INTERNETPI QELQANCHISKUNA Watchtower
Watchtower
INTERNETPI QELQANCHISKUNA
Quechua (Cusco)
  • BIBLIA
  • QELQAKUNA
  • JUÑUNAKUYKUNA
  • mwbr24 Setiembre 1-13 paginakuna
  • Diospaq kausasunchis juñunakuypi astawan yachanapaq

Manan kaypaq video kanchu

Pampachaykuway, manan atikushanchu kay videota qhawanaykipaq.

  • Diospaq kausasunchis juñunakuypi astawan yachanapaq
  • Diospaq kausasunchis juñunakuypi astawan yachanapaq 2024
  • Subtitulokuna
  • 2-8 SETIEMBRE
  • 9-15 SETIEMBRE
  • 16-22 SETIEMBRE
  • 23-29 SETIEMBRE
  • “Qanllan kanki junt’aq Diosqa”
  • 30 SETIEMBRE-6 OCTUBRE
  • 7-13 OCTUBRE
  • “¡May jatunpunin Diospa [...] yachayninqa!”
  • 14-20 OCTUBRE
  • 21-27 OCTUBRE
  • “¡Allin yuyaywanpuni imatapas ruwaychis, allintapuni cuidakuychis!”
  • 28 OCTUBRE-3 NOVIEMBRE
Diospaq kausasunchis juñunakuypi astawan yachanapaq 2024
mwbr24 Setiembre 1-13 paginakuna

Diospaq kausasunchis juñunakuypi astawan yachanapaq

© 2024 Watch Tower Bible and Tract Society of Pennsylvania

2-8 SETIEMBRE

BIBLIAPI QORI JINA YACHACHIKUYKUNA SALMOS 79-81

Diospa jatun sutinta munakusqaykita rikuchiy

w17.02 10 párr. 5

Jesuspa sacrificakusqanqa ancha sumaq regalon

5 Noqanchisri, ¿imaynatan rikuchisunman Jehová Diospa sutinta respetasqanchista? Imayna kausasqanchiswanmi. Jehová Diosqa munanmi ch’uya kananchista (leey 1 Pedro 1:15, 16). Chaymi payllata jatunchananchis tukuy sonqowantaq kasukunanchis. Qatikachasqaña kasunman chaypas, Diospa kamachikusqanman jinan kausananchis. Payta kasukuspan sutinta jatunchasun (Mat. 5:14-16). Diospa kamachikuyninkunaman jina kausaspan rikuchinchis Satanás llulla kasqanta. Juchasapa runakuna kasqanchisraykun mayninpi pantanchis, chaywanpas sonqomanta pesapakuspan kallpachakunchis millay ruwaykunata saqenanchispaq. Chhaynapin Diospa sutinta ch’uyanchanchis (Sal. 79:9).

ijwbv-S 3 párrs. 4, 5

Romanos 10:13 “Diospa sutinta llapa wajakuqkunaqa”

Bibliapi Diospa sutinta wajakuy nispaqa nishan manan sutinta yachayllamantachu, nitaq payta adoraspa sutinmanta wajakuyllamantapaschu (Salmos 116:12-14). Aswanpas confiananchismi Diospiqa, chaymantapas paypa yanapaynintan mañakunanchis (Salmos 20:7; 99:6).

Jesuspaqqa Diospa sutinqa ancha importanten karqan, chaymi Yayayku mañakuyta yachachishaspapas khaynata qallarirqan: “Taytayku janaq pachapi kaq, sutiyki ch’uyapaq jap’isqa kachun”, nispa (Mateo 6:9). Chaymantapas wiñaypaq kausayta munaqkunaqa Jehová Diostan allinta reqsinanchis, kasukunanchis, munakunanchis ima. Chaytan Jesusqa yachachillarqantaq (Juan 17:3, 6, 26).

Maskhasun ancha allin yachachikuykunata

it-2-S 127 párrs. 5, 6

José

Josepa sutintan ancha allinpaq qhawarikun. Josemi Jacobpa llapa churinkunamanta aswan allinpaq qhawarisqa karqan, chaymi mayninpiqa llapa Israelpa ayllunkunata otaq wichay ladopi kaq ayllukunatapas Josepa sutinwan sutichakurqan (Sal. 78:67; 80:1; Amós 5:6, 15; 6:6). Josepa sutinqa rikukullantaqmi Bibliaq profeciankunapi. Ezequielpa juj rijuriy rikusqanpin Josepa herencianqa iskay kutiraq karqan (Ezeq. 47:13), “Jehová Diosmi chaypi kashan” nisqa sutiyoq llaqtaq jujnin kaq punkunmi Josepa sutinta apallantaq (Ezeq. 48:32, 35). Jehová Diospa llaqtan juñuykapuqtintaq Joseta rikuchin jujninkaq llaqtaq umallinta jina, Judatataq jujkaq llaqtaq umallinta jina (Ezeq. 37:15-26). Abdiaspa profecía willasqanpin nin Josepa wasin Esaupa wasinta thuninan kasqanta (Abd. 18), Zacariaspa profecía willasqanpitaq nin Jehová Dios Josepa mirayninta salvananta (Zac. 10:6). Israel espiritual ayllukunamanta rimaspataq Joseta churan Efrainpa ayllunpa rantinpi (Apo. 7:8).

