Papanchistan anchata munakunchis

1, 2. ¿Imanaqtinmi Jehová Dios llaqtanman pusamuwaranchis, imaynatan chayta ruwaran?

JEHOVÁ DIOSMI pusamuwaranchis familian ukhupi kananchispaq. Familianpi kaqkunaqa kikillankumantan prometekuranku payta servinankupaq, iñinkutaqmi Jesuspa sacrificakusqanpi. Llapanchispas kusisqan Diosta servinchis, yachanchismi imapaq kausasqanchista, suyakushanchistaq jamuq tiempopi wiñaypaq kausayta, kay allpapiña otaq janaq pachapiña tiyasun chaypas.

² Jehová Diosqa munakuwasqanchisraykun jatun sacrificiota ruwaran familian ukhupi kananchispaq (Juan 3:16). Biblian willan preciowan rantiwasqanchista (1 Cor. 6:20). Jesuspa sacrificakusqanraykun Jehová Dioswan allinpi kayta atinchis. Jinaspa tukuy atiyniyoq Diosninchista “papáy” nispa niyta atinchis. Ñaupaq yachachikuypi yachasqanchis jina manan pipas pay jina munakuq taytaqa kanchu.

3. ¿Ima tapuykunatan ruwakusunman? (Qhaway “¿Jehová Dios noqata qhawariwanmanchu?” nisqata.)

³ Salmota qelqaq jinapaschá nisunman: “¿Imatan Señor Diosman kutichipusaq tukuy allinkunata ruwapuwasqanmanta”, nispa? (Sal. 116:12). Manan jayk’aqpas kutichiyta atisunmanchu, ichaqa munakuwasqanchisraykun noqanchispas payta munakunchis. Apóstol Juanmi qelqaran: “Noqanchisqa Diosta munakunchis ñaupaqtaraq pay munakuwasqanchisraykun”, nispa (1 Juan 4:19). Chhaynaqa, ¿imakunata ruwaspan rikuchisunman papanchista munakusqanchista?

JEHOVÁ DIOSPA QAYLLALLANPI KASUN

4. Santiago 4:8 textopi nisqanman jina, ¿imaraykun kallpachakunanchis Jehová Diospa amigon kananchispaq?

⁴ Jehová Diosqa munanmi paypa amigon kananchista sapa kutilla paywan rimananchistapas (leey Santiago 4:8). Diosqa uyariwanchispunin chaymi munan mañakushanallanchista (Rom. 12:12). Diosqa manan sayk’usqachu tarikun uyariwananchispaq. Noqanchistaq Diosta uyarinchis Bibliata qelqanchiskunata leespa, qelqanchiskunan yanapawanchis Bibliata allinta entiendenanchispaq. Chaymantapas Diostan uyarinchis juñunakuykunapi tukuy yuyaywan uyarispa. Tayta-mamakuna sapa kutilla wawankuwan rimaqtinkuqa aswan sumaqtan kausanku, noqanchispas Dioswan sapa kutilla rimaspan aswan allinta paywan kausanchis.

5. ¿Imatan ruwananchis mañakuyninchis Diospa sonqonpaq jina kananpaq?

⁵ ¿Imaynan kashan Jehová Diosman mañakusqanchis? Diosqa munanmi sonqomanta mañakunanchista (Sal. 62:8). Chaymi tapukunanchis: “¿Diosman mañakusqay celularpi sapa kuti kaq mensajeta apachisqay jinachu? Icha, ¿munasqa amigoyman sonqomanta qelqasqay carta jinachu?”, nispa. Noqanchisqa munakunchismi Jehová Diosta, munanchistaqmi paypa amigon kayta. Chaypaqmi ichaqa sapa kutilla payman willakunanchis imachus llakichiwasqanchista imachus kusichiwasqanchistapas. Manan iskayananchischu Diospa yanapayninta mañakuymantaqa.

6. ¿Imatan ruwananchis Jehová Diospa amigon kashanallanchispaq?

