Tapuykuna

◼ ¿Hanpichikusunmanchu Jehová Diospa testigonkuna wak religionpa hospitalninkunapi? ¿Rinkumanchu kuraq Testigokunapas wak religionpa umallisqan asilokunaman?

Askha religionkunan umallinku hospitalkunata kuraq runakunata uywanapaq wasikunatapas, ichaqa manan pantasqa yachachikuykunata yachachinankupaqchu (Apo. 18:2, 4). Yaqapaschá chaykunata qallarichiranku qolqeyoq kanankupaq. Wakin hospitalkunapiqa religionpa sutillanñan qhepan wakinpitaq chay religionpi kaqkuna llank’ashankuraq.

Jehová Diospa testigonkunaqa sapankankun akllakunanku sichus wak religionpa hospitalninkunata otaq kuraq runakunata uywanapaq wasikunata rinqakuchus icha manachus chayta. Wakintaqa conciencian mana hark’anmanchu, wakintataqmi ichaqa hark’anman (1 Tim. 1:5). Chayrayku chaykunamanta allinta yachasunchis chayman hina akllakunanchispaq.

Yaqapaschá, wak religionpa sutinta apaq hospitallla kanman llaqtanchispi. Kashanpaschá huk hospitalkuna, ichaqa wak religionpa hospitalninpi aswan allinta atiendenkuman. Yaqapaschá chay hospitalllapi kanman hanpichikunaykipaq maquinakuna otaq doctorniyki chay hospitalllapi hanpisunkiman. Otaq chay hospitalpi yawarta mana churaspalla hanpisunkichisman, hukkunapi ichaqa yawarta churayta munasunkichisman. Chaykunamanta yachaymi yanapasunki mayqen hospitalpi hanpichikunaykipaq.

Wak religionpa umallisqan hospitalta otaq kuraq runakunata uywanapaq wasikunata riqqa, chaykunapi allinta atiendechikunallanpaqchá rishan. Yaqapaschá religionpa qallarichisqan empresata hinalla qhawarin, hinaspapas ninpaschá: Chaypi atiendechikusqaymanta pagasqaywanqa manan religiontachu yanapakushani, nispa. Arí, atiendechikusqallanmantan pagashanman.

Cristianokunaqa allinta reparananku pantasqa religionpa ruwayninkunaman ama chhaqrukunanpaq. Nitaqmi pitapas chaypi llank’aqkunataqa otaq chayman hamuqkunataqa ninanchu “Padre” “Madre” nispaqa (Mat. 23:9). Wak religionpa hospitalninman rispaqa hanpichikunallapaqmi rina, kuraq runakunata uywanapaq wasita rispapas atiendechikunallapaq rina.

Chay hospitalman haykuq iñiqmasinchisqa reqsichikunanmi Jehová Diospa testigon kasqanta, ninantaq congregacionniymanta ancianokuna hamunqaku watukuwanankupaq nispa. Chhaynapin ancianokunaq yanapayninta chaskinqaku hospitalpi kanankukama (1 Tes. 5:14).

Kuraq runakunata uywanapaq wasikunapi kaq wayqe panakunataqa allinta yanapanan iñiq familiankuna, ancianokuna, llapa wayqe panakunapas, chhaynapi Jehová Diosta allinta yupaychanankupaq, astawanqa chayta ruwananku wak religionpa umallisqan wasipi kaqtin. Chay kuraq wayqe pananchiskunata chhaynata yanapasun chayqa anchatan kallpachasun, yanapasuntaq pantasqa religionpa ruwayninkunaman ama chhaqrukunankupaq.

Chaykunamanta yachasqanchismi sapankanchista yanapawasun mayqen hospitalpipas hanpichikunanchispaq otaq mayqen kuraq runakunata uywanapaq wasikunata rinapaqpas (Gál. 6:5).