Predicanchis runakunata khuyapayaspa
1 Jesusmi repararan uyariqninkuna ‘mana michiqniyoq ovejakuna hina wikch’usqa, ch’eqechisqa’ kasqankuta (Mat. 9:36). Chay rayku, chay runakunaman, khuyay munakuywan Jehová Diospa kamachikuyninkunata yachachiran, sonqocharan, khuyapayaspataq qoran espiritualpi necesitasqankuta. Sichus ruwasqankunapi yuyaymanasun chayqa, yachasunmi pay hina yuyaykuyta khuyapayaytapas, chaytataq rikuchisun predicasqanchispi.
2 Yuyaymanasun imaynatan Jesús yanaparan payman asuykuq runakunata (Luc. 5:12, 13; 8:43-48). Payqa munakuywanmi yanaparan sumaqlla yanapana kaqkunata (Mar. 7:31-35). Repararanmi imayna sientekusqankuta, paykunapitaq interesakuran. Jesusqa manan runaq rikch’aynintachu qhawaran (Luc. 7:36-40). Payqa k’apaktapuni rikuchiran Diospa sumaq khuyapayakuyninta.
3 ‘Khuyapayaran’: Jesusqa manan predicaranchu ruwananta hunt’anan raykulla, aswanpas runakunaq imayna kasqanta ‘khuyapayaspanmi’ (Mar. 6:34). Chay hinallataqmi noqanchispas manan predicayllachu predicanchis, aswanpas runakunaq kawsaynin qespichisqa kanantapuni munanchis. Yachayta munanchis imakunan tanqashanman runaq imayna kutichisqanta. ¿Iman llakichishanman? ¿Llulla michiqninkunachu wikch’usqata hina hap’ishanman, laqhayaqpi hinataq purichishanmanpas? Cheqaqtapuni paykunapi interesakusun chayqa, munanqakupaschá allin willakuykuna uyariyta (2 Cor. 6:4, 6).
4 Khuyapayayqa sonqomanmi chayan. Huk ejemplota qhawasunchis. Kinsa killayoq wawachan wañusqanmanta huk warmi sinchi llakisqa tarikushaqtin iskay pananchiskuna punkunta takaykuran. Paytaq wasinman haykuchiran, pananchiskunaq ima rayku Dios ñak’ariyta hinallata qhawan chaymanta yachachisqankuta manan chhaynachu ninanpaq. Ichaqa unaymantaña chay warmi paykunamanta willakuran: “Khuyapayakuq sonqowanmi uyariwaranku llakikuyniy pisiyanankama. Chay rayku ripushaqtinkuña, kutimuwaychis, nirani”, nispa. Noqanchisri, ¿kallpachakushanchischu predicasqanchispi tarisqanchis runakunata khuyapayananchispaq?
5 Khuyapayakuq kaspaqa hukkunata sumaqtapuni sonqochasun. Chayta ruwaspaqa Jehová Diostan hatunchanchis, “payqa khuyapayakuq Yayan” (2 Cor. 1:3).