Apocalipsis 7:8 textopi Josepa ayllunmanta rimasqanqa Israel espiritual nisqapin junt’akunan karqan, chay profeciatan Josepa taytan Jacob wañunan patapi kashaspa nirqan. Chhaynaqa Jacobpa Diosnin, atiyniyoq Jehová Diosmi Jesucristota qowarqanchis ancha allin michiqta jina, paymi “ovejankunarayku” vidanta qorqan (Juan 10:11-16). Cristo Jesusmi Diospa templonpi perqaq cimentacionninpi esquina jap’iq rumiqa (Efes. 2:20-22; 1 Ped. 2:4-6). Jesusmi “michiqpas” “esquina jap’iq rumipas”, payqa tukuy atiyniyoq Dioswanmi kashan (Juan 1:1-3; Hech. 7:56; Heb. 10:12; tupachiy Gén. 49:24, 25).

9-15 SETIEMBRE

BIBLIAPI QORI JINA YACHACHIKUYKUNA SALMOS 82-84

Jehová Diospaq llank’asqaykita ancha allinpaq qhawariy

wp16.6 8 párrs. 2, 3

¿Imatan yachasunman phalaq animalkunamanta?

Jerusalenpi tiyaqkunaqa reqsirankun golondrinakunata. Chay animalkunaqa wasi techokunaq alanpin q’esachakuqku otaq tapachakuqku. Salomonpa ruwasqan templopipas q’esachakuqkun, sapa watanchá paykunaqa chaypi tranquilo mana piqpa jark’asqan tiyaranku chiuchinkuta cuidaspa.

Corepa familianmanta 84 salmosta qelqaqmi rikuran phalaq animalkuna templopi q’esachakusqankuta. Payqa sapa soqta killamantan juj semana templopi serviq, chaymi golondrinakuna jina tukuy tiempo templopi tiyayta munaran. Niranmi: “¡Señor Diosníy, ima munaymi wasiykiqa! ¡Anchatapunin wasiyki patiopi kayta munaykushani! [...] Reyníy, Diosníy, pichitankapas altarniykikuna qayllapin tiyan, khallwapas [golondrinapas] chaypin chiuchinkunapaq q’esachan”, nispa (Salmos 84:1-3). Noqanchispas wawanchiskunapas, ¿chhaynachu sientekunchis? ¿Munanchischu mana faltayta Diospa llaqtanwan juñukuyta, valoranchischu chayta? (Salmos 26:8, 12).

w08-S 15/7 30 párrs. 3, 4

Imachus ruway atisqanchispi piensayqa kusichiwanchismi

Yaqapaschá edadniyoqña kasqaykirayku otaq mana qhali kasqaykirayku Jehová Diosta mana ñaupaqpi jinachu servishanki. Otaq juch’uy wawakunayoq kasqaykirayku sinchi sayk’usqa mana tiempoyoq ima tarikushanki, chayraykupaschá mana facilchu qanpaq kashan Bibliata estudiay juñunakuykunata tukuy yuyaywan uyariypas. Chhaynapi tarikuspaykin piensawaq manaña imatapas ruway atinaykipaq.

Chaymi pasarqan ñaupa Israel llaqtapi juj Leví runata. Diospa templonpi sapa wata iskay semanataña llank’arqan chaypas, payqa munarqan sapa p’unchay Diospa altarninpa ñaupanpi serviytan, may allinña chay munasqan karqan chaypas manan atikurqanchu (Sal. 84:1-3). ¿Iman yanaparqan chay Dios sonqo Leví runata ama llakiwan ñit’ichikunanpaq? Payqa entienderqanmi juj p’unchayllapas Diospa wasinpi kayqa ancha allinpuni kasqanta (Sal. 84:4, 5, 10). Pay jinan noqanchispas Diospaq llank’aytaraq atisqanchista valorananchis, manataqmi manaña ruway atisqanchiskunapichu piensananchis.

w20.01 17 párr. 12

Jehová Diosqa anchatan valorawanchis

12 Jehová Diosqa yachanmi onqosqa kashaqtinchis imayna tarikusqanchista. Chaymi paytan rogakunanchis ama onqoyninchispi nishuta piensananchispaq. Bibliapin tarinchis kallpachawananchispaq sumaq simikunata, chaytan leenanchis. Astawanqa leenanchis may tukuyta Jehová Dios munakuwasqanchismanta textokunatan. Chayta ruwaspan rikusun Jehová Dios llapa serviqninkunaman allinkuna qosqanta (Sal. 84:11).

