¿Imaraykun Diospa sutin ancha importante Jesuspaq?

1, 2. a) ¿Imatan Jesús ruwarqan manaraq wañupushaspa? b) ¿Imakunamantan kaypi yachasunchis?

33 WATAPIN 14 nisán killapi Jesusqa apostolninkunawan kuska juj wasipi juñunasqa kasharqan, altos patapin paykunaqa kasharqanku. Pisillañan faltasharqan Jesús traicionasqa kananpaq, juzgasqa kananpaq, imaymanata nak’arinanpaqwan. Chay p’unchay ch’isi cenayta tukusqanku qhepamanmi Jesusqa munayta qatikuqninkunata kallpacharqan. Chay wasimanta manaraq lloqsishaspankutaq tukuy sonqowan Jehová Diosmanta mañakurqan. Chay mañakusqanqa Juan 17 capitulopin qelqasqa kashan.

² ¿Iman chay ratukunapi Jesusta llakichishanman karqan? ¿Iman paypaq aswan importante kanman karqan kay pachapi kasqan watakunapi? Chay mañakusqanpin chaykuna reparakun, chaytan astawan kaypi yachasunchis.

“SUTIYKITAN REQSICHINIÑA”

3. ¿Imanirqanmi Jesús Diospa sutinmanta, imaninantan chaywan nisharqan? (Juan 17:​6, 26).

³ Mañakushaspan Jesusqa Jehová Diosta nirqan: “Kay pachamanta qowasqayki runakunamanmi sutiykita reqsichiniña”, nispa. Chaytaqa iskay kutikaman nirqan, chhaynapin rikuchirqan may importantes chay paypaq karqan chayta (leey Juan 17:​6, 26). Ichaqa, ¿Diospa sutin Jehová kasqantachu pay qatikuqninkunaman willanman karqan? ¿Chaymantachu rimashanman karqan? Manan. Payta qatikuq runakunaqa judío runakunataq karqanku chayqa yacharankuñan Diospa sutintaqa. Chhaynaqa, ¿imamantan rimashanman karqan? Jesusqa allintan runakunaman yachachirqan imayna Dioschus Jehová Dios chayta. Willarqanmi imakunatas munan, imakunatas ruwan, munakuqchus manachus chaykunatapas, chaymantan payqa rimasharqan. Jesusllan chaytaqa ruwayta atinman karqan, manan pipas pay jinaqa Jehová Diostaqa reqsirqanchu.

4, 5. a) ¿Sutinta yachaspallachu pitapas “reqsinin” nisunman? Juj ejemplota Willay. b) ¿Imaynatan Jesusta qatikuqkuna Jehová Diosta allinta reqsirqanku?

⁴ Chayta allinta entiendenapaq kaypi piensasun: Iñiq t’aqapis juj umalliqta reqsiwaq, payqa doctorsi kanman unayñas paytaqa reqsiwaq. Ichaqa juj p’unchaysi urgente hospitalman apasunkikuman, chay hospitalpis kay hermano llank’anman, paysi operasunkiman chhaynapis wañuymanta librasunkiman. Chhaynataq chayqa astawanmi kunanqa payta munakuwaq ¿riki? Paypa sutinta uyarispaqa yuyariwaqchá imatachus qanpaq ruwarqan chayta, kunanmantaqa manachá qanpaqqa payqa juj umalliqllachu kanman, aswanpas vidaykita libraqta jinachá qhawariwaq. Arí, imaymanatachá paypa sutinta uyarispaqa yuyariwaq.

⁵ Chhaynan Jesusta qatikuq runakunawanpas pasarqan. Paykuna yacharqankuña Diospa sutinta chaypas astawanmi paytaqa reqsirqanku, allintan yacharqanku imaynapunichus karqan chayta. Ichaqa, ¿imaynatan chayta yachankuman karqan? Jesusmi paykunaman chayta yachachirqan. Chaymantapas Jesusqa Papan jinapunin imatapas ruwaq rimaqpas. Jesusta rikuspan apostolkunaqa allinta Jehová Diosta reqsirqanku, yacharqankun imayna Dios-si pay chayta (Juan 14:9; 17:3).

“QOWASQAYKI SUTIYKIRAYKU”

6. ¿Imaninantan Jesús nisharqan qowasqayki sutiykirayku nisqanwan? (Juan 17:​11, 12).

