Carcelero Jesuspi iñipun

Filipos llaqtapin juj sipasman juj supay jaykurqan. Chaywanmi suerteta qhawaspa patroninkunaman askha qolqeta ganachiq. Pablowan Silaswan Filipos llaqtaman chayaqtinkun chay sipasqa supaypa kamachisqan qhepankuta qaparispa puriq: “¡Kay runakunaqa jatun Diospa kamachinmi kanku!”, nispa. Chaymi Pabloqa supayta nirqan: “¡Jesuspa sutinpin kamachiyki, lloqsiy paymanta!”, nispa. Jinan sipasmanta lloqsipurqan.

Sipaspa patronninkunaqa repararqankun manaña paywan qolqeta gananankuta. Jinan sinchita phiñakuspanku Pablota Silastawan jap’irqanku, jinaspa kamachiqkunaman juezkunamanwan aysarqanku, nirqankutaq: “¡Kay runakunaqa manan leyninchista kasukunkuchu, llaqtatataq ch’aqwachishanku!”, nispa. Jinan juezkunaqa kamachirqanku Pablotapas Silastapas k’aspiwan maqaspa carcelman wisq’amunankupaq. Carcelerotaq tutayaq ukhu cuartoman wisq’amurqan chakinkutapas tablakunawanmi jap’ichirqan.

Pablowan Silaswanqa Jehová Diosta jatunchanankupaqmi alto kunkawan takirqanku, juj presokunapas uyarisharqankun chaytaqa. Chayllamanmi kuska tutata jina jatun terremoto pasarqan. Jinan punkukunapas kichakurqan cadenakunapas paskakurqan, chakinkuta jap’iq tablakunapas p’akikurqan. Carceleroqa ukhu cuartoman jaykuspan rikurqan punkukuna kicharayashaqta. Jinaspa presokunaq ayqekusqankuta piensaspa espadanwan wañuchikuyta munarqan.

Chay ratupin Pabloqa fuerteta nirqan: “¡Ama wañuchikuychu! ¡Llapallaykun kaypi kashayku!”, nispa. Jinan carceleroqa ñaupankupi qonqorikuspa nirqan: “¿Imatan ruwanay salvakunaypaq?”, nispa. Paykunataq nirqanku: “Qanpas familiaykipas Jesuspin iñinaykichis”, nispa. Jinan Diospa siminta carceleromanpas familianmanpas yachachirqanku, llapallankutaq bautizakurqanku.