Esdras Diospa leyninta yachachin

Judiokuna Jerusalenman kutipusqankumantaqa 70 watañan pasarqan. Chaywanpas wakin judiokunaqa Persia nacionpa llaqtankunapin tiyarqanku. Jujninmi karqan Esdras, payqa Jehová Diospa leyninta yachachiq sacerdoten karqan. Esdrasqa uyarisqan Jerusalenpi tiyaq judiokuna Diospa leyninta mana kasukusqankuta, jinan riyta munarqan paykunata yanapananpaq. Rey Artajerjesmi nirqan: “Diosmi yachayta qosunki leyninta yachachinaykipaq. Chhaynaqa qanwan riyta munaqkunata pusarikuspa viajay”, nispa. Jinan Esdrasqa Jerusalenman ripuyta munaqkunata juñurqan. Diosmantataq mañakurqanku viajasqankupi cuidananpaq, jinaspa viajarqanku.

Tawa killapin Jerusalenman chayarqanku. Jinan umalliqkunaqa Esdrasta nirqanku: “Llaqtanchismanta runakunaqa idolokunata adoraq warmikunawanmi casarakunku”, nispa. Chaymi Esdrasqa judío runakunaq ñaupanpi qonqorikuspa Diosmanta mañakurqan: “Jehová Diosníy, imaymanatan noqaykupaq ruwarqanki, noqaykutaq qan contra juchallikuyku”, nispa. Jinan judiokunaqa juchankumanta pesapakurqanku. Chaywanpas mana allinkunatan ruwashallarqanku, chaymi Esdrasqa umalliqkunata juezkunatawan ajllarqan allinta investiganankupaq. Jinan kinsa killapi Diosta mana adoray munaqkunata qarqopurqanku.

Chay pasasqanmantaqa 12 watan pasarqan. Chay watakunapin Jerusalén llaqtaq perqankunata jatarichirqanku. Esdrasqa wajmantan runakunata juñuspa paykunaq ñaupaqenpi Diospa leyninta leerqan. Diospa qelqanta kichaqtinmi runakunaqa sayarirqanku. Jinan Esdrasqa Jehová Diosta alabarqan runakunapas makinkutan oqarirqanku. Chay qhepamanmi Esdrasqa Diospa leyninta leespa explicarqan. Runakunaqa tukuy yuyaywanmi uyarirqanku. Jinan reparakurqanku wajmanta Diosmanta karunchakusqankuta, jinaspa waqaykurqanku. Qhepantin p’unchaymi Esdrasqa Diospa leyninta leellarqantaq. Chaypin Israel runakunaqa yacharqanku Ch’ujlla Ruway Fiestata ruwanankuña kasqanta, jinan alistakurqanku chay fiestapaq.

Israel runakunaqa qanchis p’unchaymi chay fiestata kusisqa ruwarqanku. Diostan agradecekurqanku allinta cosechasqankumanta. Josuepa tiemponpi jinaraqmi ruwarqanku fiesta ruwayta tukuspataq mañakurqanku: “Jehová Diosníy, qanmi esclavo kasqaykumanta librawarqankiku. Ch’inneqpin mijuyta qowarqankiku, kay sumaq jallp’atataq qowarqankiku. Noqaykun ichaqa askha kutipi juchallikurqayku. Profetakunataña kachamurqanki chaypas, manan kasukurqaykuchu. Chaywanpas pacienciakurqankin. Manan Abrahanman prometesqaykita qonqarqankichu. Chaymi kunan prometekuyku qanta kasukunaykupaq”, nispa. Jinan prometekusqankuta qelqarqanku, jinaspa umalliqkuna, Leví runakuna, sacerdotekunapas firmarqanku.