Jehová Dios jina humilde sonqo kasun

1. ¿Imaraykun admiranapaq kanman Jehová Dios humilde sonqo kasqanta yachay?

KAY pacha kamachikuqkunapi piensaspa, ¿nisunmanchu “paykunaqa humilde sonqon kanku” nispa? Manan. Jehová Diosmi ichaqa may jatun atiyniyoqña chaypas humilde sonqo (Sal. 113:​5-8). Payqa chhaynapunin, manan ima jatunchakuypas sonqonpiqa kanchu. Kaypin yachasunchis imayna tawa formapis Jehová Dios rikuchin humilde sonqo kasqanta chayta. Yachasunmi imaynatas Jesús Jehová Diosta qatikurqan chaytapas. Chaymi yanapawasun Jehová Diosta astawan munakunanchispaq, pay jina humilde sonqo kananchispaqpas.

JEHOVÁ DIOSQA FÁCIL RIMAYKUNAN

2. Salmos 62:8 textopi nisqanman jinaqa, ¿imaynan Jehová Dios? (Qhaway tapanpi kaq fotota).

² Jatunchakuq uma oqariq runakunaqa mana rimaykuy atiymi. Paykunaqa imapas kankuman jinaraqmi purinku, chaymi runakunaqa mana faciltachu asuykunkupas ni rimaykunkupas. ¡Jehová Diosninchismi ichaqa mana chhaynachu! Aswanmi payqa munan llapa runakuna imachus piensasqankuta payman willakunankuta (leey Salmos 62:8). Imaynan juj taytaqa tukuy yuyaywan wawanpaq rimasqanta uyarin, chhaynatan janaq pacha Taytanchispas tukuy yuyaywan uyariwanchis imachus mañakusqanchista. Bibliapiqa askha kutitan rimashan runakuna Dioswan parlasqankumanta. Chaypin rikukun imaynas runakunaqa facilta paywan rimaqku chayta (Jos. 10:​12-14; 1 Sam. 1:​10-18). Chhaynaña kaqtinpas mayninqa yaqapaschá manchakusunman paywan parlariyta. ¿Iman yanapawasunman chhaynapi tarikuqtinchis?

3. ¿Imaraykun nisunman “Jehová Diosqa munanpunin paywan parlananchista” nispa?

³ Mayninqa yaqapaschá nisunman: “Manan noqaqa Diospa munakuwananpaq jinachu kani”, nispa. Chhaynataña piensasunman chaypas paywanqa parlasunmanmi. ¿Imaraykun chayta ninchis? Chaypaq piensasunchis Jesuspa juj rijch’anachiy willasqanpi. Chaypin rimarqan juj munakuq taytamanta, paypaq jujnin wawanmi juchapi purisharqan. Ichaqa p’enqakusharqanmi familianman kutiyta, mana allinpaq jinan qhawarikusharqan, chaywanpas kutipurqanmi. ¿Imaynatan chay tayta wawanta chaskinman karqan? Jesuspa willasqan jina, rikuspa jinan wawanman “phawarqan abrazaykuspataq much’aykurqan” (Luc. 15:​17-20). Jehová Diospas chay tayta jinan. Pipas juchanmanta sinchi llakisqa kaspa paypa yanapayninta mañakun chayqa, Diosqa atenton chay runata uyarin, humilde sonqo kasqanraykun payqa chayta ruwan (Lam. 3:​19, 20). Chaymantataq khuyapayakuq kasqanpi “phawaspa” payta sonqochan. Chaymantapas munakusqanta perdonapusqanta iman rikuchin (Isa. 57:15). Ichaqa, ¿imaynatan chayta ruwan? Iñiq t’aqapi umalliqkunawanmi chayta ruwan, chaymantapas Testigo familianwan juj hermanokunawan iman chayta ruwan (Sant. 5:​14, 15). Chhaynatan Jehová Diosqa yanapawanchis, payqa paypa ladollanpi kananchistan munan.

4. ¿Imaynatan Jesús rikuchirqan fácil rimaykuna kasqanta?

