100 WILLAKUY

Pablowan Timoteowan

Timoteo wawallaraq kashaspa, maman Eunice, abuelan Loidapiwan

Timoteo waynaqa Listra llaqtapi iñiq t’aqamantan karqan. Papanmi griego runa karqan mamantaq judía. Mamanpa sutinmi Eunice karqan, abuelanpa sutintaq Loida. Paykunan Timoteoman Diosmanta yachachirqanku wawa kasqanmantapacha.

Pablo iskay kaq viajenpi Listra llaqtata visitashaqtinmi rikurqan Timoteoqa hermanokunata munakusqanta yanapayta munasqantapas. Chaymi Pabloqa Timoteota invitarqan paywan kuska viajananpaq. Tiempowanmi Pabloqa Timoteota yanaparqan Diospa siminmanta allin yachachiq kananpaq.

Santo espiritun Pablota Timoteotawan pusarqan maypichus predicanankupaq. Juj tutan Pabloqa rijuriypi rikurqan juj runa Macedoniaman rinanpaq valekusqanta. Chaymi Pabloqa Timoteowan, Silaswan, Lucaswan ima predicaq rirqanku iñiq t’aqakunata jatarichiq ima.

Macedoniapin tarikurqan Tesalónica llaqta, chay llaqtamanta askha runakunan cristiano kapurqanku. Wakin judiokunan ichaqa Pablomanta compañeronkunamantawan envidiakurqanku. Jinaspa hermanokunata millay runakunawan llaqtapi kamachikuqkunaman apachirqanku, qaparirqankutaq: “¡Kay runakunan Roma gobierno contra jatarinku!”, nispa. Pablopas Timoteopas peligropin tarikusharqanku, chaymi Berea llaqtaman tuta ayqekurqanku.

Berea runakunaqa uyariytan munarqanku Diospa siminta, chaymi askha griegokunapas judiokunapas cristiano kapurqanku. Ichaqa wakin judiokunan Tesalónica llaqtamanta jamuspanku ch’aqwata jatarichirqanku. Chaymi Pabloqa Atenas llaqtaman rirqan. Timoteo Silaswanmi ichaqa Bereapi qhepakurqanku hermanokunata kallpachaspa. Tiempowanmi Pabloqa Timoteota kacharqan Tesalónica llaqtapi iñiqkunata kallpachananpaq, paykunaqa sinchi qatikachasqan kasharqanku. Chay qhepamantaq Timoteota kacharqan askha iñiq t’aqakunata visitaspa kallpachananpaq.

Apóstol Pablo Timoteoman juj cartata dictashan. Soldadomantaq cadenawan watasqa kashan preso kasqanrayku

Pablon Timoteota nirqan: “Diosta serviyta munaqkunaqa qatikachasqan kanqaku”, nispa. Diospi iñisqanraykun Timoteoqa qatikachasqa karqan, carcelpipas wisq’arqanku. Chaywanpas kusisqan karqan Diospaq junt’aq sonqo kasqanmanta.

Pablon Filipos llaqtapi hermanokunata nirqan: “Timoteota kachamusaykichis, paymi yachachisunkichis Diosta imayna serviyta, imayna predicaytapas”, nispa. Pabloqa confiarqanmi Timoteopi, askha watan kuska llank’arqanku, amigontintaqmi karqankupas.

“Manan pipas pay jinaqa kanchu, payqa tukuy sonqowanmi qankunata qhawarisunkichis. Jujkunan ichaqa allinnillankuta maskhashanku, manataq Jesucristoq allinnintachu” (Filipenses 2:20, 21).