Ñawsakunata yanapasun Jehová Diosmanta yachanankupaq
1. ¿Imaynatan Jesús rikuchirqan ñawsakunata khuyapayaq kasqanta?
1 Jesús Jericó llaqtamanta lloqsishaqtinmi iskay ñawsa runakuna kunkayoqta waqyakuspa nirqanku: “¡Davidpa churin Señor, khuyapayaykuwayku!”, nispa. Jesusqa yacharqanmi pisi tiempollamanta wañupunanta, chaymi payqa llakisqa kashanman karqan. Chaywanpas ñawsakunata waqyaspan hampirqan (Mat. 20:29-34). ¿Imaynatan ñoqanchispas Jesús hina khuyapayakuq kasunman?
2. ¿Imaynatan tupasqanchis ñawsa runakunaman predicasunman?
2 Yanapasun. Sichus callepi ñawsa runawan tupasun chayqa, ñawpaqta sutinchista willananchis hinamantaq yanapananchis. Mana allin tratasqataq ñawsa runakuna kanku chayqa manapaschá munanqachu yanapananchista. Ichaqa sumaqllata rimapayasun, sonqomanta paykunapi interesakusun chayqa manan manchakuwasunchu. Wakinqa pisillatapas rikunkuraqmi, chayta yachasun chayqa atisunmi imayna yanapayta. Yanapasqanchis qhepamanmi willasunman llapa runakunaman Bibliamanta yachachisqanchista. Hinamantaq leepusunman Salmo 146:8; Isaías 35:5, 6 textokunata. Braille nisqata leeyta yachan chayqa munachisunmanmi chay qelqanchiskunata. Sichus ñawsakunapaq hina computadoran kan chayqa nisunmanmi internetpi jw.org nisqaman haykunanpaq. Yachachisunmantaq qelqanchiskunata horqonanpaq (qhaway “¿Imaynatan ñawsakunata yanapana?” nisqa recuadrota).
3. ¿Imaynatan ñawsa runakunata maskhasunman?
3 Ñawsa runakunata maskhasun. Ñawsakunaqa manan munankuchu mana reqsisqakunawan rimayta, chaymi pisita tupanchis chhayna runakunawan. Chayraykun kallpachakunanchis kanqa paykunata maskhananchispaq (Mat. 10:11). Llank’asqanchispi otaq estudiasqanchispi kan ñawsakuna chayqa rimapayasun Diosmanta. Predicasqanchis territoriopi ñawsakunapaq escuela kaqtinqa, directormanmi munachisunman braille nisqapi qelqanchiskunata escuelanpi churananpaq. Yaqapaschá yachanchis reqsisqanchis runakunaq familianpi huk ñawsa kasqanta otaq yachanchis tiyasqanchis qayllapi ñawsakunata yanapaq huk organización kasqanta. Chhayna kaqtinqa ñawsakunata yanapaq runakunatan nisunman Jehová Diospa testigonkunaqa ñawsakunata yanapay munasqanchista, paykunapaq hina qelqanchiskuna uyarinapaq grabacionkunapas kasqanta. Rikuchiytaq Bibliawan ñawsa kayqa manaña hayk’aqpas kananta. Chaymantapas “¡Imachá ñoqamanta kanman!” nisqa videotan qhawachisunman jw.org nisqapi. Chay videon rimashan braille nisqapi Biblia imaynata huk ñawsa runata yanapasqanmanta. Sut’ita willasun imarayku ñawsakunawan rimay munasqanchista chayqa, faciltan chhayna runakunata tarisun.
4. ¿Imatan yachasunman Janet iñiqmasi imayna predicasqanmanta?
4 Janet sutiyoq ñawsa iñiqmasinchismi ñawsakunaq tiyasqan wasiman rirqan. Chaypin huk sipasta nirqan: “Kay pachapi kashaspan Jesusqa ñawsakunata qhawarichirqan, chaytan ruwarqan hamuq tiempopi imakunata ruwananta rikuchinanpaq”, nispa. Hinamanmi t’aqwirirqanku Apocalipsis 21:3, 4 textota, willarqantaq imaynata Diospa gobiernon chaykunata hunt’ananta. Musphaspa uyarisqan qhepamantaq chay sipasqa nirqan: “Manan hayk’aqpas chaytaqa huk ñawsa runaqa willawarqanchu. Yaqa llapa runakunan piensanku ñawsa kayqa Diospa castigon kasqanta”, nispa. Janet iñiqmasiqa internetnintan Imatapunin librota apachirqan, kunantaq semanapi iskay kutita Bibliata estudiashanku.
5. ¿Ima bendicionkunatan chaskinqaku yanapasqanchis ñawsakuna?
5 Ñoqanchisqa manan Jesús hinachu ñawsakunata qhawarichisun, ichaqa atisunmanmi yanapayta. Kay pachata kamachiq diosmi llapa runakunaq yuyayninta tutayachishan, chaytan ruwashallantaq ñawsakunawanpas. Chaymi kallpachakunanchis ñawsakunaman Bibliamanta yachachinanchispaq (2 Cor. 4:4). Jesusqa khuyapayakuq kasqanraykun ñawsakunata qhawarichirqan Jericó llaqtapi (Mat. 20:34). Ñoqanchispas paykunata khuyapayasun chayqa yanapasunmi Jehová Diosta reqsinankupaq, paymi llapa ñawsakunata qhawarichinqa wiñay kawsaytataq qonqa.