7 JACOB
Familianraykun wañuy patamanraq churakurqan
JACOBQA kuraqña kaspan nirqan: “Kausasqay watakunaqa sinchi sasan noqapaq karqan, pisillataqmi karqanpas”, nispa (Gén. 47:9). ¡Imaymanapin Jacobqa tarikurqan! Waynallaraq kaspan Jacobqa Harán llaqtaman ayqekurqan wayqen wañuchiyta munaqtin. Chaypin Raquelta reqsirqan jinan paymanta enamorakurqan. Raquelpa taytan Labanmi ichaqa Jacobta engañaspa kuraq ususinwan casarachirqan. Chaymi Jacobqa iskay esposayoq kapurqan, chay esposankunaqa manan allintachu apanakurqanku. Jacobqa askha watakunan Labanpaq llank’arqan. Chaywanpas Labanqa askha kutipin Jacobta engañayta munarqan. Chhaynaña karqan chaypas Jacobqa mana manchakuqmi karqan, iñiypipas fuerten karqan, sasachakuykunatapas allinta aguantarqan.
Juj p’unchaymi Jehová Dios Jacobta nirqan Haranmanta Canaanman ripunanpaq. Jacobpaqqa sasan kasharqan chayta ruway, ¿imarayku? Suegron Labán millay kasqanrayku. Chaywanpas Jacobqa llapa familianta juñuspan tapurqan ripunkumanchus icha manachus chayta, jinaspan Labanpa mana yachasqallan ripurqanku. Chayta yacharuspan Labanqa runankunapiwan Jacobta qatiparqanku. Taripaspataq Labanqa Jacobta imaymanata nirqan. Chaymantapas amenazarqanmi “noqaqa ima mana allintapas ruwaykichismanmi” nispa. Jacobmi ichaqa mana manchakuspa sut’illanta nirqan askha watakuna engañasqanta, yanqamanta millayta tratasqantawan. Ichaqa nillarqantaqmi paywan thajpi kausayta munasqantapas. Chay problemankutaqa sumaqtan allichapurqanku.
¿Iman Jacobta yanaparqan familian ukhupi thaj kayta maskhananpaq jinallataq juj atiyniyoq angelwan jap’inakunanpaqpas?
Jacobpa sasachakuyninkunaqa manan chaypichu tukurqan. Mellizo wayqen Esaumi paywan tupaq jamusharqan. Waynallaraq kashaqtinmi Jacobmanqa maman willarqan wayqen Esaú wañuchiy munasqanta. Esauqa piensarqan Jacob taytanta engañaspa bendecichikunanpaqmi. Jacobqa munasharqanmi wayqenwan allipunayta. Ichaqa wayqen Esaú 400 runakunantin paywan tupaq jamushasqantan yacharuspan sinchita mancharikurqan. Chaymi kamachinkunata kacharqan valorniyoq regalokunata Esauman apanankupaq. ¿Esaupa sonqon llamp’uyanmanchu karqan chaywan? Chay ratuqa manaraqmi Jacobqa yacharqanchu chayta. Ichaqa chayllamanmi admirakunapaq jina pasarqan.
Jacobqa chay tutan juj mana reqsisqan runawan tuparqan. Chay runaqa Jehová Diospa angelninmi karqan, chaymi Jacobqa chay runawan jap’inakuyta qallarirqan. Jacobqa chay ángel bendecinanta munaspan pacha illarimunankama paywan jap’inakurqan. Chay kutipaqqa 97 watanpiñan Jacobqa kasharqan. Chay angelqa aswan kallpasapan paymantaqa karqan, chaywanpas Jacobqa manapunin vencechikuyta munarqanchu. Waqasparaqmi tukuy kallpanwan jap’inakurqan (Os. 12:4). Jacobqa yacharqanmi tukuy kallpanwan jap’inakuspa Jehová Diosmanta bendicionta chaskinanta. Chay angelmi ichaqa pacha illarimuyta jina Jacobpa cinturanpa jujnin ladonta tupaykuspa chaka tullunta phawachirqan. Chaypin chay angelqa kusikunapaq willakuyta nirqan: “Kunanqa Israel nisqan sutiyki kapun”, nispa. ¿Imaninanmi chay suti? Chay sutiqa “Dioswan jap’inakuq” ninantan nin. Arí, Jacobqa Dioswanmi jap’inakurqan, chaymi chay angelta mana kacharirqanchu Jehová Dios bendecinankama.
