Jeremías
34 Babilonia rey Nabucodonosor llapa soldadontin, pachantinmanta munayninpi kashaq llapa gobiernokunapas, llapa llaqtakunapas Jerusalén contra, muyuriqninpi kaq llaqtakuna contra maqanakushaqtinmi Jehová Diosqa Jeremiasta rimapayarqan, nirqanmi:+
2 “Jehová Diosmi Israelpa Diosninmi khaynata nin: Phaway Judá rey Sedequiaswan+ rimamuy, payta nimuy: Jehová Diosmi nin: Babilonia reypa makinmanmi kay llaqtata entregaykusaq, paymi ninawan kanaykunqa.+ 3 Qanpas manan makinmanta ayqeyta atinkichu, jap’ispan payman entregaykusunkiku.+ Babilonia reymi uya-uyapura qanwan rimanqa, Babiloniamanmi apasqa kanki, nispa.+ 4 Ichaqa Judá rey Sedequías, Jehová Diospa kay nisqanta uyariy: Jehová Diosmi qanmanta nin: Manan espadawan wañuchisqachu kanki. 5 Thajpin wañukapunki,+ wañupuqtiykiqa ninatan raurachinqaku imaynan taytaykikunapaq, qanmanta ñaupaqta kamachiq reykunapaq raurachiqku jinata, khuyaytan qanmanta waqanqaku: ¡Ay patronnillayku!, nispa. Noqan chaykunata willani, noqa Jehová Diosmi chayta nini, nispa”.
6 Jinan profeta Jeremiasqa tukuy chay simikunata Judá rey Sedequiasman Jerusalenpi willarqan, 7 chay p’unchaykunan Babilonia reypa ejercitonqa Jerusalén contra, Judamanta puchuq llaqtakuna contra maqanakusharqan,+ Judapa allin perqayoq llaqtankunamantaqa Lakiswan+ Azecallawanñan+ kasharqan.
8 Kamachikunata kacharipunapaq+ rey Sedequías llapa Jerusalén runakunawan rimanakusqan qhepamanmi Jehová Diosqa Jeremiasta rimapayarqan. 9 Sapankankun hebreo kamachinkuta kacharipunanku karqan qhariña warmiña kaqtinpas, chhaynapi manaña pipas judío runakunamanta kamachiyoq kanankupaq. 10 Llapa autoridadkunan, llapa runakunan kasukurqanku. Qhari kamachinkuta warmi kamachinkuta kacharipunankupaq rimanakuyta junt’anankupaqmi prometekusqaku, manaña paykunawan servichikunankupaq. Chayta kasukuspan kacharipurqanku. 11 Chaymantan ichaqa kacharipusqanku qhari kamachinkuta warmi kamachinkutapas kutichimurqanku, jinaspa wajmanta servichikurqanku. 12 Chayraykun Jehová Diosqa Jeremiasman siminta chayachimurqan, khaynatan Jehová Diosqa nirqan:
13 “Noqa Jehová Diosmi, Israelpa Diosninmi nini: Ñaupa taytaykichiskunata Egipto jallp’api kamachi kasqankumanta+ orqomusqay p’unchaymi paykunawan khaynata rimanakurqani:+ 14 Qanchis kaq watapin kamachiykichis kananpaq rantisqaykichis llapa hebreo wayqeykichiskunata kacharipunkichis, soqta watallan servichikunkichis chaymantaqa libren kapunqaku,+ nispa. Ñaupa taytaykichiskunan ichaqa mana kasuwarqankuchu manan uyariwarqankupaschu. 15 Qankunaqa kay p’unchaykunallan* cambiaspa ñaupaypi allin kaqta ruwarqankichis, runamasiykichistan kacharipurqankichis. Ñaupaypin, sutiyta apaq wasipin rimanakurqankichis. 16 Chaymantan ichaqa munasqankuman jina kacharipusqaykichis qhari kamachiykichista warmi kamachiykichistapas kutichimuspa sutiyta saruncharqankichis,+ wajmantan paykunawan servichikurqankichis, nispa.
17 ”Chayraykun Jehová Dios nin: Qankunaqa manan kasukuwarqankichischu, manan wayqeykichista ni runamasiykichistapas kacharipurqankichischu.+ Kunanmi qankunata kacharipusaykichis, libren kapunkichis espadawan, millay onqoywan, yarqaywan wañunaykichispaq,+ pachantinpi suyukunaq mancharikunanmanmi tukuchisaykichis,+ ninmi Jehová Dios. 18 Paykunaqa malta torota ñak’aspan iskayman kuchurqanku chaupinta pasaspataq ñaupaypi rimanakurqanku, chayta mana junt’aspan rimanakuyniyta p’akirqanku.+ 19 Judá autoridadkuna, Jerusalén autoridadkuna, palaciopi oficialkuna, sacerdotekuna, llapa suyu runakuna iman chay ñak’asqa malta toroq chaupinta pasarqanku. Kaymi paykunawan pasanqa: 20 Enemigonkuq, wañuchiyta munaqkunaq makinmanmi entregasaq. Ayankutaqa phalaq animalkuna kay jallp’api kaq animalkuna iman mijupunqaku.+ 21 Judá rey Sedequiastan autoridadninkunatawan enemigonkuq, wañuchiyta munaqkunaq makinman entregaykusaq, kutipushaq+ Babilonia reypa ejercitonmanmi entregaykusaq.+
22 ”Noqan kamachisaq, noqan kayman paykunata kutichimusaq, kay llaqta contran maqanakunqaku, atipaspan ninawan kanaykapunqaku,+ Judapa llaqtankunatan purunyachisaq, mana piqpa tiyananmanmi tukuchipusaq,+ ninmi Jehová Dios, nispa”.