⁶ Jehová Diospa amigon kashanallanchispaqqa agradecekuqmi kananchis. Salmota qelqaq jinan kananchis, paymi niran: “Diosnilláy Señor Dios, askhallañan musphana ruwasqaykikunaqa, askhallañan yuyarikuwasqaykikunaqa. ¡Manan pipas qan jinaqa kanchu! Chaykunamanta rimariyman chaypas, manan yupayta atiymanchu”, nispa (Sal. 40:5). Jehová Diosman agradecekuq kasqanchistaqa rikuchinchis rimasqanchiswan ruwasqanchiswan. Yaqa llapa runakunan Diosta mana agradecekunkuchu imaymana ruwasqanmanta, agradecekuq kaspan ichaqa mana paykuna jinachu kasun. Bibliaqa willaranñan tukukuy p’unchaypi runakuna mana agradecekuq kanankuta (2 Tim. 3:1, 2). Manan jayk’aqpas paykuna jinaqa kananchischu.

7. ¿Imatan Jehová Dios munan ruwananchista? ¿Imaraykun munan chayta ruwananchista?

⁷ Tayta-mamakunaqa manan munankuchu wawankuna maqanakuspa kausanankuta. Jehová Diospas chaytan munan wawankunapaq. Hermanonchiskunawan munanakusqanchismi rikuchin cheqaq cristianokuna kasqanchista (Juan 13:35). Diosta serviqmi niran: “¡Mayna allinmi, ancha sumaqmi wayqe-panakunaq juj nisqalla kausayninkuqa!”, nispa (Sal. 133:1). Noqanchispas chay salmista jinan piensanchis. Hermanonchiskunata munakuspan rikuchishanchis Diosta munakusqanchista (1 Juan 4:20). May sumaqmi hermanonchiskunawan sumaqta qhawarinakusqanchis khuyapayanakusqanchispas (Efes. 4:32).

DIOS MUNAKUSQANCHISTA RIKUCHISUN KASUKUQ KASPA

8. 1 Juan 5:3 textopi nisqanman jina, ¿imaraykun Jehová Diosta astawan kasukunchis?

⁸ Jehová Diosqa munanmi wawakuna tayta-mamankuta kasukunankuta, chay jinallataqmi Diosqa munan payta kasukunanchista (Efes. 6:1). Diostaqa kasukunchis kamaqninchis, kausayta qowaqninchis, munakuq Papanchis kasqanrayku. Ichaqa astawanqa kasukunchis munakusqanchisraykun (leey 1 Juan 5:3). Chaywanpas Diosqa manan obligawanchischu payta kasukunanchispaq. Diosmi kamawaranchis kikillanchismanta imatapas decidinanchispaq, chaymi kusikun payta munakusqanchisrayku kasukuqtinchis.

9, 10. ¿Imaraykun Diospa kamachikuyninkunata yachananchis? ¿Imaraykun chayman jina kausananchis?

⁹ Tayta-mamakunaqa manan munankuchu wawanku sufrinankuta. Chaymi kamachikuykunata churanku. Chay kamachikuykunata kasukuspan wawakuna rikuchishanku tayta-mamankupi confiasqankuta respetasqankutapas. Noqanchispas yachananchismi Diospa kamachikuyninkunata, chayman jinataq kausananchis. Chayta ruwaspan rikuchishanchis Jehová Diosta munakusqanchista respetasqanchistapas. Jinaspapas payta kasukuyqa allinninchispaqmi (Is. 48:17, 18). Jehová Diosta mana kasukuqkunan ichaqa mana allinkunapi tarikunku (Gál. 6:7, 8).

¹⁰ Jehová Diospa munasqanman jina kausaspaqa cuerponchista yuyayninchistan cuidanchis, Dioswantaq allinpi kanchis. Jehová Diosqa yachanmi imachus noqanchispaq allin kasqanta. Estados Unidosmanta hermananchis Aurora niran: “Jehová Diosta kasukuyqa allinninchispaqpunin”, nispa. Paypa nisqanqa cheqaqpunin, chaymi tapukunanchis: “¿Imaynatan yanapawaran Jehová Diospa kamachikuyninkunata kasukuy?”, nispa.

11. ¿Imata ruwananchispaqmi yanapawasun Diosmanta mañakuy?