Jacobqa wist’uspan familianpa kasqanman kutimusharqan. Chayllamanmi Esauqa 400 runakunantin rijurimurqan, jinan Jacobqa sapallan rirqan Esauwan tupaq. Chaypin payqa wayqenman qanchis kutita pampakama k’umuykurqan. Jinan Esauqa wayqenman phawaykurqan, ichaqa manan armatachu ni imatachu orqomurqan aswanmi makinta kicharispa abrazaykurqan, jinaspa waqayta qallarirqanku. Regalokunata apachisqanta rikuspa, pampakama k’umuykusqanta rikuspa imachá Esauqa manaña phiñakurqanchu Jacobpaq. Chaymantapas yaqapaschá Esauqa wayqen Jacob mana manchakuq valiente kasqanta rikuspa admirasqa kasharqan. Chhayna humilde sonqo kasqanraykun Jacobqa wayqenwan sumaqta allipunarqanku.
Jacobqa angelwan jap’inakusqanmantapachan wist’u qhepakapurqan. Chaymantapas imaymana sasachakuykunapin tarikullarqantaq. Ichaqa kusisqan kasharqan Jehová Diosta kasukusqanmanta, angelwan jap’inakusqanmantapas. Tiempowanqa junt’akurqanmi Jehová Diospa imachus willasqanqa. Jacobqa otaq Israelqa jatun nacionmi kapurqan (Gén. 28:14). Chaymantapas Bibliapin willashan Jehová Diosqa “Jacobpa Diosnin” kasqanmanta (Éx. 3:6). Jesuspas nirqanmi Jehová Diosqa “manan wañusqakunaq Diosninchu, aswanpas kausaqkunaq Diosninmi; paypaqqa llapankupas kausashanmi” nispa (Luc. 20:37, 38). Chaywanmi yachanchis Jacob kausarimpunanta. Mosoq pachapi kaspaqa manañan sasachakuypiñachu tarikunqa, aswanpas wiñaypaqmi kusisqa kausanqa.
Kay textokunata leey
¿Imaniwaqmi?
¿Imakunata ruwaspan Jacob rikuchirqan mana manchakuq kasqanta?
Astawan t’aqwiriy
1. ¿Imaraykun Jehová Dios Jacobta bendecirqan Esauta bendecinanmanta? (w03 15/10 29 párr. 2).
2. ¿Imatan Jehová Dios Jacobman mosqoypi rikuchirqan, imatan chaywan willasharqan? (w03 15/10 28, 29). A
Imagen A
3. ¿Imaraykun Jacob mana iskayarqanchu ángel bendecinanmanta? (w03 15/10 31 párr. 1). B
Imagen B
4. ¿Imatan Jacob ruwarqan Canaán runakunamanta familianta cuidananpaq? (w95 15/9 21 párr. 5, nota).
Imakunapin yanapawasunman
Jacobqa allintan cuidarqan Labanpa ovejankunata (Gén. 31:38-40). ¿Imaynatan Jacob jina umalliqkunapas Jehová Diospa ovejachankunata otaq iñiqmasikunata cuidankuman? C
Imagen C
Jacobqa ima sasachakuypi tarikuspapas Jehová Diosmantan mañakurqan (Gén. 32:6-12). ¿Imakunatan Jacob jina Jehová Diosman willakuwaq?
¿Imakunata ruwaspan rikuchiwaq Jacob jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Jacob kausarimpuqtin?
Astawan yachanapaq
¿Imatan noqanchispas ruwasunman Jacob jina piwanpas phiñachinakuspa?
“Bibliamanta dibujokunawan yachanapaq” nisqawan yanapachikuy familiaykita Jacobmanta yachachinaykipaq.