04 YACHACHIKUY
¿Pitaq Diosri?
Runakunaqa askha dioskunatan adoranku, ñaupa tiempopipas imaymana dioskunatan adorarqanku. Ichaqa Bibliaq nisqan jinaqa kanmi juj Dios llapa “dioskunamantapas ancha atiyniyoq” (2 Crónicas 2:5). ¿Pitaq payri? ¿Imaynapin pay juj dioskunamanta aswan atiyniyoq kanman? Kay yachachikuypin paymanta yachasunchis.
1. ¿Iman Diospa sutin? ¿Munanchu pay sutinta yachananchista?
Bibliapin Diosqa nin: “Noqaqa Jehová Diosmi kani, chaymi sutiyqa”, nispa (leey Isaías 42:5, 8). Jehová nisqa sutiqa hebreo rimaymantan jamun. Askha allin yachaq runakunaq nisqanman jinaqa chay sutiqa “paymi imatapas kachin” ninantan nin. Jehová Diosqa sutinta yachananchistan munan (Éxodo 3:15). Chaymi Bibliapi qanchis waranqa kuti masta sutinta qelqachirqan.a “Jehová Diosllan cheqaq Diosqa. Manan jujqa kanchu janaq pachapipas ni kay pachapipas” (Deuteronomio 4:39).
2. ¿Imatan Biblia willan Jehová Diosmanta?
Bibliaq nisqan jina, runakunaq adorasqan dioskunamantaqa Jehová Diosllan cheqaq Diosqa. Pay sapallanmi “pachantinpi ancha jatun Diosqa” (leey Salmos 83:18). Jehová Diosqa “tukuy atiyniyoq” Diosmi, manan imapas paypaqqa mana atikuqqa kanmanchu. Paymi “tukuy imatapas” kamarqan janaq pachapipas kay pachapipas (Apocalipsis 4:8, 11). Chaymantapas Jehová Diosllan mana qallariyniyoq Diosqa, payqa wiñay-wiñaymanta kausaq Diosmi, wiñay-wiñaypaqtaqmi kausanqapas (Salmos 90:2).
ASTAWAN YACHASUNCHIS
Diostaqa yaqa llapapas “Señor, Dios” nispallan ninku, ichaqa kanmi sutinqa; chaymantan kay partepi astawan yachasunchis. Chaymantapas yachasunmi imaynatas Diosqa sutinta reqsichirqan chayta, imaraykus sutinta yachananchispuni chaytapas.
3. Jujllan Diospa sutinqa
Askha sutiwanña jujkuna reqsiwasunman chaypas, lliupas juj sutillayoqmi kanchis. VIDEOTA qhawaychis, jinaspa jamuq tapuyman jina parlariychis:
¿Imanispan Diosta ninku, ichaqa iman sutin?
Bibliaq nisqan jina runakunaqa imaymana dioskunata señorkunata iman adoranku. Leeychis Salmos 136:1-3 textota, jinaspa jamuq tapuyman jina parlariychis:
¿Pitan nikun “dioskunaq Diosnin”, “señorkunaq Señornin” nispa?
4. Jehová Diosqa sutinmanta wajakunaykitan munan
Diosqa maytan munashan sutinta reqsinaykita, ¿imaynapin chayta yachanchis? Chaypaq VIDEOTA qhawaychis, jinaspa qatimuq tapuyman jina parlariychis:
¿Imaraykun Jehová Dios munan sutinta yachananchista?
Jehová Diosqa munan runakuna sutinmanta wajanankutan. Leeychis Romanos 10:13 textota, jinaspa jamuq tapuykunaman jina parlariychis:
¿Imaraykun rimananchispuni Diospa sutinmanta?
¿Runakuna imayna wajanasuykitan munawaq: yau nispallachu icha sutiykimantachu?
¿Imaynatan Jehová Dios qhawarisunki sutinmanta wajaqtiyki?
5. Jehová Diosqa amigon kanaykitan munan
Camboya llaqtamanta Soten sutiyoq señoran anchatapuni kusikurqan Diospa sutinta yachaspa, paypaqqa chay sutita yachaysi imamantapas anchatapuni kusichisqa. VIDEOTA qhawaychis, jinaspa jamuq tapuyman jina parlariychis:
Chay videopi rikukusqanman jina, ¿imaynatan chay señorata yanaparqan Diospa sutinta yachasqan?
Pitapas reqsinanchispaqqa sutintaraqmi yachananchis ¿riki? Leeychis Santiago 4:8a textota, jinaspa jamuq tapuykunaman jina parlariychis:
¿Ima ruwanaykitan Jehová Dios munan?
¿Yanapasunkimanchu Diosta reqsiy, sutintapas yachay payman asuykunaykipaq? ¿Imarayku?
WAKIN RUNAKUNAN NINKU: “Jujllataq Dios chayqa, ¿imapaqñataq sutintari reqsisunman? ¿Imapaqñan sutinmantapas wajakusunman?”, nispa.
¿Jehová nisqachu Diospa sutin? ¿Creenkichu chaypi?
¿Imaynatan jujkunata yanapawaq Diosta sutinmanta wajakunankupaq?
IMATAN YACHAMURQANCHIS
Sapallan cheqaq Diospa sutinqa Jehová nisqan. Payqa munan sutinmanta wajananchistan, chhaynapin paypa amigon kasunchis.
Yuyarisun
¿Imaynan runakunaq adorasqan dioskuna, ichaqa imaynan Jehová Dios?
¿Imaraykun Diosta sutinmantapuni wajananchis?
¿Munanchu Jehová Dios paypa amigon kanaykita?
ASTAWAN YACHANAYKIPAQ
Kaypin pisqa yachachikuykunata tarinki, chhaynapin allinta yachanki Diosqa cheqaqpuni kasqanta.
Diosqa karqanpunin, manan pipas paytaqa kamarqanchu, chaymantan kaypi yachanki.
“¿Pitaq Diostari kamarqan?” (Qhawaq, 2014 watapi 1 setiembre)
Ñaupa tiempopiqa jujniraytas Jehová sutita rimankuman karqan. Chaywanpas, ¿imaraykun Jehová nispapuni Diosmanta wajakunanchis?
¿Sutinmantapunichu Diosta wajakunanchis? Chaymantan kaypi yachanki.
a Mosoq Pacha Biblia nisqapi kaq “Astawan yachanapaq A4” nisqapin Diospa sutinmanta astawan yachanki, chaypin willakushan imaraykus wakin Bibliakunapi mana chay sutita churankuchu chaytapas.