42 WILLAKUY
Mana manchakuq junt’aq sonqo runa
Saulpa kuraq wawanmi Jonatán karqan, payqa mana manchakuq soldadon karqan. Davidmi nirqan: “Jonatanqa ankamantapas aswan usqhaytan phawan, leonmantapas aswan kallpayoqmi”, nispa. Juj p’unchaymi Jonatanqa Filistea soldadokunata orqo patapi rikurqan. Jinan escudo apaqninta nirqan: “Jehová Dios juj señalta qowasun chayqa, Filistea runakunawan maqanakusun”, nispa. Jinan chay soldadokunaqa nirqanku: “¡Jamuychis maqanakunanchispaq!”, nispa. Chaymi Jonatanqa escudo apaqninwan 20 soldadokunata wañuchirqanku.
Jonatanqa Saulpa kuraq wawantaq karqan chayqa paymi papan wañupuqtinqa rey kanan karqan. Jonatanmi ichaqa yacharqan Jehová Dios Israelpi rey kananpaq Davidta ajllasqanta, chaywanpas manan envidiakurqanchu. Aswanmi Jonatanqa Davidwan amigontin kapurqanku. Prometerqankutaq yanapanakunankupaq. Jinaspapas Davidpa amigon kasqanta rikuchinanpaqmi p’achanta, espadanta, arconta, cinturonnintawan Davidman qorqan.
Saulmanta David ayqeshaqtinpas Jonatanqa payta maskhaq rispan nirqan: “Kallpachakuy, ama manchakuychu. Jehová Diosmi ajllarqasunki rey kanaykipaq. Papaypas chaytaqa yachanmi”, nispa. ¿Munawaqchu chhayna amigoyoq kayta?
Jonatanqa askha kutipin vidanta peligropi churarqan amigonta yanapananpaq. Yacharqanmi papan Saúl Davidta wañuchiy munasqanta, jinan nirqan: “Davidta wañuchispaqa juchallikunkin. Manan ima mana allintapas ruwanchu”, nispa. Chaymi Saulqa Jonatanpaq phiñakurqan. Qhepamanmi Saulpas Jonatanpas guerrapi wañupurqanku.
Jonatanpa wañupusqan qhepamanmi Davidqa Mefiboset-ta maskharqan, payqa Jonatanpa wawanmi karqan. Tarispataq nirqan: “Papaykin amigoy karqan chaymi wañupunaykikama cuidasayki, palacioypin tiyanki, mesaypitaqmi mijunkipas”, nispa. Davidqa manan jayk’aqpas amigonta qonqarqanchu.
“Kaymi kamachikuyniyqa: Jujkuna-jujkunawanmi munanakunkichis, imaynan noqapas qankunata munakuykichis jinata. Amigonkunarayku vidanta qoqmi aswan munakuqqa” (Juan 15:12, 13).