Gedeón Madián llaqtata atipan

Tiempowanmi Israel runakunaqa wajmanta Jehová Dios serviyta saqepuspa pantasqa dioskunata adorarqanku. Chaymi qanchis wata Madián runakunaqa animalninkuta suwarqanku chajrankutapas q’ararqanku. Jinan Israel runakunaqa orqo t’oqokunapi pakakuqku. Chaymi Israel llaqtaqa Jehová Diosta valekurqanku salvananpaq. Jinan Jehová Diosqa juj angelta Gedeonman kacharqan “Jehová Diosmi qanta ajllasunki” nispa nimunanpaq. Gedeontaq nirqan: “Noqaqa manan allin reqsisqa runachu kani, ¿imaynatan Israel llaqtata salvayman?”, nispa.

Gedeonqa asegurakuytan munarqan Jehová Diospa yanapasqanta. ¿Imatan chaypaq ruwarqan? Willmatan jawa pampapi saqespa Diosta nirqan: “Sichus paqarin tutamantanta pacha sulla kay willmata ch’aranchanqa pampataq ch’aki kashanqa chayqa, chaypin yachasaq ajllawasqaykita”, nispa. Qhepantin p’unchaytaq willmaqa ch’aran kasharqan pampataq ch’aki. Jinan Gedeonqa Jehová Diosta nillarqantaq: “Paqarinqa willmañataq ch’aki kashachun, pampataq ch’aran kachun”, nispa. Gedeonpa mañakusqanman jinataq pasarqan. Chaywanmi Gedeonqa yacharqan Diospa ajllasqan kasqanta. Jinan soldadonkunata juñuspa Madián llaqtawan maqanakuq rirqan.

Jehová Diosmi Gedeonta nirqan: “Israel llaqtatan yanapasaq maqanakuypi atipananpaq. Ichaqa askhan soldadoykikuna kashan noqallaykun atiparqayku nispapaschá ninkuman. Kamachiy manchalikunata wasinkuman kutipunankupaq”, nispa. Jinan 22.000 runakuna ripurqanku. 10.000 runakunallañan qhepakurqanku. Jinan Diosqa nirqan: “Askharaqmi kashanku. Mayuman apay unuta ujanankupaq, jinaspa qhepachinki pikunachus qhawan-qhawan unuta ujashanku chaykunallata”, nispa. 300 runakunallan chayta ruwarqanku. Diosmi nirqan: “Chay runakunallawanmi 135.000 soldadokunata atipankichis”, nispa.

Chay tutan Diosqa Gedeonta nirqan: “Kunanmi Madián runakunawan maqanakuq rinayki”, nispa. Gedeonmi soldadonkunaman qorqan oveja waqrata, ch’usaq p’uyñu ukhupi raurashaq antorchatawan, nirqantaq: “Noqaq ruwasqayta jina ruwankichis”, nispa. Gedeonmi oveja waqrata tocaspa p’uyñuta chhallurqan, antorchata maymispataq qaparirqan: “¡Jehová Diospa, Gedeonpa espadan!”, nispa. 300 runakunapas kaqtan ruwarqanku. Jinan Madián runakunaqa mancharikuspanku tukuy ladoman loco jina phawarirqanku. Jinaspa paykunapura wañuchinakurqanku. Wajmantan Diosqa llaqtanta salvarqan.