¡May allinpunin Diosman qayllaykuyqa!

1, 2. a) ¿Imatan ruwana allin amigota tarinapaq? b) ¿Imakunamantan kaypi yachasunchis?

KANCHU juj ancha munasqa amigoyki. Kan chayqa yuyariy imaynatas paywan reqsinakurqanki chayta. Payta reqsinaykipaqqa yaqapaschá paywan tiempota pasarqanki, chhaynapitaq yacharqanki imaynas pay imas gustan imas mana gustanchu chayta. Wakin ruwaykunapiqa pay jina kaytapaschá munarqanki. Paywanqa pisi-pisimantachá allin amigontin munanasqa amigontin kapurqankichis.

² Piwanpas chhayna amigontin kayqa tiempopaq kallpapaq iman. Chhaynan Jehová Dioswan amigo kaypas. Chaymi kaypi yachasunchis imaynatas payman astawan qayllaykusunman chayta, imaraykus chayqa allinpuni kanman chaytapas. Ñaupaqtaqa yachasunchis imaraykus Jehová Diosman qayllaykuy allinpuni chaytan.

3. ¿Imaraykun imaynas Diosman qayllaykuyqa allinpuni chaypi piensananchis? Juj ejemplota willay.

³ Imaymanan razón kashan Jehová Diosman qayllaykunapaqqa, chaypiqa allintan piensananchis (Sal. 63:​6-8). ¿Imarayku? Chaypaq piensasunchis kaypi: Runakunaqa yachankun imaynas allin mijuna mijuyqa, unu tomaypas, ejercicio ruwaypas, allinta puñuypas allinpuni chayta. Chaywanpas yaqa llapa runakunapas manan chaytaqa ruwankuchu, chhaynapin mayninqa onqoyta ima tarinku. Ichaqa sichus sapa kutilla piensankuman imaynas chayta ruwayqa allinpuni chaypi chayqa, ruwankumanmi chaykunata. Chhaynan Jehová Diosta serviypas. Llapanchismi yachanchis imaynas payta serviyqa allinpuni chayta ¿riki? Ichaqa sichus sapa kutilla piensasun imakunapis allin kanman payman qayllaykuy chaykunapi chayqa, astawanmi payman asuykuyta munasunchis (Sal. 119:​27-30).

4. ¿Imanirqanmi Salmos takita qelqaq runa Salmos 73:28 versiculopi?

⁴ (Leey Salmos 73:28). Salmos 73 capitulota qelqaq runaqa Leví ayllumantan karqan, Diospa wasinpi música tocaqtaqmi karqanpas. Payqa unayñachá Jehová Diosta tukuy sonqowan servisharqan, chaywanpas pisiparqanmi. Chhaynapin reparakurqan imaynas astawanraq Jehová Diosman qayllaykunan karqan chayta. Chaymantapas payqa munarqan imaynas Jehová Dioswan amigontin kayqa allinpuni chayta jujkunapas yachanankutan. ¿Imakunapin allin kanman Dioswan amigontin kay? Qatiqpi wakinmanta yachasunchis.

DIOSMAN QAYLLAYKUSPAQA KUSISQAN KASUN

5. a) ¿Imaraykun nisunman “Jehová Diosman qayllaykuspaqa kusisqan kasunchis” nispa? b) ¿Imaynatan yanaparqasunki Jehová Diospa yachayninta chaskiy? (Proverbios 2:​6-16).

⁵ Jehová Diosman astawan qayllaykusun chayqa, paypa ladonpi kasunchis chayqa aswan kusisqan kasunchis (Sal. 65:4). ¿Imaraykun chayta ninchis? Imaymanan razón kan chayta ninapaq. Bibliapi yuyaychasqanman jina imatapas ruwanchis chayqa allinmi imapas lloqsiwanchis ¿riki? Paypa kamachikusqanta kasukuspaqa manan ima juchamanpas faciltaqa urmanchischu (leey Proverbios 2:​6-16). Chaychá Bibliapiqa nin: “May kusisqan yachayta tariq runaqa, may kusisqan allin reparayta yachaq runaqa”, nispa (Prov. 3:13).

6. ¿Imaraykun Salmos 73 capitulota qelqaq runa sinchi llakisqa kasharqan?

