, 23). Ichaqa paypi iñiqkunaqa wiñay kausay suyakuyniyoqmi kananku karan. Wakinqa kausarimpuy kaqtinñan chay wiñay kausaymanqa chayanqaku, mosoq pachaman kausashaqlla pasaqkunan ichaqa mana jayk’aqpas wañuytaqa rikunqakuchu.

¿Ima niranmi Marta ‘noqan kani kausarimpuyqa, ¿creenkichu chayta?’ nispa Jesús tapuqtin? “Arí, Señor. Noqaqa creenin, qanqa Diospa Churin Criston kanki, kay pachaman jamunan karan chaypunin kanki”, nispan payqa niran. Jinaspataq phawaylla rispa Mariata nimuran: “Yachachikuqmi chayaramusqa, wajashasunkin”, nispa (Juan 11:25-28). Jinan Mariaqa wasimanta lloqsimuran, askha runakunataq qatikamuranku ‘sepulturatachá rishan’ nispa.

Jesuspa kasqanman chayaspan Mariaqa waqaspa ñaupanman k’umuykuran, jinaspa niran: “Señor, kaypi kawaq karan chayqa, manachá turayqa wañunmanchu karan”, nispa. Jinan Jesusqa Mariaq waqasqanta rikuspa, runakunaq waqasqanta rikuspa ima paypas waqaran. Chayta rikuspan runakunaqa repararanku anchatapuni Lazarota munakusqanta. Wakinmi ichaqa niranku: “Kay runaqa ñausaq ñawintapas kichariranmá riki, ¿manachu imallatapas ruwanman karan chay runa mana wañunanpaq?”, nispa (Juan 11:32, 37).