Nany/stock.adobe.com
¿Imaninmi Biblia kay pachapi yarqay kasqanmanta?
“Yarqayta tukuchisun”. Chaytan mundontinpi gobiernokuna runakunaman prometenku, chaytaqa prometenku askha llaqtakunapi yarqay kasqanraykun.a Ichaqa, ¿jayk’aqllapas kay pachamanta yarqayta tukuchinkumanchu? ¿Imaninmi Biblia chaymanta?
Bibliaqa willarqanñan yarqay kananmanta
Bibliapi nisqanman jinaqa tukukuy p’unchaykunapin kausashanchis, chay tiempopin mijuykunaqa pisiyanan karqan (2 Timoteo 3:1). Manan Dioschu chaytaqa ruwachishan, ichaqa Bibliapin willachirqanña chaykuna pasananta (Santiago 1:13). Iskay profeciakunata qhawasun:
“Kayneqpi chayneqpin kanqa yarqay” (Mateo 24:7). Chaypi nisqanman jinaqa askha llaqtakunapin yarqay kanan karqan. Mijuykuna qhawariymanta encargakuq institucionkunan kayta nirqanku: “Imaymanataña ruwakushan chaypas astawanmi mijuykunaqa pisiyashan, chaymantapas askha runakunan desnutricionwan kashanku”, nispa.b Askha nacionkunapin millonninpi runakuna mijuykunata rantinankupaq mana qolqenku kanchu, chaymi yarqaymanta wañupushanku.
“Chayllamanmi juj yana caballoñataq rijuriramun, chay caballopi sillakuqqa juj balanzatan jap’isqa” (Apocalipsis 6:5). Chay profeciapi yana caballopas, chay caballopi sillakuqpas kay tukukuy p’unchaykunapi yarqay kanantan representan.c Chay caballopi sillakuqqa makinpin juj balanzata apashan mijuykunata pesananpaq. Chay caballo purishanankaman juj kunkata uyarikun, chay kunkan nin mijuykuna nishuta valenanta, chaymi runakunata nin ama mijuykunata usuchinanpaq (Apocalipsis 6:6). Chaypi nisqanqa kay tiemponchispin junt’akushan, chaymi kay tiemponchispi millonninpi runakuna mana mijuykunata rantiyta atinkuchu mana qolqeyoq kasqankurayku.
Jamuq tiempopiqa manañan yarqayqa kanqañachu
Investigaq runakunan ninku: “Jallp’anchispiqa askhan mijuykunaqa kashan”, nispa. Chhaynaqa, ¿imaraykutaq askha runakuna yarqaypi tarikushanku? Bibliaq nisqanman jina, ¿imatan Jehová Diosd ruwanqa yarqayta tukuchinanpaq?
Sasachay: Gobiernokunaqa manan wajcha kayta chinkachiyta atinkuchu, chayraykun askha runakuna yarqaypi tarikushanku.
¿Imaynatan chayta allichakunqa? Diospa gobiernonmi kay pacha gobiernokunaq rantinpi mundontinta kamachinqa, Jesucristotaqmi chay gobiernopi rey kanqa (Daniel 2:44; Mateo 6:10). Kay tiempopiqa askha runakunan wajcha kanku, chaymi mana qolqenku aypanchu mijuykunata rantikunankupaq. Diospa gobiernon kamachimuqtinmi ichaqa chaykunata tukuchipunqa. Jesusmantan Biblia nin: “Paymi yanapay mañakuq wajchakunata libranqa, paymi mana piniyoqtapas, pisichasqatapas libranqa. Kay pachapiqa mana tukurikuqmi mijuy kanqa, orqo patakunapin askhallaña, sumaqllaña wiñanqa”, nispa (Salmos 72:12, 16).
Sasachay: Askha nacionkuna guerrapi kasqankuraykun qolqenku pisiyapun, chaymi mijuykunata mana rantiyta atinkuchu llaqtanpi kaq runakunaman rakinankupaq.
