Jesús Calavera Patapi wañupun

Uma sacerdotekunan Jesusta Pilatoman aparqanku, jinan Pilatoqa tapurqan: “¿Imamantan kay runata juchachashankichis?”, nispa. Paykunataq nirqanku: “Noqaqa reymi kani nisqanmantan”, nispa. Pilatotaq Jesusta tapurqan: “¿Judiokunaq reyninchu kanki?”, nispa. Jesustaq nirqan: “Gobiernoyqa manan kay pachamantachu”, nispa.

Chaymantaqa Galilea llaqtapi rey Herodesmanmi Pilatoqa Jesusta apachirqan juzgananpaq. Paypas manan imamantapas juchachayta atirqanchu, chaymi jujmanta Pilatoman kutichimpurqan. Chay qhepamanmi Pilatoqa runakunata nirqan: “Noqapas Herodespas manan imatapas kay runapiqa tariykuchu, chaymi kacharipusaq”, nispa. Runakunan ichaqa qaparirqanku: “¡Wañuchiy! ¡Wañuchiy!”, nispa. Soldadokunataq soq’aykurqanku, thoqaykurqanku, saqmarqanku, kiskakunayoq coronawan churaruspataq burlakurqanku: “¡Buenos días, judiokunaq reynin!”, nispa. Pilatoqa jujmantan nirqan: “Noqaqa manan kay runapiqa ima mana allintapas tarinichu”, nispa. Runakunataq qaparirqanku: “¡K’aspipi warkuy!”, nispa. Jinan Pilatoqa Jesusta entregarqan wañuchinankupaq.

Chaymantataq Jesusta Calavera Pataman aparqanku, chaypin k’aspipi warkurqanku. Jinan Jesusqa papanmanta mañakurqan: “Taytáy, kay runakunata perdonaykuy, manan yachankuchu imachus ruwasqankuta”, nispa. Runakunan ichaqa burlakurqanku: “Diospa Churin kanki chayqa k’aspimanta uraykamuy”, nispa.

Jesuswan warkusqa suwa runan Jesusta nirqan: “Gobiernoykipi noqamanta yuyarikamuwanki”, nispa. Jesustaq nirqan: “Noqawan kuskan paraisopi kanki”, nispa. Chay tardentan kinsa hora tutayarqan. Chaypin wakin discipulonkunapas kasharqanku maman Mariapas chaypin kasharqan. Jesustaq Juanta nirqan maman Mariata cuidananpaq.

Chay qhepamanmi Jesusqa nirqan: “¡Llapanpas junt’akunñan!”, nispa. K’umurispataq wañupurqan. Chayllamanmi pampaqa sinchita chhafchikuyta qallarirqan. Templopi cortinataq iskayman llik’ikurqan. Ejercitopi capitantaq nirqan: “¡Cheqaqtapunimá kay runaqa Diospa Churin kasqa!”, nispa.