Espirituwan pusachikuspan Diosman qokusqanchista hunt’asun
“Santo Espirituq munasqanman hina kawsaychis, amataq aychaykichispa munasqantachu ruwaychis.” (GÁL. 5:16.)
1. ¿Ima iskay bautismon apakurqan Pentecostés fiestapi?
JESUSPA qatikuqninkunan santo espirituwan bautizakurqanku 33 wata Pentecostés p’unchaypi, chaymi mana yachasqanku simikunapi rimayta atirqanku (1 Cor. 12:4-10). Chaymantataq Pedro huk sumaq discursota qorqan. ¿Imaynatan uyariqkuna sientekurqanku chaykunamanta yachaspa? ‘Chayta uyariqtinkun sonqonku “ch’allaq” nirqan’, chaymi arrepientekuspa bautizakurqanku apostolta kasukuspa. Biblian nin: “Chaymi simita sonqonkupi chaskikuqkunaqa bautizasqa karqanku, hinan chay p’unchaypi iñiqkunaman yapakurqan kinsa waranqa hina runakuna”, nispa (Hech. 2:22, 36-41). Jesusta kasukuspan bautizakurqanku Yayaq, Churiq, santo espirituq sutinpi (Mat. 28:19).
2, 3. a) Willay imapi santo espirituwan bautizakuy “santo espirituq sutinpi” bautizakuywan hukniray kasqanta. b) ¿Imaraykun unupi bautizakunanchis cheqaq cristiano kananchispaq?
2 ¿Kaqllachu santo espirituwan bautizakuy santo espirituq sutinpi bautizakuywan? Manan. Santo espirituwan bautizakuqkunaqa hukmantan nacenku Diospa espiritual churin hina (Juan 3:3). Chaymantapas hanaq pachapaq akllasqan kanku, qhepaman Diospa Reinonpi reykuna sacerdotekuna kanankupaq, hinaspa Cristoq espiritual cuerponpa miembronkuna kanku (1 Cor. 12:13; Gál. 3:27; Apo. 20:6). Chhaynaqa, espirituwan bautizakuyqa Pentecostés p’unchaymantapachan apakushan, chaytaqa Jehová Diosmi ruwashan Cristowan kuska herencia chaskiqkunata akllananpaq (Rom. 8:15-17). Ichaqa, ¿imanisunmantaq asambleakunapi Jehová Diospa testigonkuna ‘santo espirituq sutinpi’ bautizasqankumanta?
3 Unupi bautizakusqanwanmi cristianoqa rikuchin tukuy sonqomanta Diosman qokusqanta. Chaytan ruwarqanku hanaq pachapaq akllasqa cristianokuna, millonninpi kay pachapi kawsay suyakuq cristianokunapas. Hanaq pachapaqña otaq kay pachapaqña suyakuyninchis chaypas, Diosta kusichinapaqqa ‘Yayaq, Churiq, santo espirituq sutinpin’ bautizakunanchis. Ichaqa bautizakusqanchis qhepamanpas ‘santo espirituq munasqanman hinan kawsashanallanchis’ (leey Gálatas 5:16). Chaymi tapukunanchis: “¿Espirituwan pusachikuspachu Diosman qokusqayta allinta hunt’ashani?”, nispa.
‘Santo espirituq munasqanman hina kawsay’
4. ¿Imaynatan ‘santo espirituq munasqanman hina kawsanchis’?
4 ‘Santo espirituq munasqanman hina kawsayqa’ Diospa kallpanwan kawsayninchispi pusachikuymi, ima ruwasqanchispipas chaywan yanapachikuy. Gálatas 5 capitulopin rikuchishan espirituwan pusachikuy, aychaq munayninman hina kawsaywan hukniray kasqanta (leey Gálatas 5:17, 18).
5. ¿Ima mana allin ruwaykunatan mana ruwanachu espirituwan pusachikunapaq?
5 Espirituwan pusachikuqkunaqa kallpachakunkun aychaq munasqanta mana ruwanankupaq. Kaykunan aychaq munayninkunaqa: “Wasanchaykuna, qhelli huchapi puriykuna, millay viciokunapi kawsaykuna, ídolo yupaychaykuna, layqakuykuna, cheqninakuykuna, quejanakuykuna, lerq’opayanakuykuna, k’arak phiñakuykuna, payllapaq kananta munaykuna, ch’eqechinakuykuna, wak t’aqata hatarichiykuna, envidiakuykuna, machaykuna, aycha kusichiypi waqlliykuna” (Gál. 5:19-21). Rikch’anachiy simipin nisunman: cristianokunaqa ‘cuerpoq ruwayninkunatan wañuchinku’, nispa. ¿Imaynatan chayta ruwanku? ‘Espirituq’ yanapayninwan (Rom. 8:5, 13). Manataq aychaq munayninwanchu atipachikunku chayqa, espirituq munayninman hinan yuyaykunku pusachikunkutaq.
