INTERNETPI QELQANCHISKUNA Watchtower
Watchtower
INTERNETPI QELQANCHISKUNA
Quechua (Cusco)
  • BIBLIA
  • QELQAKUNA
  • JUÑUNAKUYKUNA
  • Allin amigokunata ajllakuy
    ¿Munawaqchu wiñaypaq kusisqa kausayta? Bibliata estudiasun
    • 48 yachachikuy. Amigokunantinmi fotota orqokushanku.

      48 YACHACHIKUY

      Allin amigokunata ajllakuy

      Allin amigokunaqa may kusikuytan apamusunki, paykunawanqa manan llakikuykunaqa ni reparakunpaschu. Ichaqa Bibliaq nisqanman jinaqa, manan llapachu allin amigokuna kanku. Chhaynaqa, ¿imaynatan ajllakuwaq allin amigokunata? Chaytan kunan yachasunchis.

      1. ¿Imaraykun nisunman “amigokunaqa apawasunmanmi allinmanpas mana allinmanpas” nispa?

      Arí, chhaynapunin chayqa. Pikunawanchus purinchis, pikunawanchus masta tiempota pasanchis paykunamanmi tiempowanqa rijch’akapunchis. Telefonontaña, internet chaupintaña paykunawan juñukusunman chaypas chayqa pasanpunin. Biblian nin: “Yachayniyoqkunawan puriqqa yachayniyoqmi kapunqa, mana yuyayniyoqkunawan [Jehová Diosta mana munakuqkunawan] juñukuqmi ichaqa mana allinpi tarikunqa”, nispa (Proverbios 13:20). Jehová Diosta munakuq amigokunaqa Diosllawan kanaykipaqmi yanapasunki, imatapas allinta ruwanaykipaqmi yanapasunki. Ichaqa Diosta mana serviq runakunawanchus nishuta purinki chayqa, Diosmantan karunchapusunkiku. Chaychá Bibliaqa yuyaychawanchis allin amigokunata maskhananchispaq. Diosta serviqkuna amigonchis kanqa chayqa allillanmi kasunchis. Chhaynapin Bibliapi “qankunapura sonqochanakushaychis kallpachanakushaychis” nispa nisqantapas junt’asunchis (1 Tesalonicenses 5:11).

      2. ¿Imayna amigokunayoq kanaykitan Jehová Dios munanman?

      Jehová Diosqa allin amigokunatan ajllakun. Payqa “chanin runakunawanmi sonqota tupachin” (Proverbios 3:32). ¿Imaninmanmi Jehová Dios payta mana munakuq runakunawan amigota ruwaqtiyki? ¡Maytan llakikunman! (Leey Santiago 4:4). Ichaqa payta munakuqkunawanchus amigota ruwasun, mana kasukuq runakunamantataq t’aqakusun chayqa, kusikunqan payqa. Chaymantapas amigonchismi payqa kapunqa (Salmos 15:1-4).

      ASTAWAN YACHASUNCHIS

      Kaypin yachasunchis imaraykus allinpuni allin amigokunata ajllakuy chayta, imatas ruwawaq amigoykikunawan sumaqta kausanaykipaq chaytapas.

      3. Diosta mana munakuqkunamanta cuidakuy

      Diosta mana munakuq runakunaqa manan reqsinkuchu Diosta, manataqmi kamachikuyninkunatapas kasukunkuchu. VIDEOTA qhawaychis, jinaspa jamuq tapuyman jina parlariychis:

      VIDEO: Amapuni mana allin runakunawanqa puriysikuychu (6:17)

      • ¿Imaynatan mana reparaylla mana allin runakunawan juñukushasunman?

      Leeychis 1 Corintios 15:33 textota, jinaspa jamuq tapuykunaman jina parlariychis:

      • Qhawarisqaykiman jina, ¿pikunan kanman mana allin amigokuna? ¿Imaraykutaq chhaynata ninki?

      Leeychis Salmos 119:63 textota, jinaspa jamuq tapuyman jina parlariychis:

      • ¿Imayna runakunatan maskhanayki amigoyki kananpaq?

      Askha manzana kashan. Juj malograsqa manzanamanmi ch’uspikuna junt’aykushan, chay manzanaqa ñan juj manzanakunatapas malograpushanña.

      Juj manzanallapas malograsqa kanman chayqa llapanmi malograkapunman. Qantarí, ¿manachu mana allin amigokuna mana allinman apasunkiman?

      4. Amigonchiskunaqa manan noqanchis jina runakunallachu kanan

      Bibliapin willashan Davidmanta Jonatanmantawan, paykunaqa Israel llaqtamantan karqanku. Paykunaqa manan wiñaypurachu karqanku, jujniray uywasqan karqankupas, chaywanpas allin amigontinmi karqanku. Leeychis 1 Samuel 18:1 textota, jinaspa jamuq tapuyman jina parlariychis:

      • ¿Imaraykun amigonchiskuna mana wiñaymasillanchischu nitaq imayna uywasqachus karqanchis chayman jinallapaschu kanan?

      Leeychis Romanos 1:11, 12 textota, jinaspa jamuq tapuyman jina parlariychis:

      • ¿Imaynatan Jehová Diosta munakuq amigokuna kausanku?

      ¿Imaynatan juj wayna mana piensaylla allin amigota tarirqan? VIDEOTA qhawaychis, jinaspa jamuq tapuykunaman jina parlariychis:

      VIDEO: Amigokunaqa manan wiñaymasillanchischu kanman (5:06)

      • ¿Imaraykun Akilpa taytanpas mamanpas llakisqa kasharqan?

      • ¿Imaraykun Akil chay amigokunata maskharqan?