⁶ Ichaqa, ¿nisunmanchu “Jehová Diospa Testigonkunaqa manan jayk’aqpas llakikunqakuchu”, nispa? Manan. Salmos 73 capitulota qelqaq runapas juj kutinqa sinchi llakisqan kasharqan. Imakunachus pasasqanta rikuspan payqa piensarqan llapa chaykuna injusticia kananpaq. Paypa qhawarinanpaqqa Diosta mana serviq runakunan munayta kausasharqanku. Jinan payqa envidiakurqan imaraq. Qhawarinanpaqqa millay runakunan qhapaq qhali kasharqanku. Manas ima llakikuypas paykunapaqqa kasharqanchu. Ichaqa manan chhaynachu karqan (Sal. 73:​3-7, 12). Chay Salmos takita qelqaqqa sonqo nanasqan kasharqan. Jinan Jehová Dios serviytapas mana valeqpaq jina qhawaripusharqan. Sinchi llakisqan nirqan: “Chhaynaqa, yanqapaqchá riki ch’uya sonqo karqani, yanqapaqchá riki mana juchayoq kasqayta rikuchinaypaqpas makiyta maqchikurqani”, nispa (Sal. 73:13).

7. ¿Imatan ruwananchis llakisqa kashaspa jujmanta kusisqa kananchispaq? (Qhaway tapanpi kaq dibujota).

⁷ Chay Salmos librota qelqaq runaqa manan jinallachu karqan. Aswanmi Diospa ch’uya wasinman rispa chayman jaykurqan. Chaypin Jehová Diosqa allinta payta yuyayman kutichirqan (Sal. 73:​17-19). Jehová Diosqa allintan yachan jayk’aqsi llakisqa kashanchis chayta, imas llakichiwashanchis chaytapas. Chaymi paypa yanapaynintaqa mañakunanchispuni. Payqa palabran Bibliawan iñiqmasikunawan iman yanapawasunchis. Chay yanapaykunataqa sumaqtan chaskikunanchis. Chhaynapin llakisqaña kasun chaypas kallpata jap’isun ñaupaqllaman rinanchispaq. May sinchi llakisqaña kashasunman chaypas Jehová Diosqa yanapawasunpunin kallpachawasunpunin (Sal. 94:19).a

DIOSMAN QAYLLAYKUSPAQA SONQOPAS SONQON KAUSASUN

8. ¿Imakunapin allinninchispaq kallantaq Diosman qayllaykuy?

⁸ Diosman qayllaykusun chayqa, manan yanqa kausayllachu kausasunchis. Allintan yachasun imaraykus kay vida kan chayta. Chaymantapas Diosman qayllaykusun chayqa, allintan yachasun imaynas jamuq tiempoman kausay kanqa chayta (Jer. 29:11). Qatiqpi sapankamanta allinta yachasunchis.

9. ¿Imaraykun nisunman “Diosta servispaqa manan yanqa kausayllachu kausanchis” nispa?

⁹ Jehová Diosman qayllaykuspaqa manan yanqa kausayllachu kausasunchis. ¿Imaynataq chayri? Chaypaq piensasun kay tiempo runakunapi. Kay tiempopi runakunaqa manan Diospi creenkuchu, “manan Diosqa kanchu”, ninkun. Yanqa kausayllan paykunaqa kausakunku, “qhepamanqa chinkapunqan runakunaqa” nispan ninku. Diosta serviqkunan ichaqa mana chhaynatachu piensanchis. Aswanmi noqanchisqa allinta yachanchis imaynas chayqa cheqaqpuni chayta, imaynas “payta tukuy sonqowan maskhaqkunamanpas premiota qonqa” chayta (Heb. 11:6). Chaymantapas Diosqa payta adorayta munaqtan kamawasqanchis. Chaymi payta adoraspa noqanchisqa kusisqa kanchis, sumaqtan kausanchispas (Deut. 10:​12, 13).

10. Salmos 37:29 textopi nisqanman jina, ¿imatan chaskinqaku Jehová Diospi confiaqkuna?

¹⁰ Chaymantapas yaqa llapa runakunapas llank’anallamanmi masta tiempota qonku. Wawanku uywayman, kuraq kaspa imayna kanankupaq qolqeta juñuyman imallan qokunku. Diostaqa manan paykunaqa reparankupaschu. Noqanchis Jehová Diosta serviqkunan ichaqa payllapi tukuy sonqo confianchis (Sal. 25:​3-5; 1 Tim. 6:17). Yachasqanchis jinapas payqa junt’anqapunin llapa ima rimasqantapas. Arí, jamuq tiempopiqa munay kausaytan payqa qowasun. Chaypin wiñay wiñaypaq payllata servisunchis (leey Salmos 37:29).

