Leeqkunaq tapukusqan
¿Ima “yuyaytan” Jehová Dios nacionkunaq sonqonman churanqa?
Manchay ñak’ariy qallarinan tiempomanta rimaspan Apocalipsis 17:16, 17 textopi nin: “Chay rikusqayki chunka waqrakunan manchay phiña animalwan kuska chay ramera warmita cheqnikunqaku, jinan payta lliuta ch’utinqaku, jinaspa q’alallata saqerparinqaku, aychantapas mijunqakun, chaymantataq ninawan lliuta kanaykapunqaku. Diosmi sonqonkuman juj yuyayta churarqan, chhaynapi paypa imachus piensasqanta ruwanankupaq, paykunaqpas imachus piensasqankuta ruwanankupaq; chaytan ruwanqaku chay manchay phiña animalman gobierno atiyninkuta qoqtinku”, nispa. Ñaupaqkunaqa “Jehová Diosmi nacionkunaq sonqonman juj yuyayta churanqa pantasqa religionkunata chinkachinankupaq”, nispan nikuq; chhaynatan qelqanchiskunapipas willakuq.
Ichaqa manan chayqa chhaynachu kanqa. Aswanpas Jehová Diosqa nacionkunamanqa juj yuyaytaqa churanqa “manchay phiña animalman gobiernokuna atiyninkuta” qonankupaqmi. ¿Imaynataq chayri kanqa? Chayta kaypi entiendesunchis, chaypaqmi yanapawasun imaymana tapuykuna.
¿Pikunamantan chay profeciapi rimashan? Chaypiqa rimashan “ramera warmimanta”, “manchay phiña animalmanta”, “chunka waqrakunamanta” iman. Chay ramera warmitan nikullantaq “Jatun Babilonia”, nispa. Chayqa tupan kay pachapi llapa pantasqa religionkunawanmi. “Manchay phiña animaltaq” tupan Organización de las Naciones Unidas nisqawan. Chaytaqa 1919 watapiqa Sociedad de Naciones nispan sutichakurqan, chay watapin chay organizaciontaqa rijurichirqanku “thaj kayta apamunanpaq” nispa (Apo. 17:3-5). “Chunka waqrakunataq” tupan “manchay phiña animalta” apoyaq llapa gobiernokunawan.
¿Imaynatan apanakun chay ramera warmi manchay phiña animalwan? Bibliapi willasqanman jinaqa, chay ramera warmiqa chay manchay phiña animalpi sillaykusqan kashan. Chaymi rikuchin imaynas chay warmiqa chay phiña animalwan jujllachasqa kashan chayta, imaynas mayninqa chay phiña animalwan kasuchikun chaytapas.
¿Iman pasanqa chay ramera warmita? Manchay phiña animalmi payta apoyaq chunka waqrakunawan kuska chay “ramera warmita” cheqnikapunqaku. Jinaspa llapa qorinta qolqenta qechupunqaku, juchankunata iman sut’iman orqonqaku. Chaymantataq Jehová Diospa sentencia dictasqanta junt’achinqaku, ch’usaqmanmi tukuchipunqaku chay ramera warmita (Apo. 17:1; 18:8). Arí, llapa pantasqa religionkunatan ch’usaqman tukuchinqaku. Ichaqa manaraq chay pasashaqtinmi Jehová Diosqa nacionkunata otaq gobiernokunata ruwachinqa mana jayk’aq ruwasqankuta.
¿Imatan Jehová Dios ruwachinqa gobiernokunata? Ñaupaqpi yachamusqanchis jina, chay chunka waqrakunaq otaq gobiernokunaq “sonqonkumanmi juj yuyayta churanqa”, chhaynapi imachus piensasqanta ruwanankupaq. “Manchay phiña animalman [otaq Naciones Unidas nisqamanmi] gobiernokuna atiyninkuta” qonqaku (Apo. 17:13). ¡May admiraymi chayqa ¿riki?! Ichaqa, ¿paykunallamantachu chay gobiernokuna chayta ruwanqaku? Manan, Bibliapi willasqanman jinaqa Jehová Diosmi chayta ruwachinqa (Prov. 21:1; tupanachiy Isaías 44:28 textowan). ¿Pisi-pisimantachu chayta ruwanqaku? Manan, qonqayllan chayqa pasanqa. Chay atiywanmi, manchay phiña animalqa otaq Naciones Unidas nisqaqa Jehová Diospa sentencianta junt’achinqa, llapa falso religionkunatan chinkachinqa.
Chhaynataq chayqa, ¿imakunan pisillamanta pasanqa? Nimusqanchis jina gobiernokunaqa manan pisi-pisimantachu Naciones Unidas nisqamanqa atiyta qonqaku, manan noticiakunapi chhayna ninantaqa suyananchischu. Aswanmi Jehová Diosqa qonqaylla gobiernokunaq sonqonman chay yuyayta churanqa, qonqayllan gobiernokunaqa atiyninkuta chay manchay phiña animalman qonqaku. Chaykuna pasaqta rikusun chayqa atenton kashananchis, manchay ñak’ariyqa qonqayllan qallarinqa. Chay p’unchay chayamunankamaqa “rijch’asqalla kashasun, yuyayninchispitaq kashasunpas”. Kaypi yachasqanchis jina qonqaymi imapas pasanqa (1 Tes. 5:6).