Maskhasun ancha allin yachachikuykunata

it-1-S 1183 párrs. 1, 2

Mana taytayoq wawakuna

Ñaupa tiempopiqa faciltan mana taytayoq wawakunata qonqapuqku. Chaymi Jehová Diosqa Israel llaqta chaninchus icha mana chaninchus kasqankuta rikuchinanpaq “mana taytayoq wawakunata” cuidashankuchus icha manachus chaywan tupanachirqan. Israel llaqta Dioswan allinpi kaqtinkuqa yuyarikuqkun mana taytayoq wawakunamanta, ichaqa Dioswan mana allinpi kaspankuqa qonqapuqkun paykunata (Sal. 82:3; 94:6; Isa. 1:17, 23; Jer. 7:5-7; 22:3; Ezeq. 22:7; Zac 7:9-11; Mal. 3:5). Mana taytayoqkunata ñak’arichiqkunatan Jehová Diosqa ñakarqan (Deut. 27:19; Isa. 10:1, 2). Jehová Diosmi pay kikinta nikun mana taytayoqkunaq salvaqnin kasqanta (Prov. 23:10, 11), yanapaqnin kasqanta (Sal. 10:14), taytanku kasqanta (Sal. 68:5). Jehová Diosmi paykunaq favorninpi chaninta juzgan (Deut. 10:17, 18), khuyapayan (Os. 14:3), uywan (Sal. 146:9), qhawarinpas (Jer. 49:11).

Cheqaq cristianokunataqa reqsikun mana taytayoqkunata viudakunata yanapasqankupin. Jesuspa qatikuqnin Santiagon nirqan: “Taytanchis Diospa qhawarisqanman jinaqa, ch’uya mana ima qhelliyoq adorayqa ñak’ariypi tarikuq wajcha wawakunata viudakunatawan cuidaymi, kay pacha kausaywanpas mana qhellichakuymi”, nispa (Sant. 1:27).

16-22 SETIEMBRE

BIBLIAPI QORI JINA YACHACHIKUYKUNA SALMOS 85-87

Diosmanta mañakuyqa yanapawanchismi aguantananchispaq

w12 15/5 25 párr. 10

¿Rikuchishankichu Diospa qhapaq atiyninta?

10 Diospa qhapaq atiyninta rikuchinapaqqa, kay consejotan kasukunanchis: “Diosmantaqa mañakushallaychispuni” (Rom. 12:12). Arí, Diosmantan mañakunanchis munasqanman hina yupaychanapaq. Kaykunatan mañakusunman: santo espiritunta, allin iñiyta, tentacionkunata atipanapaq kallpata, ‘cheqaq-kay simita allinta yachachinapaqpas’ (2 Tim. 2:15; Mat. 6:13; Luc. 11:13; 17:5). Imaynan huk wawa papanpi confian, chay hinatan ñoqanchispas hanaq pacha Taytanchispi confiananchis. Aswantaraq payta servinapaq mañakuspaqa, manan iskayananchischu yanapawananchismanta. Nitaq yuyaykunachu sapa kuti mañakusqanchiswan phiñakunanta. Paymanqa tukuy confianzawanmi oracionpi asuykusunman hatunchanapaq, graciasta qonapaq, sasachakuyninchiskunapi yanapawananchispaqpas. Chaymantapas yanapaynintan rogakusunman servicionchiswan ch’uya ‘sutinta qhapaqchanapaq’ (Sal. 86:12; Sant. 1:5-7).

w23.05 13 párrs. 17, 18

¿Imaynatan Jehová Dios mañakusqanchisman kutichimun?

17 (Leey Salmos 86:6, 7). Rey Davidqa allintan yacharqan Jehová Dios mañakusqanman kutichimusqanta makilla uyarisqantapas. Noqanchispas chaymantaqa manan iskayananchischu. Kaypi yachamusqanchis jina Jehová Diosqa yachaytan qowanchis imatapas allinta ruwananchispaq, jinaspapas kallpatan qowasunchis ima sasachakuytapas aguantananchispaq. Chaymantapas Jehová Diosqa llaqtanpi iñiqmasinchiskunawanmi yanapachiwasunman otaq payta mana serviq runakunawanpas yanapachiwasunman.