⁶ Discipulonkunamanta rimashaspan Jesusqa Jehová Diosta nirqan: “Qowasqayki sutiykirayku paykunata qhawariy”, nispa (leey Juan 17:​11, 12). ¿Imaninantan Jesús chaywan nishanman karqan, chaymantapachachu paypas Jehová nispa sutichakunman karqan? Manan. Chaypin payqa nillantaq: “Sutiykirayku”, nispa. Chhaynaqa manan Jesusqa cambiakurqanchu sutintaqa. Chhaynaqa, ¿imaninantan Jesús nishanman karqan? Iskay razonmi chaypaq kan. Ñaupaqtaqa, payqa Jehová Diospa sutinpin jamurqan, paypaq rantinpin rimaqpas. Jesusqa Jehová Diospa sutinpin milagrokunatapas ruwaq (Juan 5:43; 10:25). Chaymantapas Jesuspa sutinqa “Jehová Diosmi salvaqqa” ninantan nin. Chhaynaqa Jesusqa Diospa sutintan aparan.

7. ¿Imaraykun nisunman “Jesusqa atirqanmi Diospa sutinpi rimayta” nispa? Willay juj ejemplota.

⁷ Chayta entiendenapaq kaypi piensasun: Juj presidenteqa yaqapaschá pitapas churanman sutinpi imatapas ruwananpaq sutinpi rimananpaq ima, chaytan nikun embajador nispa. Chay runakunaqa nombrasqa kasqankumantapachan autoridadta chaskinku presidenteq sutinpi imatapas ruwanankupaq. Chhaynatan Jehová Diospas Jesusta nombrarqan sutinpi imatapas ruwananpaq, autoridadtan qorqan sutinpi rimananpaq (Mat. 21:9; Luc. 13:35).

8. ¿Imaraykun nisunman “manaraq kay pachaman jamushaspaqa Jehová Diospa sutinpin Jesusqa imatapas ruwaq” nispa? (Éxodo 23:​20, 21).

⁸ Bibliaq willasqanman jinaqa Jesustaqa simi nikullantaqmi, paywanmi Jehová Diosqa runakunamanpas, angelkunamanpas imaymanata willachiq (Juan 1:​1-3). Jehová Diosqa Jesuswanpaschá pusachirqan ñaupa tiempopi Israel runakunatapas, paykunaqa prometesqa jallp’amanmi ch’in orqonta purirqanku. Chay Israel runakunaqa kasukunankun karqan payta. ¿Imarayku? Jehová Dios kikinmi nirqan: “Payqa sutiypin imatapas ruwashan”, nispa (leey Éxodo 23:​20, 21).a Chaypi nisqan jina, Jesusqa Jehová Diospa sutinpin imatapas ruwan. Paymi Diospa sutinta ñaupaq jatunchaqpas ch’uyanchaqpas kashan.

“TAYTÁY, SUTIYKITA JATUNCHAY”

9. ¿Imaraykun nisunman “Jesusqa ancha allinpaqmi Diospa sutinta qhawariq” nispa?

⁹ Rikusqanchis jina, Jesusqa manaraq kay pachaman jamushaspapas jatunchaqmi Jehová Diospa sutintaqa. Kay pachapi kashaspapas chaytan payqa ruwaq. Chayta ruwaspan payqa rikuchirqan may importantes paypaq Diospa sutin karqan chayta. Wañupunanpaq pisillaña faltashaqtinmi Jesusqa Jehová Diosta nirqan: “Taytáy, sutiykita jatunchay”, nispa. Diostaq cielomanta nimurqan: “Jatunchaniñan, wajmantataqmi jatunchasaqpas”, nispa (Juan 12:28).

10, 11. a) ¿Imaynatan Jesús Diospa sutinta jatuncharqan? (Qhaway kay parrafopaq dibujota). b) ¿Imaraykun Diospa sutin jatunchasqa ch’uyanchasqa ima kanan?

¹⁰ Chaymantapas Jesusqa Diospa sutintaqa jatunchaq jujkunaman imayna Dioschus Jehová Dios chayta willaspan. Chaymantapas Jesusqa ch’uyanchaq iman Diospa sutintaqa, chayta ruwaspan jatunchallaqtaq. Jesusqa munaranpunin Diospa sutin ch’uyanchasqa kananta, chaymi discipulonkuna imaynatachus mañakunanku chayta yachachishaspapas nirqan: “Taytayku janaq pachapi kaq, sutiyki ch’uyapaq jap’isqa kachun”, nispa (Mat. 6:9).