6. ¿Iman necesitakun espirituq rurun kawsayninchispi rurunanpaq? Ejemplowan willay.
6 Diospa kallpanwan pusachikuqtinchisqa ‘espirituq [...] ruruntan’ kawsayninchispi ruruchisunchis, chayqa Diosta kusichiq allin ruwaykunan (Gál. 5:22, 23). Ichaqa sapankanchismi chaypaq kallpachakunanchis. Chayta entiendenapaq tupachisun chakrapi llank’aqwan. Hallp’ata llank’ananpaqqa unuta intita iman necesitan. Mana chaywanqa manan imatapas cosechanmanchu. Santo espirituqa inti hinan espirituq rurunta ruruchin. Ichaqa yuyarinanchismi, chakrapi llank’aqqa manan allin cosechata oqarinmanchu sichus chaypaq mana kallpachakunmanchu chayqa (Pro. 10:4). Chay hinallataqmi, sichus munanchis espirituq rurunmanta allin cosecha hoqariyta chayqa, hallp’aman rikch’akuq sonqonchispin allinta llank’ananchis, chaypaqqa kallpachakunanchismi. Chaymi tapukunanchis: “¿Pusachikunichu espirituwan ahinapi kawsayniypi rurunanpaq?”, nispa.
7. Espirituq rurunta wiñachiyta munanchis chayqa ¿imaraykun ancha allinpuni tiempota hap’ispa Biblia estudiay yuyaymanaypas?
7 Allin cosechata hoqarinapaqqa unupas necesitakullantaqmi. Chhaynallataqmi espirituq rurunta wiñachinapaqpas unuman rikch’akuq Bibliaq yachachikuyninkunata necesitanchis, chaytan congregacionpi chaskinchis (Isa. 55:1). Askha kutipichá yachachirqanchis Biblia espirituq yanapayninwan ruwakusqanta, allinta entiendenanchispaqtaq allin yuyayniyoq hunt’aq kamachi askha yanapaykuna qowasqanchista (Mat. 24:45-47; 2 Tim. 3:16). Yachasqanchis hina, espirituwan pusachikunapaqqa Diospa Simin Qelqata leespan yuyaymanananchis. Chhaynapin qatikusunman ñawpa tiempo profetakunata, paykunan “makilla maskhaspa tapupakurqanku”, astawan yachayta munaspa t’aqwirqanku chay tiempopi kaq yachachikuykunata. Hinaspapas qatikusunmanmi angelkunaq ruwasqanta, paykunan anchatapuni interesakurqanku Diospa prometesqan Miraypi akllasqa cristianokunapipas (leey 1 Pedro 1:10-12).
¿Imaynatan yanapawanchis santo espíritu?
8. ¿Imaraykun Jehová Diospa espiritunta mañakunanchispuni?
8 Ichaqa manan estudianallachu nitaq yuyaymananallachu. Chaymantapas Diosmanta yanapayninta mañakushanalla, Payqa ‘yuyaykusqanchismantapas aswan askhataraq tukuy imatapas atiyninwan ruwanqa’ (Efe. 3:20; Luc. 11:13). Ichaqa yaqapaschá pipas ninman: “¿Imaraykutaq cristianokuna Diosta rogakushanallanku ‘manaraq mañakushaqtinkutaq yachanña imakunatachus necesitasqankuta’ chayri?” nispa (Mat. 6:8). Ñawpaqtaqa, santo espiritunta mañakuspaqa paypi confiasqanchistan rikuchinchis. ¿Imaraykun hukkunata yanapanchis? Mayninpiqa ñoqanchispi confiaspa yanapayta mañakusqankurayku (tupachiy Proverbios 3:27). Chhaynatan Jehová Diospas kusikun santo espiritunta mañakuqtinchis, payqa qowasunpunin (Pro. 15:8).
9. ¿Imaynatan huñunakuykunapi Diospa espiritun yanapawanchis?
9 Chaymantapas, huñunakuykunapi hatun huñunakuykunapi iman santo espirituqa yanapawanchis. Chaymi kallpachakunanchis mana faltakunapaq, hinaspa ninripas-ninri uyarinapaq. Chhaynapi “Diospa ukhu sonqontapas” otaq yachaynintapas reqsisun (1 Cor. 2:10). Allinmi sapa kutin huñunakuykunapi comentayqa. Tapukunanchismi: “Qayna semanakunapi, ¿hayk’a kutitan makiyta hoqarirqani iñiyniymanta rimanaypaq? ¿Kallpachakuymanchu chaykunata ruwanaypaq?”, nispa. Jehová Diosqa rikumunqan comentay munasqanchista hinaspan espiritunwan yanapawasun huñunakuykunapi aswanta yachananchispaq kallpachakunanchispaqpas.
