Hukkunata yanapasunchis ‘tukuy sonqo kasukunankupaq’
1. ¿Imatan Dios munan yupaychaqninkunamanta?
1 Jehová Diosta yupaychasqanchis chaskisqa kananpaqqa kasukunanchispuni (Deu. 12:28; 1 Ped. 1:14-16). Asllapi “payqa Diosta mana reqsiqkunatan, [...] allin willakuykunata mana kasukuqkunatawanmi muchuchinqa” (2 Tes. 1:8). ¿Imaynata yanapasunman hukkunata ‘tukuy sonqo kasukunankupaq’ Diospa simin yachachisqanta? (Rom. 6:17.)
2. ¿Imanaqtinmi yanapananchispuni runamasinchista iñiyninku astawan kallpachakunanpaq?
2 Yanapasun iñiyninkuta munakuyninkutapas wiñachinankupaq: Diospa qelqanpiqa, kasukuyqa iñiywanmi tupan. Apóstol Pablo rimaran Diospa kamachisqanmanta lluypas ‘iñispa kasukunankupaq’ (Rom. 16:26). Hebreos 11 capitulopi tarinchis askha iñispa kasukukkunamanta, yaqa llapa paykunamantataq willakuwanchis Jehová Diospa munayninman hina ruwasqankumanta (Heb. 11:7, 8, 17). Ichaqa, mana kasukuyqa mana iñiywanmi tupan (Juan 3:36; Heb. 3:18, 19). Kallpachakunanchis Diospa siminta allin yachachiq kananchispaq, chhaynapin runamasinchista yanapasun kasukuyman apaq iñiywan kanankupaq (2 Tim. 2:15; Sant. 2:14, 17).
3. a) ¿Imaynatan tupanku kasukuywan munakuywan? b) ¿Imaynata yanapasunman Bibliamanta yachachisqanchista Jehová Diosta munakunanpaq?
3 Tupallankutaqmi kasukuywan Dios munakuywanpas (Deu. 5:10; 11:1, 22; 30:16). 1 Juan 5:3 nin: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa. ¿Imaynatan yanapasunman Biblia yachachisqanchista chay munakuyta wiñachinanpaq? Yachachishaspanchis qhawashanalla imaynata yanapasunman Jehová Diospa kayninkunata astawan munakunanpaq. Willananchis hayk’atan Jehová Diosta munakunchis. Yanapananchis Jehová Dioswan amigo kanankupaq. Jehová Dios munakuyllan imamantapas lluyta kuyurichiwasun tukuy sonqo kasukunanchispaq (Mat. 22:37).
4. a) ¿Imanaqtinmi yachachinanchis ruwasqanchiskunawan? b) ¿Imatan ruwananchis kasukuq sonqoyoq kananchispaq?
4 Ruwasqanchiskunawan: Ruwayninchiskunawanmi hukkunata yanapasunman allin willakuykunata kasukunankupaqqa. Chaypaqqa, sapa p’unchay kallpachakunanchis “Yachaysapa [“kasukuq”, NM] sonqota” wiñachinanchispaq (1 Rey. 3:9; Pro. 4:23). ¿Imatan chaypaq ruwananchis? Sonqonchista espiritual ruwaykunawan hunt’achinanchis Bibliata estudiaspa, huñunakuykunamanpas rispa (Sal. 1:1, 2; Heb. 10:24, 25). Chaymantapas, Jehová Diosta yupaychaqkunawan purinanchis (Pro. 13:20). Serviciomanpas lloqsishanallanchispuni territoriopi kaqkunata sonqomanta yanapayta munaspa, Jehová Diosta mañakuspataq pusachikusun allin sonqoyoq kananchispaq (Sal. 86:11). Arí, ayqerikunanchis sonqonchis qhellichaqkunamanta, map’awan maqanakuywan ima q’ochukuymanta. Imakunachus Diosman asuychiwanchis, paywan amigo kayninchistapas kallpachan, chaykunatapuni ruwananchis (Sant. 4:7, 8).
5. ¿Imaynata saminchakushan kasukuqkunata?
5 Jehová Diosmi ñawpa pachapi llaqtanta munachiran saminchaykunata sichus paykuna siminta kasukunkuman chayqa (Deu. 28:1, 2). Chhaynallataqmi kunanpas, Jehová Diosqa saminchashanmi ‘kasukuqninkunata’ (Hech. 5:32). Chayrayku, hukkunata yanapasun tukuy sonqo kasukunankupaq, allin yachachiyninchiswan ruwasqanchiskunapiwan.