Jeremías
47 Manaraq Gaza llaqtaman faraón* phawaykushaqtinmi, Jehová Diosqa profeta Jeremiasman willarqan Filistea runakunawan imachus pasananmanta.+ 2 Jehová Diosmi khaynata nin:
“¡Qhawariy! Wichay ladomantan unu jamushan,
wasapaq mayumanmi tukunqa.
Suyumanmi, llapa chaypi kaqkunamanmi junt’aykunqa,
llaqtamanmi runankunantinman junt’aykunqa.
Qharikunan qaparinqaku,
suyupi llapa tiyaqkunan waqanqaku.
3 Caballonkunaq phapatun pampata suenachisqanta uyarispan,
maqanakuna carretankuq chhaqllallallasqanta uyarispan,
ruedankunaq manchakuy suenasqanta uyarispan,
kallpanku pisiyaqtin,
taytakunaqa wawankuta wijch’uspa manaña qhepata qhawarinqakuñachu.
4 Chay jamushaq p’unchayqa llapa Filistea runakunatan ch’usaqyachinqa,+
Tiromantan+ Sidonmantan+ puchuq llapa yanapaqkunata chinkachinqa.
Noqa Jehová Diosmi Filistea runakunata ch’usaqyachisaq,
5 P’aqla uma kaymi, q’ara uma kaymi* Gazaman chayanqa.
Asquelonqa ch’inyachisqan kapun.+
Pampankunamanta puchuqkuna,
¿jayk’aqkaman cuerpoykichista mat’akunkichis?+
6 ¡Jehová Diospa espadan!+
¿Jayk’aqmi qasi kanki?
Waqaychanaykiman kutipuy.
Samallayña, ch’inlla kay.
7 ¿Imaynan qasilla kanman noqa Jehová Dios kamachimushaqtiy?
Asquelón contran, lamar-qocha pata contran noqaqa kachamurqani”,+ nispa.