¿Mayqen kamachikuqtan ajllakunki? | ¿Imatapas Biblia willashanmanchu chaymanta?

Askha runakunan allinta qhawarishanku juj kamachikuqta ajllanankupaq.

¿Imatan Biblia chaymanta willashan?

Kay pachapi kamachikuqkunaqa runakunallan kanku

Bibliaqa sut’itan willawanchis imayna runakunallas kanchis chayta.

Biblian nin: “Ama kamachikuqkunapipas ni pi runapipas confiaychischu, paykunaqa manan pitapas salvayta atinkumanchu. Samaynin sayapuqtinmi runaqa jallp’aman tukupun, chay p’unchaypachan ima yuyaykusqanpas chinkapun”, nispa (Salmos 146:3,4).

Runakuna allintaña kamachikunkuman chaypas tiempowanqa wañupullankun. Allintaña imatapas ruwarqanku chaypas manan nisunmanchu “juj kamachikuqpas pay jinan allinta ruwanqa nispaqa” (Eclesiastés 2:18, 19).

Bibliaqa sut’itan willan runakunaqa mana kamachikunankupaqchu kamasqa kasqankuta.

Biblian nin: “Manan runachu ninan maynin ñannintachus purinan chaytaqa, manan runaq munayninchu chay ñanpi thaskirinallanpas”, nispa (Jeremías 10:23).

¿Pillan allin kamachikuq kanman?

Diosmi juj allin kamachikuqta ajllan

Bibliaqa willanmi confianapaq jina juj kamachikuqta Jehová Dios ajllasqanta, chay kamachikuqmi Señorninchis Jesús (Salmos 2:6). Jehová Diosmi Jesusta ajllarqan Gobiernonpi Rey jina kamachikunanpaq. Chay gobiernoqa janaq pachamantan kamachikamunqa (Mateo 6:10).

¿Imaraykun Jesús allin kamachikuq kanman? Chayta yachananchispaqmi Biblia yanapasunchis.

Biblian nin: “Churita jatunchaychis, mana chayqa Diosmi phiñakunqa, chhaynapitaq chanin ñanmanta chinkapunkichis, phiñakuyninqa usqhayllan raurarin. ¡May kusisqan llapa paypi pakakuqkunaqa!”, nispa (Salmos 2:12).

Kunanmi tiempoqa kashan pichus kamachiqninchis kanqa chayta ajllakunanchispaq. Profeciakunaq willasqan jina Señorninchis Jesusqa 1914 watamantapachan kamachikamushan. Chaymantapas Biblian willallantaq pisitiempollamanta kay pachapi gobiernokunaq rantinpi kamachikamunantapas (Daniel 2:44).

Sichus Jesuspa gobiernonta apoyayta munashanki chayqa, qhaway “Kunanqa Diospa gobiernontan apoyananchis” nisqa yachachikuyta.