Jeremías

28 Chay watallapitaqmi, Judá rey Sedequías+ kamachikuyta qallarisqanmanta kinsa wata tawa killaña pasaqtin Gabaonmanta+ Azurpa churin profeta Hananiasqa Jehová Diospa wasinpi, sacerdotekunaq, llaqta runakunaq ñaupanpi Jeremiasta nirqan: 2 “Ejercitokunata kamachiq Jehová Diosmi, Israelpa Diosninmi nin: Babilonia reypa yugontan p’akisaq.+ 3 Iskay watamantan noqa Jehová Diospa wasiypi kaq cosaskunata Babiloniamanta apakampusaq, chay cosasniykunatan Babilonia rey Nabucodonosorqa kaymanta aparqan,+ nispa. 4 Jehová Diosmi nin: Babilonia reypa yugonta pak’ispan, Jehoiaquinpa+ churin Judá rey Jeconiasta,+ llapa Babiloniaman preso apasqa Judá runakunatawan kutichimpusaq,+ nispa”.

5 Jinan profeta Jeremiasqa Jehová Diospa wasinpi kashaq sacerdotekunaq ñaupanpi, llaqta runakunaq ñaupanpi profeta Hananiasta rimapayarqan. 6 Profeta Jeremiasmi nirqan: “¡Chhayna kachun!* ¡Jehová Dios ruwachun! ¡Jehová Dios willasqaykita junt’achun, Jehová Diospa wasinpi kaq cosaskunata, llapa preso apasqakunata Babiloniamanta apampuspa! 7 Ichaqa, kay willasqayta uyariykuway, llapa llaqta runakunapas uyarichunku. 8 Manaraq qanpas noqapas kashaqtinchismi ñaupa tiempo profetakunaqa willarqankuña askha suyukunapaq, atiyniyoq gobiernokunapaq guerrakuna, ñak’ariykuna, millay onqoykuna kananmanta. 9 Juj profeta thaj kaymanta willan chayqa, willasqan junt’akullaqtinmi yachakunqa Jehová Diospuni kachamusqanta”, nispa.

10 Jinan profeta Hananiasqa profeta Jeremiaspa kunkanmanta yugota orqospa p’akirqan.+ 11 Chaymantataq Hananiasqa llaqta runakunaq ñaupanpi nirqan: “Jehová Diosmi nin: Chhaynallatataqmi iskay watamanta jina, Babilonia rey Nabucodonosorpa nacionkunaq kunkanman churasqan yugota p’akisaq,+ nispa”. Chaymantataq profeta Jeremiasqa ripurqan.

12 Profeta Jeremiaspa kunkanpi kaq yugota profeta Hananías p’akisqan qhepamanmi, Jehová Diosqa Jeremiasta nirqan: 13 “Hananiasta nimuy: Jehová Diosmi nin: Maderamanta yugotan p’akirqanki,+ ichaqa rantinpin fierromanta yugota ruwanki, nispa. 14 Ejercitokunata kamachiq Jehová Diosmi, Israelpa Diosninmi nin: Llapa kay nacionkunaq kunkanmanmi fierromanta yugota churasaq, Babilonia rey Nabucodonosorta servinankupaq,+ campopi kaq salqa animalkunatapas paymanmi qopusaq,+ nispa”.

15 Jinan profeta Jeremiasqa profeta Hananiasta nirqan:+ “¡Hananías, uyariway! Qantaqa manan Jehová Dioschu kachamurqasunki, yanqa willakuykunawanmi llaqta runakunata q’otushanki.+ 16 Chayraykun Jehová Dios nin: Kay jallp’amantan chinkachisayki. Jehová Dios contra runakunata jatarichisqaykimantan kay wata wañunki,+ nispa”.

17 Chay watapin profeta Hananiasqa qanchis kaq killapi wañurqan.