Jesús waynacha kashaqtin

Mariawan Josewanqa Nazaret llaqtapin tiyarqanku. Chaypin Jesusta juj wawankunatapas uywarqanku. Joseqa carpinteriapin llank’arqan familianta uywananpaq, Diosmantapas yachachirqanmi. Sapa semanan sinagogata riqku Jehová Diosta adoraq, Jerusalentapas sapa watanmi viajaqku Pascua Fiestapaq.

Jesús 12 watanpi kashaqtinmi familianqa costumbrenkuman jina Jerusalenta Pascua Fiestapaq viajarqanku. Llaqtapiqa junt’an runakuna kasharqanku. Fiesta tukuytan Josepas Mariapas llaqtankuman kutimpusharqanku, paykunaqa nirqankun: “Jesusqa jujkunawanchá jamushan”, nispa. Maskhaspankun ichaqa mana tarirqankuchu.

Jinan Jerusalenman kutispanku kinsa p’unchay maskharqanku. Chay qhepamanmi templota rirqanku, jinaspa chaypi tarirqanku. Jesusqa yachachiqkunaq chaupinpi tiyaykuspan tukuy yuyaywan uyarishasqa tapushasqa ima. Yachachiqkunaqa anchatan admirakurqanku Jesuspa yachasqanwan, chaymi imaymanata tapurqanku. Paykunaqa repararqankun Diospa kamachikuyninkunata allinta entiendesqanta.

Josewan Mariawanqa sinchi llakisqan kasharqanku, chaymi Mariaqa nirqan: “¡Wawáy, tukuy ladopin maskhamurqaykiku! ¿Maypin kasharqanki?”, nispa. Jesustaq nirqan: “¿Manachu yacharqankichis Taytaypa wasinpi kanayta?”, nispa.

Jesusqa tayta-mamanwanmi Nazaret-ta kutipurqan. Joseqa yachachirqanmi Jesusman carpinteriapi llank’ayta. ¿Imaynan Jesús karqan waynallaraq kashaspa? Wiñasqanman jinan aswan yachayniyoq kapurqan, runakunapas Jehová Diospas allinpaqmi qhawarirqanku.