18 Manaña Jehová Dios mañakusqanchista munasqanchisman jinachu kutichimunqa chaypas, payqa kutichimunqapunin mañakusqanchista. Jinaspapas necesitasqanchisman jinan tiempollanpi kutichimuwasun. Chhaynaqa, ama iskayaspa Jehová Diosmanta mañakushallasun, payqa imachus necesitasqanchistan kay tiempopi qowasun, jamuq tiempopitaq llapa munasqanchista qowasun (Sal. 145:16).

Maskhasun ancha allin yachachikuykunata

it-1-S 551 párr. 5

Sonqo

Tukuy sonqowan Diosta serviy. Cuerponchispi corazonninchis allinta llank’ananpaqqa tukuy iman junt’asqa kashanan. Sonqonchis ukhupi imayna runa kasqanchismi ichaqa iskayman t’aqasqa kanman. Chaychá Davidqa Jehová Diosta mañakurqan: “Sonqoyta jujllachay, chhaynapin sutiykita manchakusaq”, nispa. Chaymi rikuchiwanchis sonqonchis mayninpi t’aqasqa kananta (Sal. 86:11). Runaq sonqonqa iskayanmanmi chaymi mana ganaswanchu Diosta yupaychanman (Sal. 119:113; Apo. 3:16). Chaymantapas kallanmantaqmi iskay sonqoyoq runakuna jinaspa iskay patronta serviyta munankuman, otaq llullakuspa imatapas ninkuman manataq chayman jinachu ruwankuman (1 Crón. 12:33; Sal. 12:2, willakuy). Chhayna runakunatan Jesusqa anyarqan (Mat. 15:7, 8).

23-29 SETIEMBRE

BIBLIAPI QORI JINA YACHACHIKUYKUNA SALMOS 88, 89

Jehová Diosllan allin kamachikuqqa

w17.06 22 párr. 5

Jehová Diosllan gobiernaqqa kanan

5 Kanmi juj razonpas Jehová Dioslla gobernante kananpaqqa. Payqa chanin Diosmi, pay kikinmi nin: “Noqa Señor Diosmi kani khuyapayakuqqa, kay pachapi chaninchaqpas kuskachaqpas, chaytapunin noqaqa munani”, nispa (Jer. 9:24). Chaypi nisqan jina, Diosmi justicia ruwaqqa. Manan payqa runaq orqomusqan leytaraqchu qhawan justiciata ruwananpaqqa. Paypa ñanninkunaqa chaninpunin ch’uyapunin; chayman jinan runakunamanpas leyta qoran. Bibliapipunin Diosmantaqa nin: “Chaninchaspan allinta ruwaspan kamachishallankipuni”, nispa. Chhaynaqa Diospa ima ley orqomusqanpas, ima decisión ruwasqanpas chaninmi (Sal. 89:14; 119:128). Satanaspan ichaqa simillan waputa imatapas riman, manataq khaytukuy wata gobiernasqanpiqa thaj kausayta apamunchu.

w17.06 23 párrs. 10, 11

Jehová Diosllan gobiernaqqa kanan

10 Jehová Diosqa sumaq sonqon, gobiernasqan runakunapas kusisqan kanku, libretaqmi kankupas (2 Cor. 3:17). Chaymi Davidpas Diosmanta niran: “Lliflli-kaywan manchana atiywanmi muyuykun, wasintaqa atiywan kusikuywanmi junt’aykun”, nispa (1 Crón. 16:7, 27). Etanpas nillarantaqmi: “Señor Diosníy, kusisamiyoqmi fiestapi kusisqa yupaychamuqniyki llaqtaqa, kusisamiyoqmi k’anchayniykiq k’anchaykusqan puriqqa, qanwanmi kusikushallanpuni, chaninchayniykiwantaq q’ochukun”, nispa (Sal. 89:15, 16).

11 Jehová Dios munakuq kasqanpi allinta piensasun chayqa, astawanmi munasun paypa gobiernonpi kayta. Salmos librota qelqaq jinan nisunchis: “Aswan chaniyoqmi patioykikunapi juj p’unchay kashay jawapi waranqa p’unchay kashaymantaqa”, nispa (Sal. 84:10). Jehová Diosmi kamaqninchisqa, paymi yachan imas kusichiwasunman chayta, imaynapis sumaqta kausasunman chaytapas. Chaymi imataña kamachiwaqtinchispas kasukunanchis. Mayninpiqa manapaschá facilchu kanqa, chaywanpas kusisqa kausayta munanchis chayqa kasukunanchismi (leey Isaías 48:17).