      • ¿Imatan ruwarqan amaña sapan rikukunanpaq?

      5. ¿Imatan ruwawaq allin amigokunayoq kanaykipaq?

      Kaypin yachanki imaynatas allin amigokunata tariwaq, imaynatas qanpas allin amigo kawaq chaymanta. VIDEOTA qhawaychis.

      VIDEO: ¿Imaynan kanku allin amigokuna? (4:14)

      ‘‘¿Imaynan kanku allin amigokuna?’’ nisqa videomanta dibujo rikukushan. Juj sipasmi imaymana amigokuna chaupipi kashan.

      Leeychis Proverbios 18:24; 27:17 textokunata, jinaspa jamuq tapuykunaman jina parlariychis:

      • ¿Imaynatan allin amigokuna yanapanakunku?

      • ¿Proverbios libroq nisqanpi amigo jinachu amigoykikuna kanku? Mana chhayna kaqtinqa, ¿imatan ruwawaq allin amigokunata tarinaykipaq?

      Leeychis Filipenses 2:4 textota, jinaspa jamuq tapuyman jina parlariychis:

      • Allin amigokunayoq kanapaqqa, noqanchismi allin amigo kananchis. ¿Imatan ruwawaq allin amigo kanaykipaq?

      Juj sipas imaymana edadniyoq amigankunawan kashan: 1. Chay sipasmi telefononta jujnin amiganwan parlashan. 2. Diosta yupaychanapaq wasipin chay sipasqa jujninwanñataq parlashan, chay amiganqa paymanta kuraqñan. 3. Chay sipasllataqmi jujnin amiganta waqaysishan.

      Allin amigokunayoq kanapaqqa qanmi allin runa kanayki.

      WAKIN RUNAKUNAN NINKU: “Imapaqtaq reqsisqay runakunamanta t’aqakuyman, sapallay kanaymantaqa allillanmi paykunawan kashani”, nispa.

      • ¿Imaniwaqmi chaymanta?

      IMATAN YACHAMURQANCHIS

      Sichus allin amigokunata maskhasun chayqa kusisqan kasun, Jehová Diostapas kusichisunmi.

      Yuyarisun

      • ¿Imaraykun Jehová Dios munan allin amigokunayoq kananchista?

      • ¿Imayna amigokunamantan karunchakunanchis?

      • ¿Imatan ruwawaq Diosta munakuq runakunawan allin amigontin kanaykipaq?

      Kayta ruway

      ASTAWAN YACHANAYKIPAQ

      Kaypin yachanki imaynatachus allin amigokuna yanapawasunman llakipi tarikuqtinchis chayta.

      “Allin amigokunayoq kasun manaraq tukukuy p’unchay chayamushaqtin” (Qhawaq, 2019 watapi noviembre killa)

      Kaypin yachanki imakunatachus ruwawaq allin amigokunata tarinaykipaq chayta.

      “¿Imaynan allin amigokuna kanku?” (Wayna-sipaskunaq tapukuynin. Paykunapaq jina yanapaykuna, juj kaq libro, capítulo 8)

      ¿Imakunatan yachanayki internetpi reqsinakusqayki amigoykikunamanta? Chaytan yachanki kay videopi.

      Allin yuyaywan utilizay “redes sociales” nisqata (4:12)

      Kaypin yachanki imaraykuchus juj runa amigonkunata cambiarqan chayta.

      “Bibliaq yanapayninwan cambianku” (Qhawaq, 2012 watapi 1 abril)

  • Jehová Diospa munasqanman jinan ima kusirikuytapas ajllakuna
    ¿Munawaqchu wiñaypaq kusisqa kausayta? Bibliata estudiasun
    • 1. ¿Iman yanapawasunman allin kusirikuykunata ajllakunanchispaq?

      ¿Imakuna ruwaymi gustasunki? ¿Imakunawanmi kusirikunki? Wakinmanqa gustan librokuna leeymi, wakinmantaq takikuna uyariy, película qhaway, internetpi imaymana qhaway. Wakinmantaq gustan amigonkunawan pujllay, paseaq riy, naday, chaykuna jina juj ruwaykuna ima. Ima ruwayña gustawasunman, imaynataña kusirikusunman chaypas allintan reparananchis “ima ruwaykunachus Señorpa sonqonpaq jina chayta” (Efesios 5:10). ¿Imaraykun chayta allinta reparananchis? Wakin runakunaqa Jehová Diospa cheqnisqan ruwaykunawanmi kusirikunku, qhelli ruwaykunata, layqa ruwaykunata, sinchi maqanakuykunata iman qhawanku (leey Salmos 11:5). ¿Iman yanapawasunman allin yuyaywan imatapas ajllakunapaq?

      Jehová Diosta munakuq amigokunatan ajllakunanchis. Paykunan yanapawasunchis Jehová Diospa munasqanman jina kusirikuykunata ajllakunanchispaq. 48 yachachikuypi yachamusqanchis jina “yachayniyoqkunawan” purispaqa yachayniyoqmi noqanchispas kasun. “Mana yuyayniyoqkunawan” purispan ichaqa mana allinkunapi tarikusun (Proverbios 13:20).

Quechua (Cuzco) Qelqakuna (2001-2026)
Wisq'ay
Jaykuy
  • Quechua (Cusco)
  • Jujman apachiy
  • Imaynatan munanki
  • Copyright © 2025 Watch Tower Bible and Tract Society of Pennsylvania
  • Imatan ruwawaq imatan mana
  • Datoskunata waqaychasqaykumanta
  • Datoskuna imayna utilizakusqanmanta
  • JW.ORG
  • Jaykuy
Jujman apachiy