Isaías
19 Kay willakuyqa Egipto nación contran:+
¡Qhawariychis! Jehová Diosmi phuyu patapi usqhaylla Egiptoman jaykushan,
Egiptopi mana valeq dioskunan paypa ñaupanpi khatatatanqa,*+
Egiptoq sonqonqa manchakuymantan unuyanqa.
2 “Egipto runakunatan paykunapurata cheqninachisaq,
paykunapuran maqanakunqaku,
sapankankun wayqenku contra, wasimasinku contra sayarinqaku;
juj llaqtan juj llaqta contra sayarinqa,
juj gobiernon juj gobierno contra sayarinqa.
3 Egiptoqa manan imanakuytapas atinqachu,
imachus yuyaykusqantan waqllichisaq.+
Paykunaqa mana valeq diosninkunamanmi phawaykunqaku,
khuruqkunaman, wañusqakunata tapuqkunaman, watuqkunaman iman rinqaku.+
4 Egiptotaqa millay patronmanmi entregasaq,
mana khuyapayakuq reymi payta gobiernanqa”+ ninmi cheqaq Señorqa, ejercitokunata kamachiq Jehová Diosqa.
5 Lamar-qochan ch’akipunqa,
mayupas pisiyaspan ch’akipunqa.+
6 Llapa mayukunan asnarinqa,
Nilo mayumanta lloqsimuq unukunan pisiyanqa,
Egiptoman riq yarqhakunan* ch’akipunqa;
7 Nilo mayuq patanpi kaq plantakunan ch’akipunqa;
maymanchus chayamun chaypi kaq plantakunapas,
Llapa chaykunataqa wayran apapunqa, manan kanqañachu.
8 Nilo mayupi challwaqkunan llakipi tarikunqaku,
chay mayuman anzuelo chanqaykuqkunan waqanqaku,
chay mayuman llikankuta wijch’uykuqkunan pisiyapunqaku.
9 Lino q’aytuwan llank’aqkunan pisichasqa kanqaku,+
yuraq telata telarpi ruwaqkunan p’enqaypi tarikunqaku.
10 Awaqkunan ñit’isqa jina tarikunqaku,
llank’apakuqkunan sinchi llakipi tarikunqaku.
11 Zoan llaqta+ umallikunaqa mana yuyayniyoqkunan kanku.
Faraonpa* allin yuyaychaqninkunapas yanqatan yuyaychanku.+
¿Ima uyaykichiswanmi qankuna faraonta niwaqchis:
“Noqaykuqa yachaysapakunaq wawankunan kayku,
ñaupa reykunaq mirayninmantan jamuyku”, nispa?
12 ¿Maypin yachayniyoq runaykikuna kashan?+
Yachanku chayqa, paykuna willachunku imatachus ejercitokunata kamachiq Jehová Dios Egiptota ruwanqa chayta.
13 Zoan llaqta umallikunaqa mana yuyayniyoqmi kanku,
Nof llaqta* umallikunapas+ engañasqan kapunku,
Egiptotan ayllukunapi umallikuna urmachipunku.
14 Jehová Diosmi paykunaq yuyayninta tutayachin,+
paykunataq Egiptota mana allinman apanku,
aqtupakusqanpi thampiykachaq machasqa runa jinan kashan.
15 Egiptoqa manan ima ruwaytapas atinqachu,
manan umanpas ni chupanpas ni ch’ijchimuqpas ni t’otorapas ima ruwaytapas atinqachu.
16 Chay p’unchayqa warmi jinan Egipto runakunaqa kanqaku, ejercitokunata kamachiq Jehová Dios paykuna contra makinta oqariqtinmi mancharikunqaku, manchakuymantan khatatatanqakuraq.+ 17 Judá jallp’amanta rimarispallaraqmi Egipto runakunaqa sinchita manchakunqaku. Chay jallp’amanta rimaqta uyarispallaraqmi mancharikunqaku, ejercitokunata kamachiq Jehová Dios imatachus Egipto contra ruwananta yachaspan chhayna manchasqa kanqaku.+
18 Chay p’unchaymi Egiptopi pisqa llaqtakuna Canaán runakunaq rimayninta rimanqaku,+ paykunan ejercitokunata kamachiq Jehová Diosta servinankupaq juranqaku. Jujnin llaqtaq sutinmi kanqa Thunina Llaqta nisqa.
19 Chay p’unchaymi Egipto llaqta chaupipi Jehová Diospaq juj altarta ruwanqaku, Egipto jallp’a linderopin Jehová Diospaq juj rumi saywata sayachinqaku. 20 Chaykunan Egiptopi runakunapaq señal jina kanqa, chhaynapi ejercitokunata kamachiq Jehová Diosta yuyarinankupaq. Paykunaqa ñak’arichisqan kanqaku, jinan Jehová Diospa yanapayninta mañakunqaku, paytaq juj jatun salvaqta kachamunqa. 21 Chhaynapin Jehová Diosqa Egiptopi allin reqsisqa kanqa. Egipto runakunaqa allintan Jehová Diosta reqsinqaku, jinan ofrendakunata regalokunata ima payman qonqaku. Chaymantapas juj promesatan Jehová Diosman ruwanqaku, chaytataq junt’anqaku. 22 Jehová Diosmi Egiptota castiganqa,+ chaymantataq jampinqa. Paykunan Jehová Diosman kutipunqaku, jinan payqa mañakusqankuta uyarinqa, k’irinkutapas jampinqa.
23 Chay p’unchaymi juj ñan kichakunqa+ Egiptomanta Asiriaman. Jinan Asiria runakunaqa Egiptoman rinqaku, Egipto runakunapas Asiriaman jamunqaku. Asiria runakunawan Egipto runakunawanmi kuska Diosta servinqaku. 24 Chay p’unchaymi Israelqa kinsa kaq kanqa, Egiptoman Asiriamanwanmi juñukunqa,+ kay pachapaqmi juj bendición kanqa. 25 Ejercitokunata kamachiq Jehová Diosmi ninqa: “Bendecisqa kachun llaqtay Egipto, makiypa ruwasqan Asiria, ajllakusqay* Israelpas”,+ nispa.