w14 15/10 7 párr. 14

Diospa gobiernonpi iñisun

14 Chaymi karqan Davidwan Diospa rimanakusqan (leey 2 Samuel 7:12, 16). Jehová Diosmi Davidman prometerqan mesiasqa paypa mirayninmanta kananta (Luc. 1:30-33). Chay hinapin Jehová Diosqa astawan sut’incharqan piqpa familianmantas mesías hamunanta. Diosmi nirqan Davidpa mirayninmanta hamuqqa Diospa gobiernonpi kamachinanpaq derechoyoq kasqanta (Ezeq. 21:25-27). Chay hinapin Davidpa kamachikuyninqa ‘wiñaypaq takyanqa’. Davidpa mirayninqa wiñaypaqmi kamachikushallanqa ‘intiq k’anchashanankama’ (Sal. 89:34-37). Jesuspa kamachikuyninqa otaq Diospa gobiernonqa manan hayk’aqpas waqllipunqachu, ruwasqankunapas wiñaypaqmi kanqa.

Maskhasun ancha allin yachachikuykunata

cl-S 281 párrs. 4, 5

“Qanllan kanki junt’aq Diosqa”

4 Hebreo rimaypi junt’aq simiqa rimashan pipas munakusqanrayku pipaqpas allinkaqta ruwapusqanmantan, paymanmi k’askakun ladollanpitaqmi kashan. Chayqa manan yanqa k’askakuyllachu. Yaqapaschá wakinqa obligasqa kaspa juj runaq ladollanpi kanman manaña munashanmanchu chaypi kayta chaypas. Junt’aq sonqo kaymanta Bibliaq rimasqanmi ichaqa munakuymanta paqarin. Mana kausayniyoq kaqkunapas confianapaqmi kanku, chaytan killamantapas nishan Salmos 89:37 textopi, chaypi nisqan jinaqa killaqa sapa tutanmi mana p’itispa lloqsimun. Ichaqa killamantaqa manan nisunmanchu munakusqanrayku junt’aq kasqantaqa. Junt’aq kayqa munakuymantan paqarin, chaytaqa manan rikuchiyta atinkumanchu mana kausaqkunaqa.

5 Bibliapiqa junt’aq kaymantaqa rimashan sonqomantapuni juj runata munakuymantan. Chayqa manan juj ratullapaqchu. Aswanpas junt’aq kayqa otaq mana tukukuq munakuyqa imamantapas aswan jatunmi, imatapas atipanmi, manataqmi tukukuqllachu.

30 SETIEMBRE-6 OCTUBRE

BIBLIAPI QORI JINA YACHACHIKUYKUNA SALMOS 90, 91

Sichus wiñaypaq kausayta munayki chayqa, Jehová Diospin confianayki

wp19.3 5 párrs. 3-5

Unaypaq kausayta maskhaqkuna

Manan llapan cientificokunachu creenku mana machuyanapaq jampi kasqanpiqa. 1801 watakunamantaqa mejoraranmi runaq kausayninqa, ¿imaraykun pisillatapas mejoraran? Runaqa limpiezapi mejorasqanraykun, chaymantapas infección onqoykunapaq pastillakuna vacunakuna kasqanrayku iman. Wakin cientificokunaqa piensankun maykamachus runa kausan chaykamalla kausay kasqanta.

Biblia qelqaq Moisesmi 3.500 watakuna jina ñaupaqtaraq qelqaran: “Qanchis chunka watallan kausayku, kallpasapakunataq pusaq chunkakama chayayku, chaypas, chay watakunapiqa uma nanayllan, sasa kausayllan”, nispa (Salmos 90:10). Imaymanataña runakuna ruwanku chaypas manan aswan unaytaqa kausayta atinchischu, Moisés jinan noqanchispas nillanchistaq.

Wakin animalkunan ichaqa aswan unayta kausanku, ejemplopaq, lamar qochapi tiyaq Tiburonqa 200 más watakunatas kausan. Jatun secuoya nisqa sach’apas waranqa-waranqa watakunatas kausan. Vidanchista chaykunawan comparaspan tapukunchis: “¿Imaraykun kausanchis 70 otaq 80 watakunallata?”, nispa.

wp19.1 5, recuadro

¿Iman Diospa sutin?

¿Pin Diosta kamaran?

Askha runakunan chaytaqa tapukunku, qanpas tapukurankipaschá. Universopas tukuy chaypi kaqkunapas kamasqataq karanku chayqa, ¿pitaq Diostari kamaran?