⁴ Jesuspas papan jinan karqan. Jesuspas Jehová Dios jina humilde sonqon. Chaymi runakunaqa paymanqa confianzawan asuykuqku, confianzawanmi imatapas tapukuqku (Mar. 4:​10, 11). Jesús imata tapuqtinpas confianzawanmi paykunaqa imatapas willaqku (Mat. 16:​13-16). Chaymantas imapiña pantaruqku chaypas manan manchasqachu puriqku. Paykunaqa allintan yacharqanku Jesusqa khuyapayakuq pacienciakuq kasqanta (Mat. 17:​24-27). Jesús chhayna kasqanraykun qatikuqnin runakunaqa Jehová Diostapas allinta reqsirqanku (Juan 14:9). Allintan yacharqanku imaynas Jehová Diosqa mana chay tiempopi religioso runakuna jinachu karqan chayta. Chay runakunaqa jatunchakuq, orgulloso, rumi sonqo iman kaqku. Jehová Diosmi ichaqa humilde sonqo fácil rimaykuna ima.

5. ¿Imaraykun nisunman “humilde sonqo kasun chayqa faciltan pipas rimaykuwasun” nispa?

⁵ ¿Imaynatan rikuchisunman Jehová Dios qatikusqanchista? Pay jina humilde sonqo kaspan. ¿Imarayku? Pay jina humilde sonqo kasun chayqa, manan envidiakuqchu jatunchakuqchu ni cheqnipakuqchu kasun. Chhayna kasunman chayqa manachá pipas asuykamuwasunmanchu. Aswanmi noqanchisqa llamp’u sonqo, pacienciakuq, perdonakuq ima kananchis. Chhayna kasun chayqa faciltan pipas asuykamuwasunchis (Col. 3:​12-14). Umalliqkunan astawanqa chhayna kananku. Ichaqa paykuna noqanchiswan confianzata jap’inankupaqqa parlarinanchismi paykunawan. Chhaynataq chayqa umalliqkunaqa atishaspaqa kallpachakunankun juñunakuykunapi kanankupaq, manan videollamada nisqallantachu jaykumunanku. Chaymantapas tukuy atisqankutan kallpachakunanku hermanokunawan kuska predicaq rinankupaq, chhaynapin hermanokunaqa allinta paykunataqa reqsinqaku, faciltataq imatapas willakunqaku.

JEHOVÁ DIOSQA ENTIENDEKUQ DIOSMI

6, 7. ¿Imaraykun nisunman “Jehová Diosqa entiendekuq Diosmi”, nispa? Willay ejemplokunata.

⁶ Jatunchakuq orgulloso runakunaqa mana entiendekuqmi kanku. Jehová Diosmi ichaqa mana chhaynachu. Payqa may jatun Diosña may yachayniyoqña chaypas mayninqa piensasqantapas cambianmi. Chaypaq yachasun imachus Miriamwan pasarqan chayta. Miriamqa turan Aaronwan kuskan mana allinta rimarqanku Diospa churasqan Moisés contra, jinan Diosqa Miriampaq phiñakurqan Moisesta mana respetasqanmanta, jinaspa lepra onqoywan jap’ichirqan. Chayta rikuspan Aaronqa Moisesta valekurqan yanapananpaq, jinan Moisesqa Jehová Diosta valekurqan qhaliyachipunanpaq. ¿Imatan Jehová Dios ruwanman karqan? “Manan, payqa castigasqapunin kanan”, ¿ninmanchu karqan? Manan chaytachu ruwarqan. Yaqapaschá juj jatunchakuq runaqa chayta ruwanman karqan, Jehová Diosmi ichaqa mana. Aswanmi payqa humilde sonqo kayninpi Moisespa mañakusqanman jina Miriamta qhaliyachipurqan (Núm. 12:​1-15).

⁷ Juj kutipas Jehová Diosqa rikuchirqanmi humilde sonqo kasqanta. Payqa juj profetawanmi willachirqan imaynas rey Ezequías wañupunan karqan chayta. Chayta yachaspan rey Ezequiasqa Jehová Diospa yanapayninta waqasparaq mañakurqan. ¿Imatan Jehová Dios ruwanman karqan? Khuyapayakuq kayninpin payqa chunka pisqayoq watatawanraq kausachirqan (2 Rey. 20:​1, 5, 6). Rikusqanchis jina Jehová Diosqa humilde sonqo kayninpin chay reypa mañakusqanta uyarirqan, jinaspa khuyapayarqan.

