Jehová Diosmi Eliasta kallpachan

Jezabelmi yacharusqa Baalpa profetankunawan imachus pasasqanta, jinan sinchita phiñakurqan. Jinaspa Eliasman willaqta kacharqan: “Paqarinmi Baalpa profetankuna jina wañunki”, nispa. Eliastaq manchakuymanta ch’inneq ladoman ayqekurqan, chaypin nirqan: “Jehová Diosníy, manañan aguantanichu, wañuytan munani”, nispa. Eliasqa sinchi sayk’usqan kasharqan, chaymi sach’aq ladonpi puñurapurqan.

Ichaqa juj angelmi Eliasta rijch’achispa sumaqllata nirqan: “Sayariy, mijuy”, nispa. Jinan Eliasqa rikurqan q’oñishaq rumipi t’antata jarra unutawan. Mijuspa ujaspan wajmanta puñupurqan. Angeltaq wajmanta rijch’achispa nirqan: “Mijuy, viajanaykipaqmi kallpachakunayki”, nispa. Eliastaq mijuruspa 40 p’unchayta 40 tutatawan purirqan Horeb orqoman chayanankama. Jinaspa juj t’oqoman jaykurqan puñunanpaq. Jinan Diosqa nirqan: “Elías, ¿imatan kaypi ruwashanki?”, nispa. Eliastaq nirqan: “Llaqtaykin prometekusqankuta mana junt’ankuchu, altarniykikunatan thuninku profetaykikunatapas wañuchinkun. Noqatapas wañuchiytan munawanku”, nispa.

Jehová Diostaq Eliasta nirqan: “T’oqomanta lloqsimuy”, nispa. Jinan rikurqan sinchi kallpawan wayramusqanta, jallp’aq chhafchikusqanta, ninatawan. Chaymantataq uyarirqan llamp’u simiwan Diospa rimamusqanta. Chaymi Eliasqa p’achanwan uyanta tapakuspa jawapi sayarqan. Diosmi tapurqan imarayku ayqekusqanta. Eliastaq nirqan: “Noqallañan profetayki qhepashani”, nispa. Diosmi ichaqa nirqan: “Manan sapallaykichu kashanki, kashanmi noqata adoraq 7000 Israel runakuna. Eliseota ajllay rantiykipi profeta kananpaq”, nispa. Kaqpachan Eliasqa Diospa nisqanta ruwarqan. Qantapas, ¿yanapasunkimanchu Jehová Dios kasukuqtiyki? Arí, yanapasunkin. Kunanqa yachasun ch’akiriy tiempopi imachus pasasqanta.