Askha cientificokunan creenku universoqa qallariyniyoq kasqanta. Bibliapas qallariy versiculopin chaymanta riman, nin: “Qallariypin Diosqa janaq pachata kay pachatawan kamaran”, nispa (Génesis 1:1).

Sichus juj kamaq mana kanmanchu karan chayqa, manan universopas kanmanchu karan. Universoqa manan yanqallamantaqa rijurinmanchu karan. Universotaqa Jehová Diosmi kamaran, payqa nishu yachaysapan tukuy atiyniyoqtaq kanpas, paymi tukuyta kamaran (Juan 4:24).

Biblian Diosmanta nin: “Manaraq orqokunapas rijurimushaqtin, manaraq teqsimuyuntinpas kashaqtin, qanmi wiñaymanta wiñaykama Diosqa kanki”, nispa (Salmos 90:2). Chaymi ninchis: “Diosqa kallaranpunin”, nispa. Paymi qallariypi universotaqa kamaran (Apocalipsis 4:11).

w22.06 18 párrs. 16, 17

Jehová Diospa munakuwasqanchispi piensaymi yanapawasunchis ama manchapakunanchispaq

16 Runakunaqa munanchismi wiñaypaq kausayta, chayraykun imaymanata ruwanchis astawan kausananchispaq. Satanasmi ichaqa munan vidanchista salvananchisrayku Jehová Diosta saqerparinanchista, kamachikuyninkunatapas mana kasukunanchista (Job 2:4, 5). Satanasqa atiyniyoqmi runakunata wañuchinanpaq. Chaymi payqa munan wañuyta manchakunanchista (Heb. 2:14, 15). Chaymantapas Satanasqa runakunatan tanqan k’amiwananchispaq otaq mana allintapas ruwawananchispaq, chhaynapi Jehová Diosta amaña servinanchispaq. Chaymantapas Satanasqa munanmi sinchita onqospa Jehová Diospa kamachikuyninkunata mana kasukunanchista. Onqosqa kaqtinchisqa yaqapaschá familianchiskunapas doctorkunapas mat’ipayawasunman yawarwan jampichikunanchispaq, chhaynapi Jehová Diospa kamachikuyninkunata ama kasukunanchispaq.

17 Manan pipas wañuytaqa munanchischu, ichaqa wañusunmanña chaypas Jehová Diosqa munakuwashallasunpunin (leey Romanos 8:37-39). Jehová Diosqa yuyashallanmi wañupusqan amigonkunataqa, wañupurqankuña chaypas Jehová Diospaqqa kausashankumanpas jinan yuyayninpi kashanku (Luc. 20:37, 38). Jehová Diosqa anchatapunin munashan wañupuq amigonkunata jujmanta kausarichimpuyta (Job 14:15). Chayraykun Jehová Diosqa wawan Jesustapas kachamurqan noqanchisrayku wañunanpaq, chhaynapi wiñay kausayniyoq kananchispaq (Juan 3:16). Jehová Diosqa anchatan munakuwanchis, cuidawasuntaqmi kanpas. Runakunaña cheqnikuwasunman, wañuchiytaña munawasunman chaypas manan Jehová Diosmantaqa t’aqakunanchischu. Aswanpas allin yachayta kallpanta iman mañakunanchis payta kasukushanallanchispaq. Chaytan Valeria hermananchispas qosanpiwan ruwarqanku (Sal. 41:3).

Maskhasun ancha allin yachachikuykunata

wp17.5 5

¿Kanchu cuidaqninchis ángel?

Bibliaqa manan yachachinchu sapankanchispa cuidawaqninchis ángel kanantaqa. Jesusmi niran: “Amapunin kay juch’uykunamantaqa mayqentapas pisichankichischu, paykunata cuidaq angelkunaqa qhawashallankun janaq pachapi kaq Yayaypa uyanta”, nispa (Mateo 18:10). Ichaqa chaywanqa manan nishanchu sapankanchispa angelninchis kasqanta, aswanpas angelkuna llapan cristianokunapi anchata interesakusqankumantan rimasharan. Chaymi cheqaq cristianokunaqa mana angelkunaq pakaykunanta suyaspachu ima peligromanpas churakunku.

Chhaynaqa, ¿manachu angelkuna yanapawasunman? Manan chaymantachu rimashan (Salmos 91:11). Wakin runakunaqa seguron kashanku Dios angelninwan paykunata pakaykusqanmanta pusarisqanmanta ima. Qallariypi rimamusqanchis Kenneth jina. Manan sut’ita nisunmanchu “chhaynapunin” nispa, ichaqa cheqaqmi kanman. Mayninpin Jehová Diospa testigonkuna reparanku predicay llank’ayninkupi angelkunaq yanapayninta. Ichaqa angelkunaqa mana rikunataq kanku chayqa, manan yachanchischu maykama Dios angelninkunawan runakuna yanapasqanta. Jinaspapas, allillantan ruwashanchis sichus piensayninchisman jina Dios yanapawaranchis, jinaspa chaymanta agradecekunchis chayqa (Colosenses 3:15; Santiago 1:17, 18).

