Jehová Dios Sansonman kallpata qon

Israel runakunaqa wajmantan idolokunata adorarqanku, chaymi Jehová Diosqa permitirqan Filistea runakuna kamachinanta. Wakinmi ichaqa Diosta munakurqanku. Jujninmi karqan Manóa esposanpiwan. Paykunaqa mana wawayoqmi karqanku. Juj p’unchaymi Diosqa juj angelta kacharqan Manoaq esposanta ninanpaq: “Qhari wawatan onqokunki, paymi Israel llaqtata salvanqa Filistea runakunamanta. Nazareo runataq kanqa”, nispa. ¿Pikunan karqanku nazareo runakuna? Paykunaqa jujniraytan Diosta serviqku, manataqmi chujchankuta rutuchikuqkuchu.

Tiempowanmi Manoaq wawan nacerqan, sutinmi karqan Sansón. Wiñaqtinmi Jehová Diosqa kallpata qorqan. ¡Makinkunallawanmi juj leonta wañuchirqan! Juj kutinmi 30 Filistea runakunata wañuchirqan. Chaymi chay runakunaqa payta cheqnikurqanku, wañuchiytataq munarqanku. Sansón Gaza llaqtapi kashaqtinmi enemigonkunaqa punkupi suyasharqanku tutamantanta wañuchinankupaq. Sansonmi ichaqa kuska tutata jatarispa llaqtaman jaykuna jatunkaray punkuta orqorqan, jinaspa Hebrón orqoq chimpanman aparqan.

Chay qhepamanmi Filistea runakunaqa Sansonpa novian Dalilata nirqanku: “Sichus yacharunki imaynapi Sansón kallpayoq kasqanta chayqa, askha qolqetan pagasaykiku, carcelmanmi wisq’ayta munayku”, nispa. Dalilaqa qolqetan munarqan, jinan aceptarqan paykunaq nisqanta. Qallariypin Sansonqa mana willayta munarqanchu imaynapi kallpayoq kasqanta. Dalilan ichaqa umanta wasaparqan tapupayaspa, jinan willarqan: “Manan jayk’aqpas chujchayta rutuwarqankuchu nazareo kasqayrayku. Chujchayta rutuwaqtinkuqa manan kallpay kanmanchu”, nispa. Dalilaman willasqanqa manan allinchu karqan ¿riki?

Chay qhepallamanmi Dalilaqa Filistea runakunata nirqan: “¡Yachaniñan imaynapi kallpayoq kasqanta!”, nispa. Chaymi Dalilaqa Sansonta moqon patapi puñurachispa chujchanta ruturachirqan. Jinan Dalilaqa kallpawan nirqan: “¡Sansón, Filistea runakunan kaypi kashanku!”, nispa. Sansontaq rijch’arirqan, ichaqa manañan kallpan karqanchu. Chaymi Filistea runakunaqa ñawinkunata orqospa carcelman wisq’arqanku.

Juj p’unchaymi waranqanpi Filistea runakunaqa Dagón diosninkuq templonpi juñukuspa qaparirqanku: “Diosninchismi Sansonta entregawanchis. Sansonta orqomuychis juj ratu asichiwananchispaq”, nispa. Jinan iskay columnakunaq chaupinpi sayachispa burlakurqanku. Sansontaq kallpawan nirqan: “¡Jehová Diosníy, kallpata qoway!”, nispa. Chujchanqa wajmantan wiñarusqa, chaymi iskaynin columnakunata tukuy kallpanwan tanqarparirqan. Jinan chay temploqa urmaykamuspa llapa chaypi kaqkunata wañuchirqan, Sansonpas chaypin wañurqan.