¿Yuyashankichu?
¿Yuyashankichu kay watapi lloqsimuq Qhawaq qelqapi yachachikuykunata? Chayta yachanaykipaq kaypi kaq tapuykunapi piensariy.
¿Imaraykun Jehová Diosta jatunchanchis?
Jehová Diosta jatunchaspaqa payta respetasqanchista munakusqanchista iman rikuchishanchis. Chaymantapas payta jatunchaqtinchisqa jujkunapas chaytan ruwayta munanqaku (w25.01, 3 paginapi).
¿Iman yanapawasunman ofiendewaqninchis runata perdonananchispaq?
Manan pisipaqchu qhawarinanchis sonqonchispa nanasqanta, chaywanpas saqepunanchismi colerayta cheqnipakuytapas, mana chayqa astawanmi sonqonchispi nanay cheqnikuy ima wiñanman (w25.02, 15,16 paginakunapi).
¿Imaraykun Marcos allin ejemplo kanman wayna hermanokunapaq?
Marcosqa liston kasharqan jujkunata servinanpaq. Juj kuti mana allinpiña tarikurqan chaypas manan chayraykuchu pisiparqan, aswanmi tukuy atisqanta kallpachakurqan apóstol Pablowanpas jujkunawanpas allinta apanakunanpaq (w25.04, 27 paginapi).
¿Imaninantan Jesús Jehová Diosta nisharqan “sutiykitan reqsichini” nispa nisqanwan? (Juan 17:26).
Discipulokunaqa yacharankuñan Diospa sutintaqa. Chhaynaqa Jesusqa Jehová Dios imayna Dioschus, imatas munan, imatas ruwanqa chaykunata yachanankumantan rimasharqan (w25.05, 20, 21 paginakunapi).
Humilde sonqo kasunchis chayqa, ¿imatan facilta entiendesun?
Imakunatachus mana yachanchischu chaytan facilta entiendesun. Noqanchisqa manan yachanchischu jayk’aqsi Diospa p’unchaynin chayamunqa chayta, ni imaynatas librawasun chaytapas. Manan yachanchischu imakunas paqarin minchhata pasanqa chayta, ni maytukuytas Jehová Dios reqsiwanchis chaytapas (w25.06, 15-18 paginakunapi).
¿Iman yanapawasun Diosmanta jamuq yachachikuykunawan allinta yanapachikunanchispaq?
Chaypaqqa yaqapaschá tapukusunman: “¿Imakunatan kaypi willakushan runakuna allinta entiendenankupaq? ¿Kaypi willakusqan ima ejemplopas o rijch’anachiypas yanapawanmanchu jujkunata yanapanaypaq? ¿Pitan kay allinta yanapanman?”, nispa (w25.07, 19 paginapi).
¿Imaynatan Dios Davidta perdonarqan, imatan chay Diosmanta yachachin?
Davidqa jatun juchakunatan ruwarqan, ichaqa sonqomantan arrepientekurqan jinan Jehová Diosqa perdonapurqan payta (1 Rey. 9:4, 5). Diosqa juchanchista perdonaspaqa manan chaytaqa yuyayninpichu waqaychan chhaynapi chayta yuyarichiwananchispaq, aswanmi chaytaqa chinkachipun (w25.08, 17 paginapi).
Mayqen Biblia estudiaqpas mana faciltachu imatapas entienden chayqa, ¿imatan ruwananchis?
Bibliaq yachachisqanta allinta explicashaqtinchispas mana entiendeshanchu chayqa, ni chayta chaskiyta munashanchu chayqa siguillasun, qhepakunamanña jujmanta chayta willarisun (w25.09, 24 paginapi).
¿Imamantan Biblia rimashan engañakuq juchamanta rimaspa? (Heb. 3:13).
Juchasapa runataq kanchis chayqa faciltan juchaqa ima mana allinmanpas apawasunman, mayninqa iskayachiwasunman iman. Mayninqa yaqapaschá Diospa munakuyninmantapas iskayasunman (w25.10, 16 paginapi).
¿Iman yanapawasunman tukuy sonqomanta mañakunanchispaq?
1) Allintan piensananchis imaynas Diosninchis Jehová Dios chaypi. 2) Llapa llakinchistan willakunanchis Jehová Diosman, pitaña mana perdonarqanchischu chaypas willakunanchismi chayta. 3) T’aqananchismi Tiempota paywan parlarinapaq. Chayta ruwasun chayqa faciltan imatapas willakusun (w25.10, 19, 20 paginakunapi).
¿Imaynatan yanapasunman kuraqkunata?
Visitarinanchismi wajarinanchis iman. Atikuqtinqa doctorman iman compañarinanchis, chaymantapas paykunawan kuskan predicaq risunman (w25.11, 6, 7 paginakunapi).
¿Imatan casarakuy munaqkuna ruwananku Diospa munayninman jina casarakunankupaq?
Autoridadkunaq kamachisqanman jinan casarakunanku, ima aparisqankupas Diospa munayninman jinan kanan. P’achankupas manan jatunchakuq jinachu ni alabakuq jinachu kanan. Ima costumbrepas mana Bibliaman jinachu kashan chayqa manan ruwanankuchu. Chay p’unchay ima ruway munasqankutapas sut’itan willakunanku, ichaqa respetowanmi chaytaqa ruwananku (w25.12, 21-24 paginakunapi).