Jehová Dios Jonaswan pacienciakun

Asiria nacionpin Nínive llaqta tarikurqan, chaypi kaq runakunaqa nishu millaymi karqanku. Chaymi Diosqa Jonasta nirqan: “Nínive llaqtata riy, jinaspa runakunata nimunki mana allin ruwasqankuta saqepunankupaq”, nispa. Jonasmi ichaqa mana kasukurqanchu, aswanmi barcoman seqaspa Tarsis ladoman ripurqan.

Barcopi viajashaqtinmi lamar-qocha sinchita aytikachakurqan, jinan barcopi viajaqkunaqa diosninkuta wajakurqanku, tapunakurqankutaq imarayku chhaynapi tarikusqankuta. Chaymi Jonasqa willakurqan: “Jehová Diosta mana kasukusqaymantan kayqa pasashan, unuman wijch’uykuwaychis”, nispa. Runakunan ichaqa mana munarqankuchu. Jonasqa wajmantan nirqan, jinan unuman wijch’uykuqtinku lamar-qochaqa manaña aytikurqanchu.

Jonasqa unu ukhuman chinkaykushaspan Diosmanta mañakurqan, chaymi Diosqa mañakusqanta uyarispa jatunkaray challwata kamachirqan Jonasta millp’unanpaq. Jonasmi ichaqa challwaq wijsanpi kausashallarqan, jinan Diosta nirqan: “Llapa kamachiwasqaykitan kasukusaqpuni”, nispa. Kinsa p’unchaymantan challwaqa Jonasta ch’aki pampaman aqturparirqan.

Jonastaqa Jehová Diosmi salvarqan. Ichaqa, ¿manañachu Nínive llaqtata rinan karqan? Diosmi wajmanta kamachirqan Nínive llaqtata rinanpaq. Chaymi Jonasqa rispa nirqan: “40 p’unchaymantan Diosqa kay llaqtata thuninqa”, nispa. Chayta uyarispan runakunaqa vidankuta cambiarqanku. Nínive llaqtamanta reymi runakunata nirqan: “Juchaykichismanta pesapakuspa Diosmanta perdonta mañakuychis”, nispa. Diosqa rikurqanmi pesapakusqankuta, chaymi mana castigarqanchu.

Jonasqa sinchitan phiñakurqan Jehová Dios Nínive runakunata mana wañuchisqanmanta. Diosqa khuyapayarqanmi Jonasta, Jonasmi ichaqa Nínive runakunata mana khuyapayarqanchu. Jinan llaqtamanta lloqsispa calabazaq llanthusqan phiña uyantin tiyarqan. Ichaqa calabazan ch’akipurqan, jinan Jonasqa astawanraq phiñakurqan. Chaymi Diosqa nirqan: “Qanqa chay plantaq wañupusqanmanta llakikunki. ¿Manachu noqari Nínive runakunaq wañunanmanta llakikunay?”, nispa. Chaywanmi Diosqa Jonasta yachachisharqan runakunaqa plantakunamantapas aswan valorniyoq kasqanchista.