¿Hunt’ashankichu arí nisqaykiwan?
Hospitalkunapi Rimaq Umallin huk waynawan rimanakurqan domingo p’unchayta kuska predicaq lloqsinankupaq. Ichaqa domingo p’unchaymi huk iñiqmasi umallita telefonopi waqyamurqan valekunanpaq. Chay iñiqmasiq esposanmi carropi accidentakuspa hospitalpi kasharqan. Hinan umallita valekurqan mana yawarllawan operaq doctorta maskhaysinanpaq. Chaymi umalliqa chay llakipi tarikuq familiata yanapananrayku, waynata waqyarqan manaña predicacionman lloqsiy atisqanta willananpaq.
Huk casarasqa iñiqmasikunan, iskay wawanta sapallan uywaq cristianata wasinkuman invitarqanku mikhuq rinankupaq. Chayta wawankunaman willaqtinmi ñawichankuraq kusikuymanta k’ancharirqan, makillataqmi suyakusharqanku chay p’unchay chayamunanta. Ichaqa huk p’unchayllaña kashaqtinmi, casarasqa iñiqmasikuna invitasqanku iñiqmasita nirqanku amaña rinankupaq huk ruwananku kasqanrayku. ¿Iman ruwananku karqan? Iñiqmasita invitasqanku qhepamanmi chay p’unchayllapaqtaq huk invitacionta chaskikusqaku.
Cristianokunaqa llapallanchismi ima prometekusqanchistapas hunt’ananchis. Imatapas ‘“arí”, nispaqa, manañan: “Manan”, ninanchischu’ (2 Cor. 1:18). Ñawpaqpi iskay ejemplokunata rikusqanchis hina, mayninqa imapas qonqaylla kaqtinqa manapaschá ima compromiso ruwasqanchistapas hunt’ayta atisunchu. Apóstol Pablon chay hinapi tarikurqan, chaymanta kunan yachasun.
¿HUNT’ARQANCHU PABLO ARÍ NISQANTA?
55 wata kashaqtinmi apóstol Pablo kinsakaq kutita viajashaspa Éfeso llaqtapi kasharqan. Chaymantan Egeo Lamar-qochata chimpaspa Corinto llaqtata rinanpaq yuyaykurqan, chaymantataq Macedonia llaqtata viajayta munarqan. Kutimpuspataq yapamanta Corinto llaqtapi iñiqmasikunata watukuyta munarqan, Jerusalenpi iñiqmasikunapaq ofrenda huñusqankuta chaskiq hina (1 Cor. 16:3). Chaymantan 2 Corintios 1:15, 16 texto nin: “Chay hinata yuyaykuspaymi, ñawpaqta qankuna waturikuq hamuyta munarqani, kay iskaykaq kutipi qankunata kallpachaykunaypaq. Ñoqaqa yuyaykurqanin Macedoniata riq hina qankunata watukuyta, kaqllataq Macedoniamanta kutimuspaypas qankunata watukuyta. Chaymantataq Judeaman riqtiy yanapaykuwanaykichista”, nispa.
Pabloqa ñawpaqtañan huk carta apachisqanpi willanman karqan paykunata watukuq rinanta (1 Cor. 5:9). Ichaqa chay cartata apachisqan qhepallatan Cloepa wasinpi kaqkuna, Pabloman willarqanku Corinto llaqtapi iñiqmasikuna t’aqanakuypi kawsashasqankuta (1 Cor. 1:10, 11). Chayta yachaspan Pabloqa Corinto llaqtapi cristianokunaman ñawpaqkaq cartata apachirqan. Chay cartapin paykunata munakuywan anyarqan, kallpacharqantaqmi chay sasachakuyninkuta allichanankupaq. Hinaspapas willarqanmi Macedoniamanta kutimuspaña paykunaman watukuq rinanta (1 Cor. 16:5, 6).a
Pabloq carta apachisqanta chaskiqtinkun iñiq t’aqapi ‘allinman tukuq apostolkuna’ Pablota huchacharqanku rimasqanta mana hunt’aq runata hina (2 Cor. 11:5). Chayta yachaspan Pabloqa nirqan: “Kayta yuyaykuspayqa, ¿icha yanqatachu nini? ¿Icha yuyaykusqaytachu aychaman hina yuyaykuni, ñoqa ‘Ari’ ninaypaq, chaymantataq ‘Manan’ ninaypaq?”, nispa (2 Cor. 1:17, MR).
Chhaynaqa, ¿“yanqatachu” Pablo comprometekusharqan, yanqa rimaq mana confianapaq runakuna hina? Manan, Pabloqa manan chhaynachu karqan. Paymi nirqan: ‘¿Yuyaykusqaytachu aychaman hina yuyaykuni?’, nispa. Chayta nisqanpin Pabloqa Corinto llaqtapi cristianokunata nisharqan huk kutipiña viajananpaq yuyaykusqanqa mana yanqachu kasqanta.