8. ¿Imaynatan Jesús rikuchirqan papan jina entiendekuq kasqanta? (Marcos 3:​1-6).

⁸ Jesuspas papan jinan karqan. Kay pachapi kashaspaqa Jesusqa entiendeqmi runakunata, yanapaq iman. Mayninqa sábado p’unchaypi iman onqosqakunata qhaliyachiq. Religionpi umalliqkuna manaña munaqkuchu chaypas Jesusqa qhaliyachiqmi (leey Marcos 3:​1-6). Kunankamapas Jesusqa chhaynallapunin kashan. Pipas juchaman urman chayqa, pacienciakunmi payqa chay runawan, cambianantataqmi suyashanpas (Apo. 2:​2-5).

9. ¿Imaynatan noqanchispas Jehová Dios jina entiendekuq kasunman? (Qhaway kay parrafopaq fotokunata).

⁹ ¿Imaynatan rikuchisunman Jehová Dios qatikusqanchista? Pay jinan allin uyariq entiendekuq ima kananchis (Sant. 3:17). Tayta-mamakunapas chaypiqa allintan kallpachakunanku. Paykunaqa manan wawankuta jinallatachu qhawarparinanku, nitaqmi mana atinankutachu imatapas mañananku. Chaypin allin ejemplo kanman Jacob, payqa sumaqtan wawankunata qhawarirqan (Gén. 33:​12-14). Chaymantapas tayta-mamakunaqa manan wawankutaqa juj kaq wawankuwanqa comparanankuchu, sonqo nanaymi chayqa wawakunapaqqa kanman. Umalliqkunapas entiendekuqmi kananku. Paykunapura juñunakuspankupas manan munayninkuman jinalla imapas ruwakunantachu munananku, uyarinankun jujkunaq rimarisqankutapas. Imapipas yaqa llapanku acuerdopi kashanku chayqa, apoyanankun chayta (1 Tim. 3:​2, 3). Llapanchismi kallpachakunanchis jujkunata entiendenanchispaq jujniraytaña sapanka piensasunman chaypas (Rom. 14:1). Arí, llapanchismi kasukunanchis Bibliapi kaq yuyaychayta, chaypin nin: “Lliu runakuna yachachunku allin yuyaywanpuni imatapas ruwaq kasqaykichista” nispa (Filip. 4:5).

JEHOVÁ DIOSQA PACIENCIAKUQMI

10. ¿Imaynatan Jehová Dios rikuchirqan pacienciakuq kasqanta?

¹⁰ Yachasqanchis jinapas jatunchakuq orgulloso runakunaqa yaqa llapankupas mana pacienciakuqmi kanku, paykunaqa manan munankuchu imatapas suyakuytaqa. Jehová Diosqa manapunin chhaynachu, manan pay jina pacienciakuqqa pipas kanmanchu. Noepa tiemponpipas mana allin runakunata chinkachinanpaqqa 120 watataraqmi suyarqan (Gén. 6:3). Chhaytukuy watata suyasqanraykun Noepas allinta wawankunataqa educarqan, familianwan kuskan arcatapas ruwarqan. Abrahantapas Jehová Diosqa pacienciawanmi uyarirqan. Payqa Sodoma Gomorra llaqtakunamantan imaymanata tapukurqan. Juj jatunchakuq orgulloso runaqa yaqapaschá Abrahantaqa ninman karqan: “¿Pitaq qanri kanki chayta tapuwanaykipaq?”, nispa. Jehová Diosmi ichaqa mana chaytachu ruwarqan, aswanmi payqa humilde sonqo kayninpi pacienciallawan uyarirqan (Gén. 18:​20-33).

11. 2 Pedro 3:9 textopi nisqan jina, ¿imaraykun Jehová Dios kay tiempopi pacienciakushan?