¹¹ ¿Imaraykun Diospa sutinta jatunchana ch’uyanchana ima? Edén huertapin Satanás Jehová Diosmanta mana allinta rimarqan. Adanta Evatawanpas allin kaqkunamanta jark’ashanman jinatan rimarqan (Gén. 3:​1-5). Chaymantapas Satanasqa manapas allintachu imatapas ruwanman jinatan Jehová Diosta qhawarichirqan. Chaykunata rimaspan Satanasqa Diospa sutinta qhellicharqan, mana allintan payta qhawarichirqan. Job sutiyoq runaq tiemponpiqa Satanasqa runakunamantañataqmi mana allinta rimarqan. Paypa nisqanman jinaqa runakunaqa interesraykullas Jehová Diostaqa servinkuman. Chaymantapas chay llulla enemigoq rimasqanman jinaqa, runakunaqa ima pruebapipas llakipipas tarikuspaqa saqepullankumansi Diostaqa (Job 1:​9-11; 2:4). Chaykuna rimasqan cheqaqchus karqan icha manachus chayta yachakunanpaqqa tiempon pasanan karqan.

“VIDAYTAN QOSAQ”

12. Jesusqa munakurqantaq Diosta chayqa, ¿imata ruwananpaqmi listo kasharqan?

¹² Jesusqa tukuy sonqon Taytanta munakurqan, chaymi payqa munaranpuni sutinta jatunchayta ch’uyanchaytapas. Chayraykun nirqanpas: “Noqaqa vidaytan qosaq”, nispa (Juan 10:​17, 18). Arí, Jesusqa liston kasharqan Diospa sutinrayku wañunanpaq.b Ñaupa taytanchis Adanwan Evapiwanmi ichaqa mana chhaynachu karqanku, aswanmi Diosta traicionarqanku jinaspa Satanaspa partenmanta churakurqanku. Jesusqa listopunin kasharqan kay pachaman jamuspa Diospa munayninta ruwananpaq (Heb. 4:15; 5:​7-10). Kay pachapi kashaspaqa tukuy sonqon Jehová Diosta servirqan, paypa sutinpin tukuy imatapas ruwaq. Wañupunan p’unchaykaman pay sonqollapuni karqan (Heb. 12:2). Chayta ruwaspan rikuchirqan Jehová Diosta munakusqanta, sutintapas munakusqanta.

13. ¿Imaraykun nisunman “Jesusmi pimantapas aswan allin karqan Satanás llulla kasqanta rikuchinanpaqqa” nispa? (Qhaway kay parrafopaq dibujota).

¹³ Jesusqa kay pachapi kashaspaqa sut’itan rikuchirqan imaynas Satanasqa llulla karqan chayta (Juan 8:44). Yachasqanchis jinapas Jesusqa allintapunin Jehová Diostaqa reqsin, manan pipas pay jinaqa Diostaqa reqsinmanchu. Diospa contranpi Satanaspa rimasqan cheqaq kanman karqan chayqa, chaytaqa yachanmanchá karqan Jesusqa. Ichaqa manan Satanaspa rimasqanqa cheqaqchu karqan; chaymi Jesusqa tukuy tiempopas Jehová Diosman sayakurqan, pay allin qhawarisqa kanantan munaq. Juj kuti sapanña tarikurqan chaypas manaña Dios apoyarqanchu chaypas, chay munakuq Papanta traicionananmantaqa dejallarqanmi wañuchinankuta (Mat. 27:46).c

“ÑAN TUKUNIÑA QOWASQAYKI LLANK’ANATAQA”

14. ¿Ima premiotan Jehová Dios Jesusman qorqan pay sonqollapuni kasqanmanta?

¹⁴ Manaraq wañupushaspa Diosmanta mañakusqanpin Jesusqa nirqan: “Ñan tukuniña qowasqayki llank’anataqa”, nispa (Juan 17:4). ¿Imaraykun chayta ninman karan? Jesusqa confiarqanmi Diospi, yacharqanmi kasukuq kasqanmanta premio qonanta. Chhaynapunitaqmi karqanpas, Jehová Diosqa manan jinatachu saqerparirqan wañuypi (Hech. 2:​23, 24). Aswanmi kausarichispa janaq pachapi juj jatun puestota qorqan (Filip. 2:​8, 9). Watakunaq pasasqan qhepamantaq Diosqa gobiernonpi gobernante kananpaq Jesustaqa churarqan. ¿Imakunatan chay gobierno ruwanqa? Chaymanta rimashaspan Jesusqa juj kuti mañakuspa nirqan: “Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata”, nispa (Mat. 6:10).

15. ¿Imakunatan Jesús ruwanqa?

