Cornelio santo espirituta chaskin

Cesarea llaqtapin Cornelio tiyarqan, payqa Roma ejercitopin capitán karqan. Manaña judiochu karqan chaypas, judiokunan respetaqku. Payqa sumaq sonqon karqan yanaparqanmi wajchakunata, iñirqanmi Diospi, sapa kutillataq paymantaqa mañakuq. Juj p’unchaymi juj ángel payman rijurispa nirqan: “Diosmi uyarisunki. Runakunata kachay Jope llaqtaman Pedroq alojakusqan wasiman, valekuytaq jamunanpaq”, nispa. Kaqpachan Cornelioqa kinsa runata Jope llaqtaman kacharqan, chayqa uray ladopin tarikurqan 50 kilometropi jina.

Chaykaman Pedroqa Jope llaqtapi juj rijuriypi rikurqan judiokunapaq jark’asqa mijunata. Juj kunkataq kamachirqan mijunanpaq, paytaq mana munarqanchu, nirqanmi: “Manan jayk’aqpas qhelli animaltaqa mijurqanichu”, nispa. Jinan nimurqan: “Ama qhelli niychu Diospa ch’uyanchasqan animalkunataqa”, nispa. Nillarqantaqmi: “Kinsa runakunan punkuykipi kashanku, paykunawan riy”, nispa. Jinan runakunata tapurqan imapaqchus jamusqankuta. Paykunataq nirqanku: “Roma ejercitopi capitán Cornelion kachamuwanku, munanmi noqaykuwan Cesareaman rinaykita”, nispa. Pedrotaq chay runakunata chay tuta alojarqan. Tutamantanmi Cesareaman rirqanku Jopemanta wakin cristianokunawan ima.

Cornelioq wasinman Pedro jaykuqtinmi Cornelioqa qonqorikurqan. Pedron ichaqa nirqan: “Sayariy, noqaqa qan jina runallan kani. Judiokunaqa manaña jaykunkuchu mana judiokunaq wasinman chaypas, Diosmi kachamuwan wasiykiman. Chhaynaqa willaway imapaq wajachimuwasqaykita”, nispa.

Chaymi Cornelioqa nirqan: “Tawa p’unchay ñaupaqtan Diosmanta mañakusharqani, jinan juj ángel niwarqan qanta wajachimunaypaq. Chhaynaqa yachachiwayku”, nispa. Pedrotaq nirqan: “Kunanraqmi allinta entiendeni Diosqa lliutapas igual-llata rikusqanta”, nispa. Jinan Pedroqa Jesusmanta yachachirqan. Chay ratupitaq Corneliopas wasinpi kaq runakunapas santo espirituta chaskirqanku jinaspa bautizakurqanku.