Imaynatan aypawaq espiritual metaykikunata
1. ¿Ima espiritual metakunata churakunku askha cristiano wayna-sipaskuna?
1 Waynallaraqchus kashanki chayqa, ima metatapas churakunki Jehová Diosta munakuspachá, lliw cristianokunaman Jesuspa ‘qhapaqsuyuta nawpaqta maskhaychis’ nisqantapas kasukuspa (Mat. 6:33). Yaqapaschá servicioykita yapayta munanki precursor kaspa otaq Reinomanta willanapaq maykunapin astawan llank’ana kashan chaykunaman rispa. Hukkunataq yuyaykushanku teqsimuyuntinpi Huñunakuy Wasikuna hatarichiypi llank’anankupaq, sucursalpi llank’anankupaq, otaq misionero kanankupaq. ¡May allinpuni chaykunata aypanankupaq yuyaykusqankuqa!
2. ¿Iman yanapasunkiman espiritual metaykikunata aypanaykipaq?
2 Metaykikunata aypanaykipaqqa qelqanaykin. 2004 watamanta 15 de julio La Atalayapi nin: “Imapas yuyaykusqanchisqa allinta takyan chaykunamanta rimaqtinchis. [...] Chay hinaqa, allinmi kanman ima metanchiskunata qelqay, imayna aypananchistapas”, nispa. Allinllataqmi kanman pisi tiempollapi aypana metakuna churakuyniyki, chaykunan yanapasunki maykama atisqaykita reparanaykipaq, yanapallasunkitaqmi qhepaman huk metaykikunatapas aypanaykipaq.
3. Willay ima pisi tiempollapi aypana metakuna yanapasunkiman bautizakunaykipaq.
3 Pisi tiempollapi aypana metakuna: Manaraqchus bautizasqa kanki chayqa, yuyaymanay imaraqmi ruwanayki kashanman chaypi. Yaqapaschá allintaraq entiendenayki kashan Bibliamanta qallariy yachachikuykunata. Chhayna kaqtinqa kallpachakuy Enseña nisqa librota allinta estudianaykipaq, llapan textokunata maskhaspa (1 Tim. 4:15). Kallpachakullaytaq Bibliata leenaykipaq Génesis libromanta Apocalipsis librokama, imayna Betelpi kaqkunapas Galaadpi estudiaqkunapas ruwanku hinata. Tukuspaykitaq wakmanta qallariy sapa p’unchay leenaykipaq programata ruwakuspayki (Sal. 1:2, 3). ¡Maytan espiritualpi wiñawaq chayta ruwaspaqa! Biblia leeyta, estudiaytapas qallarinaykipaq tukunaykipaqpas sonqomanta Diosta mañakuy, kallpachakuytaq yachasqaykiman hina hunt’anaykipaq (Sant. 1:25).
4. ¿Ima pisi tiempollapi aypana metakunata churakunman, Betelpi kayta otaq misionero kayta munaq cristiano?
4 ¿Bautizasqaña kanki chayqa ima metakunatawanmi churakuwaq? ¿Kallpachakuwaqraqchu aswan allinta predicanaykipaq? ¿Atiwaqchu Diospa Simin Qelqawan aswan allintaraq predicayta? (2 Tim. 2:15.) ¿Imaynatan predicasqaykita yapawaq? Metakunata churakuy pisi tiempollapi aypanaykipaq hina atinaykipaq hinapas, chhaynapin qhepaman huk metaykikunatapas aypallankitaq.
5. ¿Imaynata pisi tiempollapi aypana metakuna churakusqan huk waynata yanaparan Betelpi llank’ay munasqan hunt’akunanpaq?
5 Allinta ruwan: Huk wayna karan Tony sutiyoq, payqa 19 watanpi kashaspa Jehová Diospa testigonkunaq sucursalninta visitaran, kaq ratollataq Betelpi llank’ayta munaran. Ichaqa ñawpaqpi sinchi mana kasukuq kasqa, manaraqtaq Diosman qokusqaraqchu. Chaymi payqa allinta yuyaykuran Jehová Diospa munasqanman hina kawsananpaq, bautizakunanpaqpas. Chaykunata hunt’aspataq yuyaykuran precursor auxiliar kananpaq chaymantataq precursor regular kananpaq, hinan payqa almanaquepi qelqaran hayk’aq qallarinanpaq. Maytaraqchá kusikuran, precursor kashaqtin, Betelman invitaqtinku.
6. ¿Iman yanapasunki espiritual metaykikunata aypanaykipaq?
6 Qanpas espiritual metaykikunata aypawaqmi sichus Diospa Reinonta ñawpaqman churanki chayqa. Mañakuspa Jehová Diosman willakuy ‘lliw ruwanaykikunamanta’, kallpachakuytaq k’uchilla chaykunata aypanaykipaq (Pro. 16:3; 21:5).