¹⁵ Pisi tiempollamantan Jesusqa Diosta cheqnikuq runakuna contra jatarinqa, jinaspa Armagedón guerrapi llapankuta chinkachipunqa (Apo. 16:​14, 16; 19:​11-16). Chaymantataq Satanasta “chinkay-chinkay ukhuman” wijch’uykapunqa, chaypin wisq’asqa kanqa, chhaynapin manaña pitapas engañayta atinqachu (Apo. 20:​1-3). Chaykuna qhepamantaq Jesusqa waranqa watapaq kamachikuyta qallarinqa. Chay tiempopiqa thaj kausaymi kay pachapiqa kanqa, llapa runakunatan mana ima juchayoq ch’uyaman tukuchipunqa. Wañusqakunatapas kausarichipunqan. Llapa kay pachan munay paraíso kapunqa, chhaynapin Jehová Diospa munaynin junt’akapunqa (Apo. 21:​1-4).

16. ¿Imaynan kausay kanqa Jesuspa gobiernasqan waranqa wata qhepaman?

¹⁶ ¿Imaynan kausay kanqa chay waranqa wata qhepaman? Manañan juchapas ni ima mana allin ruwaypas kanqañachu. Manañataq jucha kanqachu chayqa, manañan pi librawananchistapas necesitasunchu. Diosman qayllaykunapaqpas manañan pitapas necesitakunqachu ni juj sacerdotetapas. “Último kaq enemigonchis wañuypas” manan kanqañachu. Wañusqakunapas llapankuñan kausarichisqa kapunqaku, kay pachapi kausaq runakunaqa llapankun mana ima juchayoq ch’uya kapunqaku (1 Cor. 15:​25, 26).

17, 18. a) ¿Iman pasanqa Diospa sutinwan waranqa wata qhepaman? b) 1 Corintios 15:​24, 28 textopi nisqan jina, ¿imatan Jesús ruwanqa waranqa wata qhepaman? (Qhaway kay parrafopaq dibujota).

¹⁷ ¿Imakunapiwanmi pasanqa Jesuspa gobiernasqan waranqa wata qhepaman? Manañan pipas Diospa sutinta qhellichanqachu, wiñaypaqmi ch’uyanchasqa kapunqa. Yachasqanchis jina Satanasmi Edén huertapi Diospa sutinta qhellicharqan. Llullata mana munakuqta jinan qhawarichirqan, mana allin kamachikuqta jinan qhawarichirqan. Waranqa wata tukuytan ichaqa Diospa sutinqa ch’uyaña kapunqa. Manañan pipas paymantaqa mana allintaqa rimanqachu, aswanmi lliu yachanqaku imaynas payqa may munakuq Tayta chayta.

¹⁸ Chaymantapas Jesuspa gobiernasqan waranqa wata tukuytaqa llapa runakunan yachanqaku imaynas Satanasqa llulla chayta, imaynas Jehová Diosmantaqa yanqata imatapas riman chayta. Jesusri, ¿imatataq ruwanqa? ¿Satanás jinachu paypas Jehová Dios contra jataripunqa? ¡Manapunin payqa chaytaqa ruwanqachu! (Leey 1 Corintios 15:​24, 28). Aswanmi Jesusqa Papan Jehová Diosman chay gobiernota entregapunqa, jinaspa paypas Papanman k’umuykunqa. Munakuntaq Diosta chayqa payqa sonqomantan chaykunata ruwanqa. Satanás ch’usaqman tukuchisqa kaqtinqa Diospa sutinqa wiñaypaqmi jatunchasqa ch’uyanchasqa ima kapunqa.

19. ¿Imaynatan Jesús qhawarin Jehová Diospa sutinta?

¹⁹ Chhaynatataq Jesús ruwanqa chayqa, razontachá Jehová Diosqa Jesuspiqa tukuy sonqo confiarqan. Razontachá sutintapas qorqan paypa sutinpi rimananpaqqa. Jesusqa allintapunin junt’arqan Diospa imachus kamachisqantaqa. Chhaynaqa, ¿imaynatan Jesús qhawarin Jehová Diospa sutinta? Jesuspaqqa ancha importanten Diospa sutinqa, chay sutiraykun payqa wañuytaraq tarirqanpas. Waranqa wata qhepamanpas liston payqa kashanqa Jehová Diosman tukuy imata kutichipunanpaqpas. ¿Imaynatan noqanchis paypa ejemplonta qatikusunman? Chaymantan yachasunchis qatimuq yachachikuypi.