¿Imaynatan chayta allichakunqa? Bibliapin nin: “[Jehová Diosmi] kay pachapi guerrakunata tukuchiqqa. Arcokunatan p’akin, lanzakunatan ñut’un, guerraman rina carretakunatapas ninapin kanan”, nispa (Salmos 46:9). Jamuq tiempopin Diosqa guerrakuna jatarichiqkunatapas llapa armakunatapas chinkachipunqa. Chay pasaqtinqa pachantinpin mijuykuna kanqa. Bibliapin Dios prometewanchis: “T’ika jinan chanin runaqa t’ikarinqa. Thaj kayqa kashallanqan”, nispa (Salmos 72:7).
Sasachay: Sinchita ruphamusqanwan paramusqanwan incendiokuna kasqanwanmi mijuykunaqa pierdekushan, uywakunapas wañupushanku.
¿Imaynatan chayta allichakunqa? Diosmi paratapas wayratapas ruphaytapas controlanqa, chaymi mijuykunapas tiempollanpi allinta wiñanqa. Bibliapin nin: “[Jehová Diosmi] manchay wayrata llamp’uyachin, lamar-qochaq sinchi aytikusqantan sayachin. Aqo pampakunatan carrizoq wiñanan unu pampaman tukuchin, ch’aki jallp’akunatan pujyu-pujyuman tukuchin. Yarqasqakunatan chaypi tiyachin, llaqtata jatarichinankupaqmi chayman churan. Paykunan chajrakunata llank’anku, uvas sach’akunatan plantanku; chay chajrakunataq allinta mijuyta qon”, nispa (Salmos 107:29, 35-37).
Sasachay: Runakunaqa askha qolqeta ganayta munaspan imaymana jampikunata churanku mijuykuna usqhaylla wiñananpaq, chay mijuykunataq runakunata onqochipushan, jujkunataq jark’akunku wajchakunaman mijuykunata apachiyta.
¿Imaynatan chayta allichakunqa? Diospa gobiernonmi ambicioso runakunata millay runakunatapas chinkachipunqa (Salmos 37:10, 11; Isaías 61:8). Bibliapin Diosmanta nin: “Sarunchasqakunapaqmi justiciata ruwapun, yarqasqakunamanmi mijunata qon”, nispa (Salmos 146:7).
Sasachay: Sapa watanmi mundontinpi kashaq yaqa kuskan mijuykunata usuchikun.
¿Imaynatan chayta allichakunqa? Diospa gobiernon kamachimuqtinqa llapa mijuykunatan allinta rakikunqa. Kay pachapi kashaspan Jesusqa mijuykunata mana usuchirqanchu. Juj kutinmi Jesusqa pisqa waranqa más runakunaman milagrota ruwaspa mijuchirqan, chay qhepamantaq discipulonkunata nirqan: “Puchuq phasmikunata llapanta juñumuychis ama imapas usunanpaq”, nispa (Juan 6:5-13).
Kaypi yachasqanchis jina imaymana pasasqanwanmi yarqayqa kashan, Diospa gobiernonmi ichaqa chaykunata chinkachipunqa, chay qhepamanmi kay pachapi runakunapaq askhallaña mijuykuna kanqa (Isaías 25:6). ¿Jayk’aqtaq chaykunari kanqa? Chayta yachanaykipaq qhaway “¿Jayk’aqmi Jesús kay pachata kamachimunqa?” nisqa yachachikuyta.
a Agenda 2030 sobre el Desarrollo Sostenible, aprobada en el 2015 por todos los Estados Miembros de las Naciones Unidas.
b Informe realizado por la Organización de las Naciones Unidas para la Alimentación y la Agricultura, el Fondo Internacional de Desarrollo Agrícola, el Fondo de las Naciones Unidas para la Infancia, el Programa Mundial de Alimentos de las Naciones Unidas y la Organización Mundial de la Salud.
c Apocalipsis libropin willashan tawa caballokunapi sillakuqkunamanta, chaymanta astawan yachanaykipaq qhaway “¿Imatan representan caballopi phawasqanku?” nisqa yachachikuyta.
d Diospa sutinqa Jehová nisqan (Salmos 83:18). Chaymanta astawan yachanaykipaq qhaway “¿Pitaq Jehová Diosri?” nisqa yachachikuyta.