¿Jesusmantachu mañakunanchis?
ISKAY wata ñawpaqllatan 800 wayna-sipaskunata encuestata ruwarqanku. Chay encuestapin kayta tapurqanku: “¿Uyarinchu Jesús mañakusqanchista?”, nispa. Hinan sapa 100 runakunamanta 60 churarqanku “arí” nispa. Ichaqa paykunamanta hukninmi Jesús sutita borraruspa “Dios” nispa churarqan.
¿Ima ninkin chaymanta? ¿Jesusmantachu icha Diosmantachu mañakunanchis?a Chaymanta yachanapaq qhawarisun ima nispan Jesús qatikuqninkunata yachachirqan chayta.
¿PIMANTA MAÑAKUNAPAQMI JESÚS YACHACHIRQAN?
Jesusqa Diosllamanta mañakunapaqmi yachachirqan. Pay kikinmi Diosmanta mañakurqan.
Jesusqa Diosllamantan mañakuq chaytan ñoqanchispas ruwananchis
KAYTAN YACHACHIRQAN: Huk kutinmi huknin qatikuqnin nirqan: “Señorníy, yachachiwayku mañakuyta”, nispa. Chaymi Jesusqa nirqan: “Mañakuspaykichisqa kay hinatan ninkichis: Yayayku”, nispa (Lucas 11:1, 2). Orqo patapi yachachishaspan kayta nillarqantaq: “Yayaykimanta mañakuy, [. . .] Yayaykichisqa manaraq mañakushaqtiykichismi yachanña imakunatachus necesitasqaykichista”, nispa (Mateo 6:6, 8). Wañuchinankupaqña kashaqtinmi qatikuqninkunata nillarqantaq: “Imatapas Yayamanta sutiypi mañakuqtiykichisqa, paymi qosunkichis”, nispa (Juan 16:23). Arí, Jesusqa askha kutipin yachachirqan Yayallanmanta otaq Diosllamanta mañakuna kasqanta (Juan 20:17).
¿IMAYNATAN JESÚS MAÑAKURQAN? Huk kutinmi khaynata mañakurqan: “Yayalláy, qanmi kanki hanaq pachapipas kay pachapipas munaychakuq”, nispa (Lucas 10:21). Huk kutipin ‘Jesusqa hanaq pachata qhawarispa nirqan: Yayáy, graciastan qoyki uyariwasqaykimanta’, nispa (Juan 11:41). Wañupunanña kashaqtinmi nillarqantaq: “¡Yayáy, makiykimanmi espirituyta hap’ichiyki!”, nispa (Lucas 23:46). Arí, Jesuspunin ejemplonwan yachachiwarqanchis ‘hanaq pachapipas kay pachapipas munaychakuq’ Diosllamanta mañakuna kasqanta (Mateo 11:25; 26:41, 42; 1 Juan 2:6). Jesuspa yachachisqanman hinan qatikuqninkunapas mañakuqku.
¿PIMANTAN MAÑAKUQKU ÑAWPA TIEMPOPI CRISTIANOKUNA?
Jesús hanaq pachaman kutipusqan qhepallamanmi qatikuqninkunata autoridadkuna cheqnikuyta qallarirqanku (Hechos 4:18). ¿Pimantan mañakurqanku yanapananpaq? ‘Paykunaqa huk sonqollan Diosmanta mañakurqanku’ (Hechos 4:24, 30). Arí, paykunapas Jesuspa yachachisqanta hinan Diosllamanta mañakurqanku.
Askha watakuna qhepamanmi apóstol Pablo qelqarqan: “Qankunapaq mañakuspaykuqa Señorninchis Jesucristoq Yayan Diosmanmi graciasta qollaykupuni”, nispa (Colosenses 1:3). Cristianomasinkunatan nirqan: “Tukuy imaymana kaqkunamanta Señorninchis Jesucristoq sutinpi Dios Yayaman graciasta qollaychispuni”, nispa (Efesios 5:20). Huk kutipipas nirqanmi Jesuspa sutinpi ‘Dios Yayamanta’ mañakunankupaq (Colosenses 3:17).
Ñawpa tiempopi cristianokuna hinan ñoqanchispas Diosllamanta mañakunanchis. Chayta ruwaspan rikuchisun Jesusta munakusqanchista (Juan 14:15). Salmistan nirqan: “Señor Diosmi waqyakuspa mañakusqayta uyariwarqan, chaymi payta munakuni. Makillan uyariykamuwarqan, chaymi llapa kawsasqay p’unchaykunapi payta waqyakusaq”, nispa (Salmo 116:1, 2). Chay hinatan ñoqanchispas nisun Diosllamanta mañakusun chayqa.b
a Bibliaqa sut’itan yachachin Diospas Jesuspas mana huk runallachu kasqankuta. Chaymanta astawan yachayta munanki chayqa, ¿Imatapunin Biblia yachachin? libropi 4 capitulota maskhay, chaytaqa Jehová Diospa testigonkunan ruwan.
b Mañakusqanchista Dios uyariwananchispaqqa kamachikusqantan kasukunanchis. Astawan yachayta munanki chayqa, ¿Imatapunin Biblia yachachin? libropi 17 capitulota maskhay.