11. ¿Imakunapin allin kallantaq Diosman qayllaykuy? ¿Imaynan Dios kanqa payman qayllaykuqtinchis?

¹¹ Jehová Diosman qayllaykuyqa imaymanapipunin allin. Payman qayllaykuq runakunaqa imapiña juchallikurqanku chaypas perdonasqan kanqaku (Isa. 1:18). Chhaynataq chayqa, manañan pipas imamantapas juchachakunqañachu, manañan sonqon nanasqachu purinqa (Sal. 32:​1-5). Chaymantapas Diosman qayllaykuspaqa paypa sonqontan kusichisun; paypa sonqonta kusichispaqa noqanchispas kusikusunmi (Prov. 23:15). Diosta servisqaykimantapachaqa imaymana bendiciontachá chaskirqanki. Ichaqa, ¿imatan ruwasunman astawanraq payman qayllaykunanchispaq?

¿IMATAN RUWANA ASTAWANRAQ DIOSMAN QAYLLAYKUNAPAQ?

12. ¿Imakunatan ruwana Jehová Diosman astawan qayllaykunapaq?

¹² Ñachus bautizasqaña kashanki chayqa, ñachá Jehová Diospa testigonña kanki. Chaypaqqa imaymanatachá Diosmantapas Jesucristomantapas yacharqanki. Arrepientekurqankichá juchaykikunamantapas, Diospichá iñiyta qallarirqanki. Paypa munayninman jinataqchá kausaytapas qallarirqanki. Chhaynataq chayqa paypa qayllanpiñan kashanki. Ichaqa, Diosman astawan qayllaykunapaqqa, reqsishanallan paytaqa (Col. 2:6).

13. ¿Imakunatan ruwananchis astawanraq Jehová Diosman qayllaykunanchispaq?

¹³ ¿Imakunatan ruwana astawanraq Jehová Diosman qayllaykunapaq? 1) Sapa kutillanmi Bibliata leena, estudiana ima. Chaymantapas manan imachus yachasqallanchiswanchu contentakunanchis, astawanraqmi paymantaqa yachananchis. Allintan entiendenanchis imas paypa munaynin chayta, chayman jinataqmi kausananchispas (Efes. 5:​15-17). 2) Tukuy atisqanchistan kallpachakunanchis iñiypi astawan wiñananchispaq. Chaypaqqa Jehová Diospa tukuy ima ruwasqanpin allinta piensananchis. 3) Diospa cheqnikusqan ruwaykunatan cheqnikunanchis, manan juñukunanchischu chay mana allinkunata ruwaq runakunawanpas (Sal. 1:1; 101:3).

14. ¿Imatan ruwananchis sapa p’unchaypas Diospa sonqonpaq jina imatapas ruwananchispaq? (1 Corintios 10:31; qhaway kay parrafopaq fotokunata).

¹⁴ (Leey 1 Corintios 10:31). Noqanchisqa tukuy atisqanchistapunin kallpachakunanchis Diospa sonqonta kusichinanchispaq. Chayqa manan predicacionman riyllachu, ni juñunakuymanpas mana faltakuyllachu. Aswanpas sapa p’unchay tukuy ima ruwasqanchismi paypa sonqonpaq jina kanan. Yachasqanchis jina, Jehová Diosqa munan kamachin runakuna honrado kanankuta, mana maqllakuspa tukuy imatapas qoykunankuta iman; chaykunapipas kallpachakunanchismi (2 Cor. 8:21; 9:7). Chaymantapas paytaq vidata qowanchis chayqa, kay vidanchista valorananchistan munan. ¿Imaynatan chayta ruwasunman? Manan comuntachu imatapas mijunanchis ni ujananchispas, allintan cuerponchistapas cuidakunanchis. Chayta ruwaspaqa astawanmi payman qayllaykusun. Kallpachakusun Diospa sonqonta kusichinanchispaq chayqa, jatunña juch’uyña chay ruwasqanchis kanqa chaypas payqa astawanmi munakuwasunchis (Luc. 16:10).

15. ¿Jujkunata imayna qhawarinanchistan Jehová Dios munan?

¹⁵ Jehová Diosqa sumaqtan qhawarin chanin runakunatapas mana chanin runakunatapas (Mat. 5:45). Payqa munan noqanchispas pay jina kananchistan. Chaypaqqa manan pimantapas mana allintaqa rimananchischu, manan jujkunawan churanakuspachu purinanchis, aswanpas llapa runapaqmi sumaq sonqo kananchis (Tito 3:2). Chaymantapas noqanchisqa manan mana iñiqkunamanta aswan allinpaqchu qhawarikunanchis, nitaq imapas yachaqchu tukunanchis (2 Tim. 2:​23-25). Llapa runatapas respetowanpunin qhawarinanchis, chayta ruwasun chayqa astawanmi Jehová Diosman qayllaykusunchis.