10. ¿Imatan ruwanku espirituwan pusachikuqkuna?
10 Espirituwanqa pusachikunchis Apocalipsis 22:17 textopi invitacionta kasukuspan, chaypin nin: “Santo Espirituwan Corderoq esposanwanmi [‘novianwanmi’, NM] ninku: ‘¡Hamuy!’ nispa. Pipas uyariqqa nichun: ‘¡Hamuy!’ nispa. Pipas ch’akichikuqqa hamuchun, kawsay unuta ukyay munaqqa mana qolqellawan ukyachun”, nispa. Chay espiritun noviawan (akllasqa cristianokunawan), lliw runata wakyachishan kawsay unuta ukyanankupaq. Qanri, ¿ñachu chay nisqanta kasukunkiña, hinaspa decidisqaña kashanki hukkunaman invitanaykipaq? ¡May kusikuymi chay llank’aypi yanapakuyqa!
11, 12. ¿Imaynapin santo espíritu yanapan predicación apakunanpaq?
11 Chay llank’ayqa espirituq yanapayninwanmi aparikushan, imaynan qallariy siglopi sucederqan hinata. Arí, chay tiempopiqa Diospa espiritunmi yanaparqan mana haykaq predicakusqan llaqtakunapipas predicakunanpaq. Bibliaq nisqanman hina, Pablota compañeronkunatawanmi ‘Asia provinciapi Diospa Siminta willanankuta santo espíritu hark’arqan’, hinallataq Bitinia llaqtaman haykunankutapas. Manan yachanchischu imarayku chay llaqtakunaman haykunankuta hark’asqanta, ichaqa yachanchismi espíritu apostolta Europa ladoman pusasqanta, chaytaqa ruwarqan huk rikhuriypi willaspan, chaypin Macedoniamanta huk runa yanapayta mañakurqan (Hech. 16:6-10).
12 Kunanpas Jehová Diosqa pachantinpi predicacionta aparishan santo espirituq yanapayninwanmi. Manaña rikhuriykuna kanñachu chaypas, kaqllatan santo espiritunwan akllasqakunata pusashan. Hinaspapas chaywanmi cristianokunata kallpachan tukuy sonqowan predicanankupaq yachachinankupaqpas. Ñachá chay llank’aypi yanapashanchisña, ichaqa yaqapaschá astawanraq llank’asunman.
13. ¿Imaynatan espirituwan pusachikullanchistaq? Huk ejemplota willay.
13 Chaymantapas, santo espirituwanqa pusachikunchis Diospa llaqtanpi chaskisqanchis kamachikuykunata kasukuspan. Yachasunchis Japón nacionpi Mihoko sutiyoq iñiqmasinchismanta. Chayllaraq precursora kaspan revisitakuna ruwayta mana atinanpaq hina qhawarikurqan, uyariqninkuna mana interesakunanpaqmi yuyaykurqan. Ichaqa chay temamantan allin yuyaychaykunata leerqan, Diosmanta willasunchis nisqapi, Qhepamantaq lloqsimurqan Cómo lograr una vida llena de satisfacción, nisqa folleto, chayqa anchatapunin yanaparqan territorionpi runakunata. Hermanaqa chay folletota imayna utilizanapaq sugerenciakunaq nisqanman hinan ruwarqan, astawanqa imaynata revisitakuna ruwaymanta. Chay qhepallamanmi ñawpaqpi mana yachayta munaq askha runakuna Biblia estudiayta munasqaku. Chaymi nirqan: “Askhan estudioykuna karqan mayninpiqa chunka iskayniyoq imaraq, chaymi wakintaqa nirqani qhepamanña estudianaykupaq”, nispa. Arí, sichus cristianokuna kamachikuykuna chaskisqanchisman hina ruwanchis chayqa, espirituwan pusachikusqanchistan rikuchinchis, ahinapitaq askha bendicionkunata chaskinchis.
Diospa espiritunwan yanapachikusun
14, 15. a) ¿Imaynapin pantaq runa atinman qokusqanman hina kawsayta? b) ¿Imaynatan tarisunman allin amigokunata?
14 Diospa llank’ay qowasqanchistaqa hunt’ananchismi (Rom. 10:14). Manapaschá chaypaq hinachu sientekunchis, ichaqa Diosmi chaypaqqa preparawanchis, akllasqa cristianoña kanchis otaq manaña chaypas (leey 2 Corintios 3:5). Sichus tukuy atisqanchista ruwasun espirituwantaq yanapachikusun chayqa, atisunmi Diosman promesa ruwasqanchis hunt’ayta.