¹¹ Kay tiempopipas Jehová Diosqa may jatun pacienciakuq kasqantan rikuchishan. Payqa pacienciawanmi suyakushan kay millay kausayta chinkachinanpaq. Ichaqa, ¿imaraykutaq payri chhaynaniraqta pacienciakun? Bibliaq nisqan jina, “payqa manan munanchu pipas wañunantaqa, aswanmi munan lliupas juchankumanta pesapakuspa payman kutirikunankuta” (leey 2 Pedro 3:9). Ichaqa, ¿yanqapaqchu kashan Jehová Diospa pacienciakusqan? Manan. Pacienciakusqanraykun waranqanpi runakuna payta reqsishanku, wakin runakunapas reqsinankutan payqa munashan. Ichaqa manan wiñaypaqchu Diosqa pacienciakunqa. Pay munakunña runakunata chaypas, manan chayraykuchu jinata qhawanqa pipas mana allinta ruwanantaqa. Mana allin kausayqa manan wiñaypaqchu kanqa (Hab. 2:3).

12. ¿Imaynatan Jesús rikuchishan papan jina pacienciakuq kasqanta?

¹² Jesuspas papan jinan. Askha waranqa watakunañan payqa papan jina pacienciakushan. ¿Imaraykun chayta ninchis? Payqa rikurqanmi imaynatas Satanasqa llullakuspa Dios contra, Dios sonqo runakuna contra ima rimarqan chayta (Gén. 3:​4, 5; Job 1:11; Apo. 12:10). Chaymantapas Jesusqa rikurqanmi runakunaq ñak’arisqanta. Chhaynataq chayqa, “maytachá Jesusqa munashan Satanaspa ruwasqankuna chinkachiyta” (1 Juan 3:8). ¿Iman payta yanapashanman Diospa kamachinankama pacienciakunanpaq? Jesusqa humilde sonqon. Payqa allintan yachan imaynas Jehová Diosllapuni jayk’aqsi imatapas ruwakunqa chayta ninanpaqqa derechoyoq chayta (Hech. 1:7).

13. ¿Imapi tarikuspan Jesús rikuchirqan apostolkunawan pacienciakuq kasqanta, imaraykun pay pacienciakurqan?

¹³ Jesusqa apostolninkunawanpas pacienciakuqmi. Apostolkunaqa sapa kutillanmi discutiqku mayqenninkuchus importante karanku chaymanta, chayta rikuspaqa Jesusqa manan phiñakuqchu ni renegakuqchu. Aswanmi paykunawanqa mayta pacienciakuq (Luc. 9:46; 22:​24-27). Payqa allintan yacharqan tiempowan cambianankuta. Noqanchispas yaqapaschá paykuna jina imaymanapi pantaranchis. Chay pasawaranchis chayqa maytan gracias ninchis Jesús pacienciakuq humilde sonqo kasqanmantaqa ¿riki?

14. ¿Iman yanapawasunchis aswan pacienciakuq kananchispaq?

¹⁴ ¿Imaynatan rikuchisunman Jehová Dios qatikusqanchista? Jehová Dios jina kananchispaqqa “Cristoq yuyaynin yuyayniyoqmi kananchis” (1 Cor. 2:16). Ichaqa, ¿iman yanapawasun Jesús jina piensananchispaq? Tiempotan t’aqananchis Bibliapi Mateo, Marcos, Lucas, Juan librokunata leenanchispaq. Chaymantapas allintan piensarinanchis chay leesqanchispi. Chaypin reparasun imaynas Jesusqa Diospa yuyaynin yuyayniyoq karqan chayta. Chaymantapas Diospa yanapaynintan mañakunanchis Jesús jina humilde sonqo kananchispaq. Jesús jina piensayta qallarisun chayqa, astawanmi Dios jina piensasunchis. Astawanmi pacienciakusun noqanchiswanpas hermanonchiskunawanpas (Mat. 18:​26-30, 35).

JEHOVÁ DIOSQA MAY ALLINPAQMI QHAWARIN HUMILDE SONQO RUNAKUNATA

15. ¿Imaynatan Jehová Dios rikuchirqan Salmos 138:6 textopi nisqanman jina imatapas ruwasqanta?