Yanqamanta tumpasqankuta sut’inchananpaqmi nirqan: ‘Diosqa hunt’aqmi, paymi yachan qankunaman: “Arí”, nispaykuqa, manaña: “Manan”, niy atisqaykuta’, nispa (2 Cor. 1:18). Pabloqa paykunaq allinninta qhawarispan mana ñawpaqpi nisqanman hinachu viajarqan. Arí, 2 Corintios 1:23 textopi nisqan hina, Pabloqa munarqan sasachakuyninkuta paykunapura allichanankutaraqmi. Qhepamanmi Macedoniapi kashaqtin, Tito willarqan carta qelqasqanman hina Corinto llaqtapi iñiqmasikuna sasachakuyninku allichasqankuta. Chayta yachaspan Pabloqa anchatapuni kusikurqan (2 Cor. 6:11; 7:5-7).
JESUSMI GARANTIA HINA KARQAN
Sichus nisqanku hina, ima ruwasqanpipas Pablo mana cheqaqtachu rimanman karqan chayqa, predicasqanpas yanqapaqmi hap’isqa kanman karqan. Chaymi Pabloqa Corinto llaqtapi cristianokunata yuyarichirqan Jesusmanta willaq kasqanta. Nirqanmi: “Ñoqaqpas Silvanoqpas Timoteoqpas qankunaman willasqayku Diospa Churin Jesucristoqa manapunin ‘arí’ nishaspaqa, manan, ‘mana’ ninmanchu. Aswanpas Diosqa Cristowanmi ‘arí’, nishallanpuni”, nispa (2 Cor. 1:19). Jesusqa confianapaq hinan karqan, kay Hallp’api kashaspa tukuy yachachisqanpas cheqaqpunin karqan (Juan 14:6; 18:37). Pabloqa Jesustan qatikurqan, chaymi pay hina cheqaq kaqtapuni runakunaman willarqan confianapaq hinataqmi karqan.
Jehová Diosqa manan hayk’aqpas llullakunmanchu (Tito 1:2). Apóstol Pablon nirqan: “Diospa llapa prometesqankunaqa Jesucristopin hunt’akun”, nispa. Kay Hallp’api kashaspan Jesusqa hunt’aq sonqo karqan, chaypin rikunchis Jehová Diospa tukuy prometesqanpas hunt’akusqanta. Chaymi Pablo nirqan: “Diosta yupaychaspaqa Jesucristoq sutinpi ‘amén’, ninchis”, nispa (2 Cor. 1:20). Arí, Jesusmi “Amén” nisqaqa, paywanmi Diosqa garantizawanchis lliw promesankuna hunt’akunanta.
Jehová Diospas Jesuspas hunt’ankun ima rimasqankutapas. Paykuna hinan Pablopas kallpachakuq ima prometesqantapas hunt’ananpaq (2 Cor. 1:19). Payqa confianapaq hinan karqan, manan ‘aychaman hina yuyaykuqchu’ karqan (2 Cor. 1:17, MR). Hinaspapas ‘Santo Espirituq munasqanman hinan kawsarqan’ (Gál. 5:16). Tukuy ruwasqanpin rikuchirqan hukkunapi interesakusqanta. Arí nisqanqa, arí nisqapunin karqan.
¿HUNT’ASHANKICHU ARÍ NISQAYKIWAN?
Kay tiempopi runakunaqa manan Bibliaq nisqanman hinachu kawsanku, chaymi imallapas kaqtinqa prometekusqankuta mana hunt’ankuchu. Negociota ruwaqkunapas documentota ruwashaspan mana hunt’ankuchu arí nisqankuwan. Casarasqa kaqkunapas manan respetankuchu compromiso ruwasqankuta. Chaymi kay tiempopi askha casarasqakuna t’aqanakapushanku (2 Tim. 3:1, 2).
Qanrí, ¿hunt’ashankichu arí nisqaykiwan? Ñawpaq parrafopi rikusqanchis hina, qonqaylla imapas kaqtinqa, yaqapaschá compromiso ruwasqaykita mana hunt’ayta atinkichu. Chaywanpas imapaqpas comprometekuspa otaq piwanpas compromisota ruwaspaqa kallpachakunaykin chayta hunt’anaykipaq (Sal. 15:4; Mat. 5:37). Chayta ruwanki chayqa, confianapaq hina, cheqaqllata rimaqta hinan hukkuna qhawarisunkiku (Efes. 4:15, 25; Sant. 5:12). Tukuy ruwasqaykipi confianapaq hina kanki chayqa, makillan Diospa Gobiernonmanta willasqaykita uyarisunkiku. Chayrayku kallpachakushallay arí nisqaykita hunt’anaykipaq.
a Corinto cristianokunaman ñawpaq carta qelqasqan qhepamanmi Pabloqa Troas llaqtata viajarqan. Chaymantan Macedonia llaqtata rirqan, chaypitaqmi Corinto cristianokunaman iskaykaq cartata apachirqan (2 Cor. 2:12; 7:5). Chay qhepamanmi Pabloqa prometekusqanman hina Corinto llaqtapi cristianokunata watukurqan.