15 Pantaq runa kasqanchisraykun Jehová Diosman promesa ruwasqanchista hunt’ay sasa kanman. Wakin ñawpa compañeronchiskunaqa yaqapaschá phiñakunkuman kawsayninchispi cambiasqanchista rikuspanku, hinaspa ñoqanchis ‘contra rimankuman’ (1 Ped. 4:4). Ichaqa manan qonqananchischu kunanqa huk amigokunayoqña kasqanchista, paykunamanta aswan importanteqa Jehová Dioswan Jesucristowanmi kanku (leey Santiago 2:21-23). Ancha allinpunin congregacionpi cristiano masinchiskunawan huk hinalla kawsayqa, paykunaqa pachantinpi ‘iñiq-masinkichiskuna’ ukhupin tarikunku (1 Ped. 2:17; Pro. 17:17). Espiritunwanmi Jehová Diosqa yanapawanchis allin amigokuna tarinanchispaq.
16. ¿Imaraykun Pablo hina nisunman: “Kusikuni pisi kallpayoq kaspa”, nispa?
16 Iñiqmasinchiskunaq yanapayninwanpas sasan kanman sapa p’unchay sasachakuyninchiskunata atipay. Mayninpiqa manan ima ruwaytapas atinchischu. Chhaynapi tarikuspaqa Jehová Diosmanmi asuykunanchis, espirituntataq mañakunanchis. Pabloq nisqanpi yuyaykusun, nirqanmi: “Pisi kallpayoq kaspan aswan atiyniyoqqa kani”, nispa (leey 2 Corintios 4:7-10; 12:10). Payqa allintan yacharqan pisi kallpa kashaqtinchis espíritu kallpachawasqanchista. Ichaqa, ¿imaraykun nirqan: “Kusikuni pisi kallpayoq kaspa”, nispa? Pisi kallpayaqtinmi repararqan espírituq kallpachasqanta. Ñoqanchistapas kallpachawasunmanmi (Rom. 15:13).
17. ¿Imaynatan santo espíritu yanapawanchis wiñay kawsay puertoman chayananchispaq?
17 Rikusqanchis hina, mana santo espirituq yanapayninwanqa manan atisunmanchu Diosman prometekusqanchis hunt’ayta. Barcopi capitanmanmi rikch’akunchis, chay barcon wiñay kawsayman chayanan, chhaynapin Jehová Diosta wiñaypaq yupaychasunchis. Allinlla chayanapaq yanapawaqninchis wayrataq santo espíritu. Chaymi chay wayraq phukusqan ladoman rinanchis. Manan imaña kaqtinpas kay pacha runakunaq mana allin ruwasqanwan waqllinanchischu (1 Cor. 2:12). Bibliawan Diospa llaqtanwan ima pusachikuspaqa, mana maymanpas pantaspan allinlla chayasunchis.
18. ¿Ima ruwananchispaqmi decidisqa kasahanchis, imanaqtin?
18 ¿Ñachu unayña Jehová Diospa testigonkunawan Bibliata estudiashanki, ichaqa manaraqchu Diosman qokuspa bautizakunkiraq? Chhayna kaqtinqa, tapukuy: “¿Iman hark’awashan?” nispa. Sichus yachanki Diospa munaynin hut’akunanpaq santo espíritu yanapasqanta chayqa agradecekuy chaymanta, hinaspa yachasqayki ruwanaykita hunt’ay. Chayta ruwaqtiykiqa anchatan Jehová Dios bendecisunki, espirituntapas llinp’arishaqtan qosunki. Ichaqa unayña bautizakurqanki chayqa, rikurqankichá santo espíritu kawsayniykipi yanapasqasuykita. Repararqankichá pisipaqtiyki Dios santo espiritunwan yanapasqasuykita. Chhaynatan wiñaypaq Diospa bendicionninta chaskishallanki. Chayrayku, ¡tukuy tiempo pusachikushallay Diospa espiritunwan!
¿Imakunatan yacharqanki?
• ¿Iman ‘santo espirituq munasqanman hina kawsay’?
• ¿Iman yanapawasun ‘santo espirituwan’ pusachikushanallapaq?
• ¿Iman yanapawasun Diosman qokusqanchista hunt’ananchispaq?
[15 paginapi dibujo]
Hallp’aman rikch’akuq sonqonchispi llank’anapaqqa kallpachakunanchismi
[16, 17 paginakunapi fotokuna]
¿Diospa espiritunwanchu kawsayninchispi yanapachikunchis?