¿Kallpachakushankichu astawan cambianaykipaq?

1-3. a) ¿Imakunapi cambiaymi cristianokunapaq sasa kashanman? b) ¿Imatan tapukusunman mana cambiayta atispa? (Kay paginapi fotota qhaway.)

KEVIN runan nishuta machaq, fumaq, drogakuq, qolqepaqpas pujllaq.^[1] Ichaqa Bibliata estudiaspan yacharuran Jehová Dios chay ruwaykunata cheqnikusqanta. Chaymi payqa Diosta kusichiyta munaspa chay viciokunata saqepuran. Payqa Diospa yanapayninwanmi cambiaran jinallataq Bibliaq yanapayninwan (Heb. 4:12).

² Bautizakusqan qhepamanri, ¿cambiananraqchu karan? Arí, kallpachakunanmi karan allin poqosqa cristiano kananpaq (Efes. 4:31, 32). Payqa bautizakusqan qhepamanmi repararan millay genioyoq kasqanta, manataqmi cambiayta atiranchu. Paymi nin: “Ñaupa vicioykunata saqeymi aswan fácil karan genioyta cambiaymantaqa”, nispa. Payqa sapa kutillan Diosta valekuran yanapananpaq, kallpachakurantaqmi Bibliata allinta estudiananpaq. Chaymi yanaparan pisi-pisimanta cambiananpaq.

³ Noqanchispas manaraq bautizakushaspan mana allin kausayninchista cambiapuranchis. Ichaqa bautizakusqanchis qhepamanmi repararanchis Diosman Cristomanpas rijch’akunanchispaq astawanraq cambiananchis kasqanta (Efes. 5:1, 2; 1 Ped. 2:21). Yaqapaschá wakinqa kashanchis cuento q’epi, jujkunaq ruwasqanta qhawashanchis, runata manchakushanchis otaq juj ruwaykunapi pantashanchis. Yaqapaschá unayña kallpachakushanchis chaykunapi cambianapaq manataq atishanchischu, jinaspa Kevin jina nishanchis: “¿Imaraykutaq chayllaraq Bibliata estudiashaspa facil-llata cambiapurani kunantaq mana atishanichu? ¿Imatan ruwanay aswan allin cristiano kapunaypaq?”, nispa.

ATISUNMANMI DIOSPAQ JINAPUNI KAUSAYTA

4. ¿Imaraykun mana Diospa munasqanman jinapunichu tukuytapas ruwanchis?

⁴ Jehová Diosta reqsisqanchismantapachan payta munakunchis, munasqanman jinataqmi imatapas ruwayta munanchis. Ichaqa pantaq runa kasqanchisraykun imapipas pantashallanchis. Apóstol Pablopas chhaynapin tarikuran chaymi niran: “Allin kaq ruwaytaqa maytan munani, ruwaytan ichaqa mana atinichu”, nispa (Rom. 7: 18; Sant. 3:2).

5. a) ¿Ima ruwaykunatan saqepuranchis Diospa llaqtanpi kanapaq? b) ¿Ima ruwaykunata saqeymi llapapaqpas sasa kanman?

⁵ Diospa llaqtanpi kanapaqqa Diospa cheqnisqan ruwaykunatan saqepuranchis (1 Cor. 6:9, 10). Ichaqa manaraqmi ch’uya runakunachu kanchis (Col. 3:9, 10). Chaymi bautizakusqanchis unay qhepamanpas pantashallanchis rimayninchispi, piensayninchispi otaq ruwayninchispi. Yaqapaschá mayninqa ñaupaq ruwayninchismanpas kutirisunman. Mana allin ruwaykunata saqeyqa manan pipaqpas facilchu.

6, 7. a) ¿Imaynapin yachanchis pantaq runakunapas Diospa amigon kay atisqanchista? b) ¿Imaraykun mana manchakuspa Diosmanta perdonta mañakunanchis?

⁶ Pantaq runaña kanchis chaypas, Diosqa munanmi servinanchista amigonkuna kananchistapas. ¿Imaynapi chayta yachanchis? Payqa manaraq llaqtanman pusamuwashaqtinchismi yacharanña imakunapi pantananchista (Juan 6:44). Yacharanñan juchayoq kasqanchisrayku imakunapi cambiay sasa kananta. Chaywanpas payqa sonqonchistan rikumuran, allinkuna ruwasqanchistan astawanqa qhawariran. Chaymi amigonkuna kananchispaq ajllakuwaranchis.