7-13 OCTUBRE

BIBLIAPI QORI JINA YACHACHIKUYKUNA SALMOS 92-95

¡Jehová Diosta serviymi imamantapas aswan allinqa!

w18.04 28 párr. 5

Wayna-sipas, ¿Dios serviypichu yuyayniyki kashan?

5 Juj kaq. Wayna-sipas, yachasqayki jina Diosqa imaymana formapin rikuchiwaranchis munakuwasqanchista chaymi paywan agradecido kananchis. Diosta serviq runan niran: “Ancha jatun Diosníy, ancha allinmi qanman graciasta qoyqa”, nispa. Chaymantan nillarantaq: “Diosníy, ruwasqaykikunawanmi kusirichiwanki, ruwasqaykikunamantan kusisqa takishani”, nispa (Sal. 92:1, 4). Chaypi nisqan jina imaymanatan Diosqa noqanchispaq ruwaran. Pay kaqtinmi kausanchis, paymi simintapas reqsichiwaranchis, llaqtanmanpas pusamuwaranchis; paymi kay millay kausaytapas munayman tukuchinqa. Chaymi payllata ñaupaqman churanayki chayta ruwanki chayqa allin amigontinmi paywan kanki.

w18.11 23 párr. 8

¿Piqpa piensasqanman jinan piensashanki?

8 Jehová Diospas munakuq tayta jinan munan allinta kausananchista (Is. 48:17, 18). Chaymi kamachikuyninkunata qowanchis imayna comportakunanchispaq, runamasinchista imayna tratananchispaqpas. Diosqa invitawanchismi pay jina piensananchispaq kamachikuyninkunaman jina kausananchispaqpas. Chayta ruwaspa, ¿tukuy ima ruwananchismantachu jark’awashanchis? Manan, aswanpas yanapawanchismi allinta piensaykuspa imatapas decidinanchispaq (Sal. 92:5; Prov. 2:1-5; Is. 55:9). Chaywanpas atinchisraqmi imachus gustawasqanchista ruwayta (Sal. 1:2, 3). Rikusqanchis jina Diospa piensasqanman jina piensayqa imaymanapin beneficiawanchis.

w20.01 19 párr. 18

Jehová Diosqa anchatan valorawanchis

18 Machuña kaqtinchispas Jehová Diosqa qowanchisraqmi llank’anata, manan chaymantaqa iskayananchischu (Sal. 92:12-15). Pisipaqña qhawarinchis Jehová Diospaq ruwasqanchista chaypas, Diosqa anchatan valoran, chaytan Jesusqa yachachiran (Luc. 21:2-4). Chay jinaqa imachus ruway atisqanchispin piensananchis. Jehová Diosmantan jujkunaman willasunman, hermanonchiskunapaq mañapusunman, jujkunatataq kallpachasunman junt’aq sonqowan Diosta servishanallankupaq. Diosqa llank’aqmasinta jina qhawariwanchis manan imaymanata ruwayta atisqanchisraykuchu aswanpas kasukuq kasqanchisraykun (1 Cor. 3:5-9).

Maskhasun ancha allin yachachikuykunata

cl-S 176 párr. 18

“¡May jatunpunin Diospa [...] yachayninqa!”

18 Apóstol Pablon Jehová Diospa yachayninmanta nirqan: “¡May jatunpunin Diospa qokuyninpas, yachayninpas, yuyayninpas! ¡Manapunin pipas llapantaqa yachanmanchu imachus piensasqantaqa, manataqmi pipas llapantaqa entiendenmanchu imachus ruwasqankunatapas!”, nispa (Romanos 11:33). Chay textopi “may” nisqanwanmi Pabloqa rikuchisharqan Diospa yachayninmanta admirasqa kashasqanta. Griego rimaypi “jatunpuni” nisqaqa “mana tukurikuq jatun t’oqowanmi” rijch’anachikun. Jehová Diospa yachayninpi yuyaymanayqa mana tukurikuq t’oqotapas qhawaykushasunman jinan. Maytaña kallpachakusunman Jehová Diospa yachayninta entiendenanchispaq chaypas manan llapantaqa atisunchu. Manataqmi Jehová Diospa tukuy yachasqankunataqa yachayta atisunchu (Salmos 92:5). ¡Noqanchisqa manan imapaschu kanchis paypa ladonpiqa!

