Ángel Gabriel Mariata visitan

Elisabetpa parientenmi María karqan, payqa Nazaret llaqtapin tiyarqan. Mariaqa carpintero Josewanmi casarakunanña kasharqan. Elisabet soqta killaña onqoq kashaqtinmi ángel Gabrielqa Mariaman rijurispa nirqan: “¿Imaynalla María? Jehová Diosmi allinpaq qhawarisunki”, nispa. Mariaqa manan entienderqanchu, chaymi Gabrielqa nirqan: “Onqoqmi rijurinki, jinaspa qhari wawata onqokunki, sutinmi kanqa Jesús. Payqa reymi kanqa, wiñaypaqtaqmi kamachikunqa”, nispa.

Mariataq nirqan: “¿Imaynataq chayri kanman? Noqaqa manan pi qhariwanpas puñunichu”, nispa. Jinan Gabrielqa nirqan: “Diospaqqa manan imapas sasachu, santo espiritun uraykamusunki, jinan wawayoq kanki. Parienteyki Elisabetpas onqoqmi kashan”, nispa. Chaymi Mariaqa nirqan: “Diospa kamachinmi kani, niwasqaykiman jina pasachun”, nispa.

Mariaqa Elisabet-ta visitaqmi rirqan. Wasinman chayaqtinmi Elisabetpa wawanqa kusikuymanta wijsanpi saltarqan. Jinan Elisabetqa santo espirituq junt’aykusqan nirqan: “María, Diospa bendecisqanmi kanki. Anchatan kusikuni señorniypa maman visitamuwasqanmanta”, nispa. Jinan Mariaqa nirqan: “Jehová Diostan tukuy sonqoywan alabani”, nispa. Mariaqa kinsa killan Elisabetwan qhepakurqan, chaymantataq Nazaretman kutipurqan.

Joseqa yacharusqan María onqoq kashasqanta, jinan manaña munarqanchu paywan casarakuyta. Ichaqa mosqoyninpin Diospa angelnin payman rijurispa nirqan: “Ama manchakuychu Mariawan casarakuytaqa, manan ima mana allintapas ruwanchu”, nispa. Chaymi Mariawan casarakapurqan.