LLAKIPI KASPAQA ASTAWANMI DIOSMANQA QAYLLAYKUNANCHIS

16. ¿Imaynan tarikurqan juj kutin Salmos 73 capitulota qelqaq runa?

¹⁶ Jayk’aqllapas sinchi llakipi tarikusun ¿chayri? Jehová Diosqa manapas noqanchiswanchu kashanman jinata qhawarikusunman ¿chayri? Chhaynapi tarikuspaqa Salmos 73 capitulota qelqaqpi piensasun. Paymi nirqan: “Yaqallan mana allin ñanman jaykurqani, yaqallan chakiykunapas llusk’arqan”, nispa (Sal. 73:2). ¿Imaraykun chay pasanman karqan? Paymi nirqan “sonqoyqa may nanasqan”, “mana yuyayniyoqmi karqani” “ñaupaykipiqa uywa jinan kasharqani”, nispa (Sal. 73:​21, 22). ¿“Juchasapa runataq kani chayqa, pantallanitaq imapipas chayqa, manan valenichu noqaqa, Dios munakuwanmanchus” nispachu pay chhaynata piensanman karqan? Yaqapaschá.

17. a) ¿Imatan Salmos 73 capitulota qelqaq runa ruwarqan sinchi llakipi tarikuspa? b) ¿Imatan yachasunman imachus paywan pasarqan chaymanta? (Qhaway kay parrafopaq fotokunata).

¹⁷ Dios manaña qhawarinanpaq piensarqan chayqa, manan chay piensasqanqa unaypaqchu karqan. Nishu llakipi tarikuspasuná payqa astawan Diosman qayllaykunman karqan. ¿Imaraykun chayta ninchis? Pay kikinmi nirqan: “Kunanmi ichaqa qanllawan kashani, paña makiymantan qaqata jap’ishawanki. Yuyaychayniykiwanmi pusashawanki, chaymantataq jatunchasqa kayman apawanki”, nispa (Sal. 73:​23, 24). Noqanchispas chaytan ruwananchis. Sinchi llakisqachus tarikushanchis, manataq imatapas ruwayta atishanchischu chayqa, chay ratukunan astawanraq Jehová Diosman qayllaykunanchis. Paymi kallpata qowasun, paymi sonqonchista tiyaykachinqa (Sal. 73:26; 94:18). Ichaqa, ¿imaynapipas allin ñanmanta lloqsirusunman chayri? Chhaynapi tarikuspapas kutimunanchismi Jehová Diosmanqa, payqa liston kashan juchanchista perdonawananchispaq (Sal. 86:5). Chhaynaqa sinchi llakipi tarikushanchis chayqa, ima juchamanpas urmaranchis chayqa, chay ratukunapi astawanraq Diosninchis Jehová Diosman qayllaykusun (Sal. 103:​13, 14).

DIOSTAQA MAYKAMAPAS REQSILLASUNMANMI

18. ¿Imaraykun nisunman “Jehová Diosmanta yachayqa mana tukurikuqmi” nispa?

¹⁸ Jehová Diostaqa maykamapas reqsillasunmanmi, paymanta yachayqa mana tukurikuqmi kashan. Bibliaq nisqan jina, paypa yachayninpas, yuyayninpas ñanninkunapas mana tukurikuqmi. Manan pipas llapantapuniqa entiendenmanchu imachus ruwasqankunataqa (Rom. 11:33).

19. Chay Salmos textokunapi nisqan jina, ¿imamantan mana iskayananchischu?

¹⁹ Salmos 79:13 nin: “Llaqtayki runakunaqa wiñaypaqmi “gracias” nisaykiku, pastoykipi mijuqkunaqa wiñaypaqmi graciasta qosaykiku, watan-watanmi qanpaq jatunchay takikunata takisaqku”, nispa. Chhaynaqa, amapuni iskayaychu. Tukuy atisqaykita kallpachakunki Jehová Diosman astawan qayllaykunaykipaq chayqa bendecisunkin payqa. Chhaynapin qanpas ninki: “Diosmi sonqoytaqa kallpachan, paymi pakakunay qaqaqa, paymi wiñay-wiñaypaq herenciayqa”, nispa (Sal. 73:26).