Sach’aq raurasqan

Moisesqa 40 watan Madianpi tiyarqan. Chaypin casarakurqan wawakunayoqpas karqan. Juj p’unchaymi Sinaí orqoq qayllanpi ovejankunata michisharqan, jinan rikurqan raurashaq sach’ata, ichaqa manan rupharqanchu. Chaymi Moisesqa allinta rikunanpaq chimpaykurqan. Chaypin juj kunka nimurqan: “¡Moisés! Ama jamuychu, usut’aykita ch’utikuy, kay lugarqa santon”, nispa. Jehová Diosmi juj angelwan Moisesta rimapayasharqan.

Moisesqa manchakuymantan uyanta tapakurqan. Jinan angelqa nillarqantaq: “Rikunin Israel llaqtay sufrisqanta. Egipto llaqtamanta libraspan juj sumaq jallp’aman apapusaq. Qanmi llaqtayta Egiptomanta orqonki”, nispa. Moisesqa admirakurqanchá chayta uyarispa.

Jinan Moisesqa tapurqan: “¿Pitaq kachamusunki? nispa niwaqtinkuri, ¿imanispataq nisaq?”, nispa. Diostaq nirqan: “Abrahanpa, Isaacpa, Jacobpa Diosninmi kachamuwan”, nispa. Moisestaq nirqan: “¿Imatan ruwasaq mana kasuwaqtinku?”, nispa. Jinan Jehová Diosqa juj milagrota ruwarqan yanapayninta rikuchinanpaq. Nirqanmi: “Taunaykita pampaman wijch’uy”, nispa. ¡Taunanmi mach’aqwayman tukurqan! Chupanmanta Moisés jap’iqtintaq taunaman tukurqan. Jinaspan Jehová Diosqa nirqan: “Kay milagrota rikuspan paykunaqa yachanqaku Jehová Dios kachamusqasuykita”, nispa.

Moisesmi nillarqantaq: “Manan allin rimaqchu kani”, nispa. Chaymi Diosqa prometerqan: “Noqan yachachisqayki imachus rimanaykita, jinaspapas hermanoyki Aarontan kachamusaq yanapanasuykipaq”, nispa. Jinan Moisesqa Jehová Diospa yanapananta yachaspa Egiptoman kutirqan esposanta wawankunatawan aparikuspa.