Ezequiel
35 Jujmantan Jehová Diosqa rimapayamuwarqan, paymi niwarqan: 2 “Runaq churin, Seír orqo-orqoman+ uyaykita kutiriy, pay contra rimay.+ 3 Khaynata niy: Tukuy munayniyoq Señor Jehová Diosmi nin: Yau Seír orqo-orqo, kaypin qan contra kashani. Makiytan qan contra jaywarimusaq, ch’in pampamanmi, ch’usaq pampamanmi tukuchisayki.+ 4 Llapa llaqtaykikunatan raqay-raqayman* tukuchisaq; mana piqpa kasqan ch’in pampan, purun pampan kapunki,+ chhaynapin yachanki noqa Jehová Dios kasqayta. 5 Nishutan Israelpa churinkunata cheqnikurqanki,+ mana allinpi tarikushaqtinmi, castigasqa kashaqtinmi espadantin phawaykurqanki,+ nispa.
6 ”Tukuy munayniyoq Señor Jehová Diosmi nin: Noqa wiñaypaq kausaq Diosmi niyki: Yawar jich’aypaqmi alistasayki, wañuymi qatikachasunki.+ Cheqnikurqankitaq yawarta chayqa yawarmi kunan qatikachasunki.+ 7 Seír orqo-orqotaqa ch’in pampamanmi, ch’usaqmanmi tukuchisaq,+ chayninta puriqtapas chinkachisaqmi. 8 Orqoykikunapin wañusqakuna askha wijch’u-wijch’u kanqa, moqo patakunapipas askhan espadawan wañusqakunaqa kanqa, wayq’okunapipas unuq purisqankunapipas askhan wijch’urayanqa. 9 Wiñaypaqmi ch’usaqman tukuchisqa kanki,+ llaqtaykikunapas ch’usaqmi, purunmi kapunqa. Chhaynapin qankunaqa yachankichis noqa Jehová Dios kasqayta, nispa.
10 ”Noqa Jehová Dios chaypi kashaqtiymi qanqa nirqanki: Kay iskaynin nacionkunaqa, kay suyukunapas noqaqmi kapunqa, noqan chaykunamanta dueñochakapusaq,+ nispa. 11 Chaymi noqa wiñaypaq kausaq Diosqa jurani: Imaynatachus ruwarqanki, imaynatachus paykunata cheqnikurqanki, chhaynatan qantapas ruwasayki;+ qanta juzgaspaymi paykunawan allinta reqsichikusaq, ninmi tukuy munayniyoq Señor Jehová Dios. 12 Chhaynapin yachanki noqa Jehová Dios llapa rimasqayki uyarisqayta. Israelpi orqokunamantan nirqanki: Wijch’usqan kashan, ch’inmi kashan, jaku jap’ikampusun, nispa. 13 Jatunchakuspan qankunaqa noqa contra rimarqankichis, noqatan qankunaqa k’amiwarqankichis.+ Noqaqa llapantan chaykunata uyarirqani.
14 ”Tukuy munayniyoq Señor Jehová Diosmi nillantaq: Llapa jallp’antinmi kusikunqa qanta ch’usaqman, purunman tukuchiqtiy. 15 Israelpa herencia chaskisqan ch’usaqman tukuqtinmi qanqa kusikurqanki. Chaymi noqapas kasqanta ruwasayki.+ Yau Seír orqo-orqo, llapa Edom suyu+ ch’usaqmanmi, purunmanmi tukuchisqa kanki. Chhaynapin yachanqaku noqa Jehová Dios kasqayta, nispa”.