Jeremías
42 Chaymantan soldadokunaq llapa umallinkuna, Careaq churin Joanán,+ Osayaq churin Jezanías, llapa runakunapas juch’uymanta jatunkama asuykurqanku 2 profeta Jeremiasman, jinaspa nirqanku: “Ama jinachu kay, rogakusqaykuta uyariwayku, noqaykupaqwan kay puchuq runakunapaqwan Jehová Diosniykimanta mañapuwayku, askhan karqayku, kunantaq rikusqayki jina pisillaña kashayku.+ 3 Jehová Diosniyki niwachunku maynin ñanninta rinaykuta ima ruwanaykutapas”, nispa.
4 Profeta Jeremiastaq nirqan: “Allinmi, valekuwasqaykichisman jinan Jehová Diosniykichismanta mañakusaq, imatachus Jehová Dios nimuwanqa chaytaqa llapallanta willasaykichis, manan juj simitapas pakasaykichischu”, nispa.
5 Paykunataq Jeremiasta nirqanku: “Manachus Jehová Dios qanwan willachiwasqankuman jina ruwasaqku chayqa, Jehová Dios noqayku contra junt’aq testigo, cheqaq testigo kachun. 6 Allinña manaña kaqtinpas noqaykuqa Jehová Diosniykuq simintan kasukusaqku, paymanmi kachashaykiku. Jehová Diosniykuq siminta kasukuspaqa allillanmi kasaqku”, nispa.
7 Chunka p’unchay qhepamanmi Jeremiasqa Jehová Diospa siminta chaskirqan. 8 Chaymi Careaq churin Joananta, paywan kaq soldadokunaq llapa umallinkunata, llapa runakunatapas juch’uymanta jatunkama wajachimurqan.+ 9 Nirqantaq: “Qankunan rogakuwarqankichis mañapunaypaq. Jehová Diosmi, Israelpa Diosninmi khaynata nin: 10 Qankuna kay suyupi qhepakunkichis chayqa, noqan sayarichisaykichis manan thunisaykichischu, noqan plantasaykichis manataqmi t’irasaykichischu, ñak’ariyta chayachimusqay jawan llakipayasaykichis.+ 11 Manchakusqaykichis Babilonia reytaqa ama manchakuychischu.+
”Qankunawanmi kashani, ama manchakuychischu, noqan salvasaykichis, makinmantan kacharichisaykichis, ninmi Jehová Dios. 12 Khuyapayasaykichismi,+ paypas khuyapayaspan suyuykichisman kutichipusunkichis.
13 ”Qankunataqchus ninkichis: ¡Manan, manan kay suyupiqa qhepakusaqkuchu!, nispa. Manataqchus Diosniykichis Jehová Diospa siminta kasukunkichis, 14 Egipto jallp’amanmi risaqku,+ chaypiqa manan guerrata rikusaqkuchu, manan waqra tocaytapas uyarisaqkuchu, manan yarqaymantapas kasaqkuchu, chaypin tiyamusaqku, nispachus ninkichis chayqa, 15 Judamanta puchuqkuna, Jehová Diosniykichispa siminta uyariychis. Ejercitokunata kamachiq Jehová Diosmi, Israelpa Diosninmi nin: Sichus qankuna, Egiptomanpunin ripusaq, nispa chayman tiyaq* ripunkichis chayqa, 16 manchakusqaykichis espadan Egipto jallp’aman aypamusunkichis, manchakusqaykichis yarqaymi Egiptoman aypamusunkichis, chaypin wañunkichis.+ 17 Egiptomanpuni rispa chaypi tiyamuyta munaqkunaqa espadawan, yarqaywan, millay onqoywan iman wañunqaku. Manan jujllapas kausanqachu, manan pipas escapanqachu ñak’ariy chayachisqaymantaqa, nispa.
18 ”Ejercitokunata kamachiq Jehová Diosmi, Israelpa Diosninmi khaynata nin: Imaynan Jerusalenpi tiyaqkunaman colerayta k’araq phiñakuyniyta chayachirqani,+ chhaynatan qankunamanpas Egiptoman riqtiykichisqa k’araq phiñakuyniyta chayachimusaq, ñakasqan kankichis, mancharikunamanmi tukuchisaykichis, pisichasqan, asipayasqan kankichis,+ manan jayk’aqpas kay jallp’ata rikunkichisñachu, nispa.
19 ”Judamanta puchuqkuna, Jehová Diosqa qankuna contran riman. Ama Egiptoman riychischu. Allinta reparaychis kunan p’unchay willasqayta, 20 mana kasukuspaykichisqa vidaykichiswanmi pagankichis. Jehová Diosniykumanta mañapuwayku, llapa Jehová Diosniykuq rimasqanta willawayku, noqaykutaq chayta ruwasaqku,+ nispan qankunaqa Jehová Diosniykichisman kachawarqankichis. 21 Kunanmi paypa nisqanta willashaykichis, ichaqa yachanin Jehová Diosniykichispa siminta mana kasukunaykichista, qankunaman llapa willachiwasqanta mana ruwanaykichista.+ 22 Chayrayku allinta yachaychis, maymanchus tiyaq riyta munashankichis chaypiqa espadawan, yarqaywan, millay onqoywan iman wañunkichis”,+ nispa.