Tapuykuna

◼ ¿Imayna p’achasqan rinanchis Jehová Diosta yupaychanapaq wasikunata watukuspa?

Teqsimuyuntinpi kashan Huñunakuna Wasikuna, Hatun Huñunakuykunata ruwanapaq Wasikuna, Betel wasikunapas, chay wasikunaqa Jehová Diosta yupaychanapaqmi. Kay wasikunaqa sumaq, limpio, allin qhawarisqa wasikunan, Satanaspa kamachisqan pachapiqa manan chhayna wasikuna kanchu. Chayrayku chay wasikunata watukunapaqqa Diospa kamachinkuna kasqanchista rikuchinanchis.

Cristianokunaqa imaymana ruwasqanchispin rikuchinchis ‘Diospa kamachinkuna kasqanchista’ allin yuyaywan p’achakusqanchispi imayna allichakusqanchispipas (2 Cor. 6:3, 4). Chaymantapas allin conductayoqmi kananchis. Maypiña tarikuspapas Jehová Diospa kamachinkuna hinapunin allin yuyaywan p’achakunanchis allichakunanchispas, astawanqa Nueva York suyupi kaq sucursalman otaq huk sucursalkunamanpas watukunanchispaq.

Organizados para hacer la voluntad de Jehová nisqa libro willashan imarayku cuerponchista mayllikunanchis, allin yuyaywan p’achakunanchis, sumaqta allichakunanchis predicacionman, huñunakuykunamanpas rinapaq, chaykunata willasqan qhepamanmi (139 paginapi, 1 parrafopi) nin: “Betel simiqa ‘Diospa Wasin’ ninanmi. Chhaynaqa, p’achakuyninchis conductanchispas kanan imayna Huñunakuy Wasiman Diosta yupaychanapaq rinchis chhayna”, nispa. Chayrayku qayllamantaña otaq karumantaña Betel wasita watukuq wayqe panakunaqa chay libroq nisqanman hina allin conductayoq kananku allin p’achasqataq rinanku. Chhaynapin rikuchinqaku chay wasita allinpaq qhawarisqankuta respetasqankutapas (Sal. 29:2).

P’achakuyninchispin rikuchinanchis ‘Diosta yupaychaqkuna’ kasqanchista (1 Tim. 2:10). Sichus sumaqta p’achakusun allichakusunpas chayqa, allinpaqmi runakuna qhawarinqaku Jehová Dios yupaychasqanchista. Ichaqa wakin wayqe pananchiskunan mana allin p’achasqa, otaq t’eqe p’achakunata churakuspa Betel wasita watukuq rinku. Cristianokunaqa manan hayk’aqpas chhaynataqa p’achakunanchischu. Chaymi kawsayninchispi ‘lliwta ruwananchis Diosta hatunchanapaq’ hina, chhaynapi rikuchisun Jehová Diosta mana kasukuq runakunamanta hukniray kasqanchista (Rom. 12:2; 1 Cor. 10:31).

Sichus Nueva York suyupi kaq sucursalkunata, huk sucursalkunatapas watukuyta munanchis otaq vacacionpi kashaspa chayqa, kaykunata tapukunanchis: “¿Chay wasita watukunaypaq hinachu p’achakushani allichakushanipas? ¿Allintachu rimanku yupaychasqay Diosmanta? ¿Phiñachinmanchu pillatapas imayna p’achakusqay?” nispa. Chhaynaqa, maypiña kaspapas imataña ruwaspapas p’achakuyninchiswan, allichakuyninchispiwan rikuchisunchis ‘Qespichiqninchis Diosmanta yachachikuy tukuypi sumaqpuni kasqanta’ (Tito 2:10).