⁷ Diosqa anchatan munakuwanchis, chaymi sapan churinta kachamuran juchamanta kacharichiwananchispaq (Juan 3:16). Sichus imapipas pantarusunman chayqa, pesapakuspan Jesuspa sutinpi perdonta mañakunanchis, jinan Diosqa perdonawasun (Rom. 7:24, 25; 1 Juan 2:1, 2). Ichaqa mayninpin sinchi qhellipaq qhawarikuspa mana uyanchis kanmanchu perdonta mañakunapaq. ¿Allintachu chayta ruwashasunman? Manan, chayqa kanman unuta mana qhellichananchisrayku qhelli makinchista mana maqchikuyta munay jinan. Yuyariy, Jesusqa juchanchisraykun wañuran. Paypa sutinpi perdonta mañakusun chayqa perdonasqan kasun. ¡Maytan Diosta agradecekunchis pantaq runakunaña kashaqtinchispas amigonchis kapusqanmanta! (Leey 1 Timoteo 1:15.)

8. ¿Imaraykun kallpachakushanallanchis cambiananchispaq?

⁸ Ichaqa, ¿“pantaq runan kani” nispachu mana allinkunata ruwashanallanchis? Manan, Diospa amigon kayta munaspaqa, kallpachakunanchismi paypa munasqanman jina imatapas ruwananchispaq (Sal. 15:1-5). Arí, kallpachakunanchismi millay genionchista, rimayninchista juj mana allin ruwayninchiskunatapas cambianapaq. Chayllaraq bautizakuranchis otaq unayña bautizakuranchis chaypas, kallpachakushanallanchismi ‘allin yuyayman kutinanchispaq’ (2 Cor. 13:11, Traducción del Nuevo Mundo).

9. ¿Imaynapin yachanchis Diosman astawan rijch’akuy atisqanchista?

⁹ Apóstol Pablon niran: “Ñaupa kausayniykichista wijch’upuychis, chay mauk’a runaqa q’otukuq mana chanin munayninkunawanmi waqllisqa kashan. Qankunaqqa yuyayniykichispas sonqoykichispas mosoqman t’ijrasqan kanan. Qankunaqa Diosman rijch’akuq kamasqa mosoq runawan p’achallikuychis, chaymi rikuchikun chanin kausaypi cheqaq ch’uya kausaypiwan”, nispa (Efes. 4:22-24). ‘Mosoqman t’ijrasqa’ nispaqa nishan p’unchay-p’unchaymanta ‘mosoq runaman’ tukupuy atisqanchistan. ¿Imaraykun Pablo chayta niran? Unayña Diosta servishanchis chaypas, llapallanchismi kallpachakuspaqa aswan allin cristiano kapusunman. Arí, Bibliaq yanapayninwanqa llapallanchismi astawanraq Diosman rijch’akusunman.

¿IMARAYKUN SASAPUNI?

10. a) ¿Imatan ruwananchis astawan cambiananchispaq? b) ¿Imakunatan mayninqa tapukusunman?

¹⁰ Llapallanchismi Bibliaq nisqanman jinapuni kausayta munanchis. Ichaqa kallpachakunanchismi sapa p’unchay astawan cambiananchispaq. ¿Imaraykun kallpachakunanchis? ¿Imaraykun Dios mana yanapawanchischu facil-llata cambiapunapaq?

11-13. ¿Imaraykun Jehová Dios munan cambianapaq kallpachakunanchista?

¹¹ Cielopipas kay pachapipas imaymana kasqanmi rikuchiwanchis Jehová Dios ancha atiyniyoq kasqanta. Intimanta rimasun. Intipiqa ancha jatun atiymi kashan, chaypin sapa segundo sinchi ruphaypas k’anchaypas paqarin. Chay ruphaymantan as pisilla allpaman chayamun kausananchispaq (Sal. 74:16; Is. 40:26). Jehová Diosqa pay serviqkunamanpas qonmi atiyninta (Is. 40:29). Chhaynaqa, ¿imaraykun mana chay atiyninta qowanchischu mana allin pensamientokunata, ruwaykunatapas facil-llata cambiapunapaq?

¹² Diosqa manan pitapas obliganchu munayninta ruwananpaq. Payqa munanmi noqallanchismanta munayninta ruwananchista. Chayta ruwaspan rikuchinchis munakusqanchista, paypa munasqanta ruway munasqanchistapas. Satanasqa manan munanchu kamachikuq kananta. Ichaqa Diosta tukuy sonqowan kasukusqanchispin rikuchinchis kamachiqninchis kananta munasqanchista. Chay ruwasqanchistan Diosqa ancha allinpaq qhawarin kusikuntaqmi kanpas (Job 2:3-5; Prov. 27:11). Sichus Diosta kasukuy facil-lla kanman chayqa, manan sut’itapuniqa reparakunmanchu kamachikuq kananta munasqanchis.