¹¹ Diosmanta mañakuyqa yanapawanchismi sasaña kaqtinpas kasukuq kananchispaq. Mayninpiqa juchayoq kasqanchisraykun sasa kanman Diosta kasukuyqa. Ichaqa kallpachakushanallanchismi kasukuq kananchispaq. Salmota qelqaq jinan mañakunanchis: “Qanta usqhaylla kasukuq sonqoyoqta ruwaway”, nispa (Sal. 51:12). Denise sutiyoq precursoran nin: “Jehová Diosta kasukuy sasa kaqtinmi, kallpanta mañakuni allin kaqta ruwanaypaq”, nispa. Jehová Diosqa uyariwasunpunin chayta mañakuqtinchisqa (Luc. 11:9-13).

JUJKUNATA YANAPASUN PAPANCHISTA MUNAKUNANKUPAQ

12. ¿Imata ruwananchispaqmi Efesios 5:1 texto kamachiwanchis?

¹² (Leey Efesios 5:1). Jehová Diospa munasqa wawankuna kasqanchisraykun tukuy atisqanchista ruwananchis pay jina kananchispaq. Jehová Dios jinan sumaq sonqo, munakuq, jujkunata perdonaq kananchis. Diosta mana reqsiq runakunan allin portakusqanchista rikuspa Diosta reqsiyta munankuman (1 Ped. 2:12). Tayta-mamakunaqa kallpachakunankun wawankuta Diospa munasqanman jina uywanankupaq. Chayta ruwaqtinkuqa yaqapaschá paykunapas munakuq Papanchispa amigon kayta munankuman.

13. ¿Imapin piensananchis ama manchakuspa Jehová Diosmanta jujkunaman willananchispaq?

¹³ Yaqa llapa wawakunan taytankumanta allinta rimanku. Chay jinallataqmi noqanchispas janaq pacha Papanchismanta jujkunaman willananchis. Rey David jinan sientekunchis, paymi niran: “Noqaqa Señor Dioswanmi anchata kusikuni”, nispa (Sal. 34:2). Wakinninchismi ichaqa manchakusunman jujkunaman Diosninchismanta willayta. ¿Iman yanapawasunman ama manchakunanchispaq? Diosqa kusikunmi paymanta willaqtinchis, jinaspapas uyariwaqninchiskunaq allinninpaqmi kanqa, chaypin piensananchis. Diosmi yanapawasun mana manchakuq kananchispaq. Imaynan ñaupaq tiempopi cristianokunata yanaparan chay jinatan noqanchistapas yanapawasun (1 Tes. 2:2).

14. ¿Imaraykun allinpuni Diosmanta runakunaman willay?

¹⁴ Jehová Diosqa manan pi runamanpas sayapakunchu. Chaymi payqa kusikun maymantaña kaqtinkupas jujkunata munakuqtinchis (Hech. 10:34, 35). Jujkunata munakusqanchistan rikuchinchis Diosmanta paykunaman willaspa (Mat. 28:19, 20). ¿Imaraykun chayta ruway allinpuni? Diosmanta uyarikuqkunaqa aswan allintan kausanku, jinaspapas wiñay kausaytan suyakushanku (1 Tim. 4:16).

MUNAKUQ PAPANCHISTA MUNAKUSPAQA KUSISQAN KAUSASUN

15, 16. ¿Imaraykun kusisqa kausanchis?

¹⁵ Jehová Diosqa munakuq papanchismi, jinaspapas munanmi familian kusisqa kananta (Is. 65:14). Sasachakuykunapiña tarikuspapas kusisqan kausanchis. Manan iskayanchischu Papanchis anchata munakuwasqanchismanta. Allintan yachanchis Bibliaq yachachisqanta (Jer. 15:16). Diospa llaqtanpitaq kashanchis, Jehová Diostan munakunchis, kasukunchistaqmi kamachikuyninkunata munanakuspataq kausanchis (Sal. 106:4, 5).

¹⁶ Chaymantapas kusisqan kausanchis jamuq tiempopi sumaq kausayta suyakusqanchisrayku. Pisi tiempollamantan Jehová Diosqa millay runakunata chinkachipunqa, jinaspa paypa gobiernon kay pachata paraisoman tukuchinqa. Chaymantapas wañupuqkunan kausarimpunqaku jinaspa amigonkunawan juñunakapunqaku (Juan 5:28, 29). Anchatan chaykunawanqa kusikunchis ¿riki? Astawanqa janaq pachapi tiyaqkuna kay pachapi tiyaqkunapas llapallankun munakuq Papanchista jatunchanqaku adoranqakupas.