Allin preparasqa risun Predicayta Yachanapaq Huñunakuyman
1. ¿Imaynatan Predicayta Yachanapaq Huñunakuy yanapawanchis? ¿Imatan chaypaq ruwana?
1 Predicayta Yachanapaq Huñunakuyqa Diospaq llank’ayninchista allinta hunt’ananchispaqmi yanapawanchis. Chaypin yachanchis allin willakuykuna imayna predicayta, runakuna imayna yachachiyta, hinallataq Diospa phiñakuynin p’unchaymanta imayna willaytapas (Mat. 28:20; Mar. 13:10; 2 Ped. 3:7). Chayraykun chay huñunakuypaq allinta preparakunanchis, kallpachakunanchistaq tapuykunata kutichinapaqpas.
2. ¿Imaynatan preparakusunman discursokunata uyarinapaq?
2 Discursokuna: Yaqa llapa discursokunapaqmi qelqasqa kashan maymantachus horqokunanmanta willakuy. Chaytan preparakuna, textokunatapas maskhana, chaymantapas tapukusunmanmi: “¿Imaynatan chay yachachikuykuna yanapawasunman predicacionpi?” nispa.
3. ¿Imaynatan preparakusunman uyariqkunata tapuspa ruway nisqa yachachikuypaq?
3 Uyariqkunata tapuspa ruway: Chayta ruwaqqa pisillatan qallariypi riman, chaymantataq uyariqkunawan parrafokunata t’aqwin, imaynan Qhawaq revistata estudiakun hinata; tukunanpaqpas manan nishutachu riman. ¿Imaynatan chaypaq llapanchis preparakusunman? Sapanka parrafopi allinnin rimaykunata marcasunman, chayman hinataq tapuykunatapas pisillapi kutichisunman.
4. ¿Imaynatan preparakusunman uyariqkunaq yanapayninwan ruway nisqa yachachikuypaq?
4 Uyariqkunaq yanapayninwan ruway: Chaytaqa discursota hinan ruwakun, mayninpin ichaqa uyariqkuna kutichinku wakin tapuykunata. Chaymi llapanchis allinta marcananchis parrafokunata chhaynapi tapuykunata kutichinanchispaq. Chay yachachikuyta aparichiqqa uyariqkunatan kallpachanqa allin yachachikuykunamanta willanankupaq.
5. ¿Imatan ruwananchis demostracionkuna allinninchispaq kananpaq?
5 Demostracionkuna: Huñunakuypin mayninpi demostracionkunata ruwakun, chayman hina predicashaspa otaq yachachishaspa ruwananchispaq. Chaykunatan ruwankuman umalliqkuna, allin predicaqkuna, precursorkuna ima. Manan demostracionta ruwaqkunallachu preparakunanku, llapanchismi preparakunanchis, chaypaqmi ñawpaqmanta yuyaymanasunman imaynata chay demostración ruwakunanpi. Chaymantapas ima qelqakunatachá munachikunqa demostracionpi chaytan apananchis huñunakuyman. Demostracionta qhawasqanchis qhepamantaq kallpachakunanchis predicasqanchis runakunapaq hina chayta ruwananchispaq, imayna rimasqanchisman hina ruwananchispaqwan. Chaymantapas familianchiswan Diosta hatunchananchis ch’isinta chay demostracionkunata hukmanta ruwasunman.
6. ¿Imaraykun allinta preparakunanchis Predicayta Yachanapaq Huñunakuypaq?
6 Sichus Predicayta Yachanapaq Huñunakuypaq allinta preparakusun, chaypipunitaq kayta munasun chayqa, aswan sumaqmi chay huñunakuy kanqa, astawantaqmi kallpachanakusunpas (Rom. 1:11, 12). Chhaynaqa tiempota hap’ispa preparakusunchis chay huñunakuypaq, chhaynapin aswan allin yachachisqa kasun Diospaq ruwananchista hunt’ananchispaq (2 Tim. 3:17).