¿Pakanaychu mana allinkuna ruwasqayta?

¿IMATAN RUWAWAQ?

Juan sutiyoq waynachas amigochankunawan pujllasharan, chayllamansi Juanqa bolata jayt’aspa vecinonpa ventananta chhallurun.

¿Imatan ruwawaq Juan kaspa?

¡ÑAUPAQTA PIENSAYKUY!

KAYKUNAMANTA JUJTA AJLLAKUY:

1. ¿Phawayllachu ripuwaq?

2. ¿Jujmanchu tumpawaq?

3. ¿Sut’illantachu willakuwaq jinaspa pagapunaykipaqpas prometekuwaq?

Chhaynapi tarikuspaqa ch’inlla pasakapuytapaschá munawaq. Ichaqa yachanaykin ima juchaykitapas reqsikuyta.

¿IMARAYKUN JUCHAYKITA REQSIKUNAYKI?

1. Chay ruway allin kasqanraykun.

   Biblian nin: ‘Tukuy imapin honrado kayta munayku’, nispa (Hebreos 13:18).

2. Juchaykita reqsikuqtiykiqa facil-llatan perdonasunkiku.

   Biblian nin: “Juchankunata pakaykuqqa manan allinyanqachu, juchankunata willakuspa saqepuqmi ichaqa khuyapayasqa kanqa”, nispa (Proverbios 28:13).

3. Chay ruwayqa Diospa sonqonpaq jinan.

   Biblian nin: “Señor Diosqa waqllisqa runakunatan millakun, chanin runakunawantaq sonqota tupachin”, nispa (Proverbios 3:32).

Karina sutiyoq sipasmi papeleta churachikusqanta mana papanman willaranchu. Juj watamantan papanqa chay papeletata rikuran. Chhaynapin Karinaq ruwasqanqa sinchi mana allinmanraq tukupuran.

Chay pasasqanmantan Karina nin: “Juchanchista pakayqa mana allinpipunin tukun. Tiempowanqa tukuy imapas yachakullanmi”, nispa.

YACHANAYKIN ALLIN KAQ RUWAYTA

Biblian nin: “Llapanchispas pantanchispunin imallapipas ¿riki?”, nispa (Santiago 3:2). Chhaynaqa yachanaykin juchayki reqsikuyta, chhaynapin yachanki k’umuykukuq kayta, responsable kaytawan.

Chaymantapas allintan piensanayki imaynatas jujpi allinta imatapas ruwawaq chayta. Chaymantan Vera sutiyoq sipascha nin: “Imatapas mana allinta ruwani chayqa, allintan chay ruwasqaypi piensani, chhaynapi jujpi amaña chayman urmanaypaq”, nispa. Qanpas chaytan ruwawaq.

Papaykiq bicicletanta q’aqñuruwaq chayri, ¿imatan ruwawaq?

• ¿Ch’inllachu kawaq, “manan cuentata qokunqachu” nispa?

• ¿Sut’illantachu willakuwaq imachus pasasqanta?

• ¿Jujmanchu tumpawaq chay pasasqanmanta?

Mana estudiasqaykirayku examenta mana salvawaqchu chayri, ¿imatan ruwawaq?

• ¿“Nishu sasan karan” niwaqchu?

• ¿“Noqan chaypaq juchayoq kani” niwaqchu?

• ¿“Profesorniymi cheqnikuwan” niwaqchu?

Kunanqa juj ratolla allinta piensaykuy papaykipi profesorniykipi ima. ¿Imatan paykuna qanmanta piensankuman mana negakuspalla juchaykita reqsikuqtiyki? Ichaqa, ¿imatan piensankuman juchaykita pakaqtiyki?

Chaymantapas piensaykuy qayna wata ima mana allintapas ruwasqaykipi, jinaspa kay uraypi tapuykunata kutichiy.

¿Iman juchayki karan? ¿Imatan chaymanta ruwaranki?

• ¿Pakarankichu chayta?

• ¿Jujmanchu chaymanta tumparanki?

• ¿Reqsikurankichu chay juchaykita?

Chay juchaykita mana reqsikurankichu chayri, ¿imaynan sientekuranki?

• ¿Kusisqachu chaywan karanki?

• Icha, ¿concienciaykichu juchacharasunki?

Juchaykita pakanaykimantaqa, ¿imatan aswan ruwawaq karan?

¿Imatan yacharanki chay pasasqaykimanta?

¿IMA NIWAQTAQ?

¿Imanaqtinmi wakin runakuna mana juchankuta reqsikuyta munankuchu?

Juchaykita mana jayk’aqpas reqsikuqtiyki, ¿imatan jujkuna qanmanta piensankuman? Juchaykita reqsikuqtiykiri, ¿imatan qanmanta piensankuman? (Lucas 16:10.)