¹³ Chaymi Jehová Diosqa munan allin cristiano kanapaq tukuy sonqowan kallpachakunanchista (Col. 3:12; leey 2 Pedro 1:5-7). Munanmi mana allin pensamientokunata mana allin ruwaykunatapas cheqnikunanchista (Rom. 8:5; 12:9). Sichus kallpachakusun chaykunapi cambiananchispaq chayqa, anchatan kusikusun.

BIBLIAWAN YANAPACHIKUSUN CAMBIANAPAQ

14, 15. ¿Imakunatan ruwananchis noqanchispi sumaq kaykunata ruruchinapaq? (Qhaway “Bibliata leespa mañakuspa iman cambiashanku” nisqa recuadrota.)

¹⁴ ¿Imatan ruwananchis noqanchispi sumaq kaykunata ruruchinapaq? Manan munasqanchisman jinallachu qhawarinanchis imakunapi cambiananchis kasqanta, aswanmi Diospa nisqanman jina cambiananchis. Romanos 12:2 texton nin: “Amaña runakunaq imaynatachus kausashasqanta jinaqa kausaychischu, aswanpas mosoqyachisqa yuyayniykichisman tupaqtapuni kausaychis. Ajinapin mayqenchus Diospa munaynin kasqanta reparankichis, paypa munayninqa allinmi, sumaqmi, junt’asqapunin”, nispa. Diosqa yanapawanchismi Bibliawan santo espiritunwan ima. Ichaqa noqanchispas kallpachakunanchismi Bibliata sapa p’unchay leenanchispaq, yachasqanchispin yuyaymanananchis, mañakunanchistaqmi Diospa santo espiritunta (Luc. 11:13; Gál. 5:22, 23). Chayta ruwasun chayqa, Diosmi yanapawasun imachus munasqanta yachanapaq, jinan pay jina piensasun, munasqanman jinataq imatapas ruwasun. Ichaqa cuidakushanallanchismi mana allin ruwaykunaman urmaykuymanta (Prov. 4:23).

¹⁵ ¿Imatawanmi ruwananchis? Bibliamanta willaq qelqanchiskunatan estudiananchis. Chaypaqmi yanapawananchispaq jina textokunata otaq Qhawaq, ¡Rijch’ariy! revistakunapi temakunata maskhananchis, chaytataq waqaychananchis. Chaykunatan sapa kutilla yapa-yapamanta leenanchis. Chaymi yanapawallasuntaq Diosman astawan rijch’akunapaq.

16. ¿Imaraykun pacienciakunanchis cambiananchispaq?

¹⁶ Sumaq kaykunata noqanchispi ruruchiyqa manan facilchu tiempopaqtaqmi kanpas. Chaymi pacienciakunanchis kallpachakunanchistaqmi pisi-pisimanta cambianapaq. Ñaupaqtaqa cuerponchista yuyayninchistan obligananchis kanqa allin kaqta ruwananpaq. Ichaqa pisi-pisimantan chay ruwayman yachakunqa. Jinan qhepamanqa manaña sasachu kanqa allin kaqkunallapi piensay, allin kaqkunata ruwaypas (Sal. 37:31; Prov. 23:12; Gál. 5:16, 17).

JAMUQ TIEMPOPI SUMAQ PREMIONCHISPI PIENSASUN

17. ¿Imaynan kausay kanqa Dios sonqo runakunapaq?

¹⁷ Jamuq tiempopiqa ch’uya runakunan kapusun, wiñaypaqmi Diospa munayninta ruwasun. Chay tiempopiqa manan sasachu kanqa allin kaqta ruway Diosman rijch’akuypas. Ichaqa chay p’unchay chayamunankaman kallpachakushanallanchis Diosta servinapaq. Pantaq runaña kanchis chaypas Bibliaq nisqanman jina cambiasun chayqa, Diospa sonqontan kusichisun.

18, 19. ¿Imaynapin yachanchis Bibliaq yanapayninwan astawanraq cambiay atisqanchista?

¹⁸ Kevin iñiqmasipas sasatan cambiaran millay genionta. Payqa Bibliamanta yachasqanpin yuyaymanaran kallpachakurantaqmi chayman jina kausananpaq. Jinaspapas juj iñiqmasikunatan valekuran yanapananpaq. Iskay kinsa watakuna qhepamanmi payqa aswan sumaq cristianoman tukupuran. Jinan qhepaman yanapakuq qhari kapuran, kunantaqmi 20 wata jinaña umalli kashan. Chaywanpas cuidakushallanmi mana allin ruwaykunaman urmaykunanmanta.

¹⁹ Kevin jinan askha iñiqmasikuna sumaqta cambiapushanku. Noqanchispas kallpachakushallasun astawan cambiananchispaq, chhaynapin Diosman astawan k’askakusun (Sal. 25:14). Bibliaq yanapayninwanqa astawanmi Diosman rijch’akusun (Sal. 34:8).