“Gobiernoyki jamuchun”

Jehová Diosmi prometerqan: “Manan waqaypas, nanaypas, onqoykunapas, wañuypas kanqañachu. Runakunaq weqentan pichasaq. Ñaupaqpi pasasqantapas manan yuyarinqakuchu”, nispa.

Diosqa Edén huertapin Adantapas Evatapas churarqan kusisqa kausanankupaq. Diosllatan adorananku karqan, kay pachaman junt’anankupaqtaq wawayoq kananku karqan. Mana kasukuqña karqanku chaypas, Diosqa manan munasqantaqa cambiarqanchu. Diosqa junt’anmi promesankunata, chaytan kay libropi yacharqanchis. Gobiernonmi kay pachaman sumaq kausayta apamunqa, chhaynapitaq Abrahanman prometesqanta junt’anqa.

Pisi tiempomantan Satanaspas supayninkunapas, millay runakunapas chinkapunqaku. Llapallanchismi Diosta adorasunchis, manañan onqosunchu nitaq wañusunpaschu, aswanmi sapa tutamanta kallpayoq jatarisunchis. Jallp’antinmi paraisoman tukupunqa, sumaq mijunakunan kanqa, allin wasikunapitaq tiyasunpas. Llapa runakunan sumaq sonqo kapunqaku. Animalkunapas manan manchakuwasunchu, nitaq noqanchispas manchakusunchu.

Anchatachá kusikusun Jehová Dios wañupuqkunata kausarichiqtinqa. Sumaqtachá chaskisun ñaupa tiempopi Diosta serviq runakunatapas, wakinmi kanku Abel, Noé, Abrahán, Sara, Moisés, Rut, Ester, David ima. Paykunan yanapawasunchis jallp’anchista paraisoman tukuchinapaq. Imaymanatan ruwasunchis.

Jehová Diosqa munanmi qanpas paraisopi tiyanaykita. Chaypin aswantaraq Jehová Diosmanta yachasunchis. Chhaynaqa, ¡sapa p’unchay Jehová Diosta reqsishallasun!