Jerusalenta thuninku

Judá nacionpi tiyaq runakunaqa sapa kutillanmi idolokunata adoraqku, jinan Jehová Diosqa profetakunata kacharqan llaqtanta yanapanankupaq. Paykunan ichaqa burlakurqanku manataq kasukurqankuchu, chaymi Diosqa decidirqan ídolo adoraqkunata chinkachiyta. ¿Imaynatan chayta ruwarqan?

Babilonia nacionmanta rey Nabucodonosormi askha nacionkunata jap’ikapusharqan. Chaymi Judá naciontapas jap’ikapurqan. Jinaspa rey Joaquinta, umalliqkunata, artesanokunata, allin soldadokunatapas Babiloniaman apapurqan. Templopi kaq qoritapas apapurqanmi, jinaspa Sedequiasta rey kananpaq churarqan.

Qallariypin Sedequiasqa Nabucodonosorta kasukurqan. Qhepamanmi ichaqa llulla profetakunapas waj runakunapas nirqanku ama kasukunanpaq. Jeremiasmi ichaqa nirqan: “Mana kasukuqtiykiqa, runakunan yarqaymanta onqoymanta wañunqaku”, nispa.

Pusaq wata qhepamanmi Sedequiasqa Nabucodonosorta mana kasukurqanchu. Chaymi Nabucodonosorqa ejercitonta kachamurqan Jerusalén llaqtata muyuykunankupaq. Jeremiasmi Sedequiasta nirqan: “Jehová Diosmi nin, sichus entregakunki chayqa, manan kay llaqtaqa thunisqachu kanqa, qantapas manan Babiloniaman apasunkikuchu”, nispa. Sedequiasmi ichaqa nirqan: “Manan entregakusaqchu”, nispa.

Wata kuskan qhepamanmi soldadokunaqa llaqtaq perqanta juj parteta thunirqanku. Chaynintan Jerusalenman jaykurqanku, jinaspa llaqtata templotapas kanaykurqanku, askha runakunatan wañuchirqanku, wakintataq Babiloniaman apapurqanku.

Sedequiasqa ayqekurqanmi, ichaqa Babiloniamanta soldadokunan Jericó llaqtataña ayqeshaqtin aypaspa Nabucodonosorman aparqanku. Jinan Nabucodonosorqa kamachirqan Sedequiaspa ñaupanpi wawankunata wañuchinankupaq, jinaspa ñawinkunata orqospa carcelman wisq’achirqan, chaypitaq wañupurqan. Diosmi ichaqa Judá nacionpi runakunata prometerqan: “70 watamantan llaqtaykichisman kutipunkichis”, nispa.

¿Iman pasarqan Babiloniaman apasqa waynakunawan? ¿Servishallarqankuchu Jehová Diosta?