¹⁵ (Leey Salmos 138:6). Jehová Diosqa jujkunaq mana reparasqan runakunatapas rikushanmi. ¡May munaymi chayqa ¿riki?! Wakinmanta kaypi rimasunchis. Paykunamanta wakintaqa manapaschá reqsinchischu, ichaqa Bibliapin Jehová Diosqa paykunaq sutinta qelqachisqa. Paykunamanta jujninmi kashan Débora. Payqa wawata uywaq warmin karqan. Isaacpa familianta Jacobpa familianta iman payqa tukuy sonqowan servirqan, 125 wata jinan paykunata servirqan. Paymantaqa manan nishutachu yachakun, ichaqa Jehová Diosmi Moiseswan paypa sutinta Bibliapi qelqachisqa. Chaywanmi rikuchirqan may munasqa kasqanta (Gén. 24:59; 35:8). Tiempoq pasasqanman jinan Jehová Diosqa Davidta ajllarqan Israelpi rey kananpaq. Payqa chay tiempopiqa erqellaraqmi kasharqan, ovejata michispallan puriqpas (2 Sam. 22:​1, 36). Jesuspa nacesqan tiempopipas Jehová Diosqa oveja michiqkunamanmi ñaupaqtaqa willachirqan ajllasqa Mesías nacesqanmanta, juj angelwanmi chayta willachirqan (Luc. 2:​8-11). Josewan Mariawan Jesusta temploman apaqtinkupas Jehová Diosqa Anaman Simeonman iman rikuchirqan Jesustaqa. Paykunaqa chay tiempopiqa kuraqkunañan kasharqanku (Luc. 2:​25-30, 36-38). Rikusqanchis jina, “Jehová Diosqa may jatunña chaypas payqa k’umuykukuq runakunatan sumaqta qhawarin”.

16. ¿Imaynatan Jesús rikuchirqan papan jina kasqanta?

¹⁶ Jesuspas papan jinan karqan. Arí, Jesusqa Jehová Dios jinan humilde sonqo runakunata ancha allinpaq qhawarirqan. “Mana educasqa común runakuna” nisqakunamanmi Diospa gobiernonmantapas yachachirqan (Hech. 4:13; Mat. 11:25). Onqosqakunatapas qhaliyachirqanmi. Chayta ruwaspaqa manan onqoynillankumantachu qhaliyachisharqan, sonqo nanayninkuta iman qhaliyachisharqan (Luc. 5:13). Manaraq wañupushaspapas apostolninkunaq chakintan maqchirqan, kamachi runakunaq ruwanantan ruwarqan (Juan 13:5). Chaymantapas manaraq janaq pachaman kutipushaspan qatikuqninkunata kamachirqan Diospa gobiernonmanta yachachinankupaq, chhaynapi pipas uyarikuqqa wiñay kausayta tarinanpaq. Kunankamapas chay munay ruwayqa aparikushallanmi (Mat. 28:​19, 20).

17. ¿Imaynatan rikuchisunman Jehová Dios qatikusqanchista? (Qhaway kay parrafopaq fotota).

¹⁷ ¿Imaynatan rikuchisunman Jehová Dios qatikusqanchista? Noqanchisqa paytaqa qatikushanchis jujkunaman paymanta yachachispan. Llapa runakunamanmi willananchis Diosmanta jamuq allin willakuykunata. May llaqtamantaña imayna colorniyoqña kanku, imayna educacionniyoqña kanku chaypas willananchispunin Diosmantaqa. Chaymantapas iñiqmasinchiskunataqa sumaqtan qhawarinanchis. Ima ruwaytaña yachanchis chaypas, Diospa llaqtanpi ima llank’anapiña yanapakushanchis chaypas, iñiqmasinchiskunataqa noqanchismanta aswan allinpaqmi qhawarinanchis (Filip. 2:3). Jehová Diosqa anchatan kusikun humilde sonqo kasqanchista rikuspa, jinallataq jujkuna-jujkunawan sumaqta kausasqanchista rikuspa ima (Sof. 3:12; Rom. 12:10).

18. ¿Imaraykun munawaq Jehová Dios jina humilde sonqo kayta?

¹⁸ Janaq pacha taytanchis jina humilde sonqo kananchispaq kallpachakusun chayqa, fácil rimaykuna, entiendekuq, pacienciakuq iman kasunchis. Chaymantapas manan jujkunataqa imaraykupas pisichasunchu, aswanmi Jehová Dios jina paykunata qhawarisunchis. Dios jina humilde sonqo kananchispaq kallpachakusun chayqa, astawanmi payqa valorawasunchis (Isa. 43:4).