14-20 OCTUBRE

BIBLIAPI QORI JINA YACHACHIKUYKUNA SALMOS 96-99

¡Allin willakuykunata willasun!

w11-S 1/3 6 párrs. 1, 2

¿Imataq allin willakuykunari?

Jesusta qatikuqkunaqa “Diospa gobiernonmantan allin willakuykunata” willananku, runakunamanmi yachachinanku Diospa gobiernon chanin kaywan jallp’ata kamachimunanmanta. Bibliapiqa kaykunamantan willallantaq: Dios “libraq kasqanmanta allin willakuykunamanta”, Diosmanta jamuq “allin willakuykunamanta” chaymantapas “Diospa Churin Jesucristomanta allin willakuykunamantawan” (Salmos 96:2; Romanos 15:16; Marcos 1:1). Chhaynaqa, ¿imataq allin willakuykunari?

Allin willakuykunaqa Jesuspa llapan yachachisqanmi, chaytan qatikuqninkuna qelqarqanku. Manaraq janaq pachaman ripushaspanmi Jesusqa qatikuqninkunaman kayta kamachirqan: “Llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. Qankunaman llapa kamachisqaykunata imaynatachus kasukunanku chayta paykunaman yachachimuychis”, nispa (Mateo 28:19, 20). Chhaynaqa, cheqaq cristianokunaqa Diospa gobiernonmantan runakunaman willananku, ichaqa manan chayllachu aswanpas Jesuspa mosoq discipulonkuna kanankupaqmi runakunata yanapananku.

w12 1/10 16 párr. 1

¿Imakunataq pasanqa Taripay P’unchaypiri?

Paña ladopi rikusqanchis dibujopi hinan askha runakuna yuyaykunku Taripay otaq Juicio P’unchay chhayna kananmanta. Millonninpi runakunas Diospa trononpa ñawpaqenpi kashanku imachus ruwasqankumanta juzgasqa kanankupaq. Chaypis huchachasqa kanqaku wakin hanaq pachaman rinankupaq wakintaq infiernoman rinankupaq. Biblian ichaqa mana chhaynatachu yachachin, aswanpas Diospa Taripay P’unchayninqa kay pachapi mana chanin ruwaykunata tukuchinanpaqmi (Salmo 96:13). Diosmi Jesusta Juezta hina churarqan llapa runakunapaq chanin kawsayta apamunanpaq. (Leey Isaías 11:1-5; Hechos 17:31.)

w12 15/9 12 párrs. 18, 19

Waranqa wata thak-kay, chaymantataq ¡wiñay-wiñaypaq!

18 Saqrata kasukuspa Diospa kamachikuynin contra kapuqtinkun runaqa manaña sumaqtachu Dioswan kawsarqan. Ichaqa, 1914 watamantapachan Cristoq kamachikuynin tukuyta ruwashan runakuna hukmanta sumaqta Dioswan kawsanankupaq (Efe. 1:9, 10). Waranqa Wata Kamachikuypin kunan tiempopi “mana rikukuq” kaqkuna hunt’akunqa. Chhaynapin “p’uchukay chayamunqa”, chayqa Waranqa Wata Cristoq Kamachikuynin tukupuyninmi. ¿Iman chay qhepaman kanqa? ‘Tukuy atiytaña hanaq pachapipas kay pachapipas’ Jesús chaskirqan chaypas manan Diospa qosqantaqa hap’ipakunqachu. Aswanpas chay atiyninqa kanqa ‘Dios Yayata hatunchananpaqmi’. Huch’uyaykukuspan “Dios Yayaman kamachikunan atiyta qopunqa” (Mat. 28:18; Fili. 2:9-11).

19 Chay kutipaqqa Diospa Gobiernonpi kawsaqkunan ch’uya kawsayniyoqña kashanqaku. Jesusta qatikuspan paykunapas huch’uyaykukuspa kusikuywan Diospa kamachikuyninta kasukunqaku. Ichaqa, allin kasukuq kasqankutan rikuchinanku kanqa huk hatun pruebapi (Apo. 20:7-10). Chaymantaqa llapa Dios contra kaqkunan runakunapas espíritu kaqkunapas wiñaypaq chinkachisqa kanqaku. ¡Ancha kusikunapaqmi chayqa! Huk familia hinallan serviqninkuna Diosta yupaychanqaku, chhaynapin ‘Diosqa llapa imaymanapi’ payllapuni munaychakunqa (leey Salmo 99:1-3).

Maskhasun ancha allin yachachikuykunata

it-1-S 412

Mosoq taki

“Mosoq taki” rimayqa manan Salmos qelqallapichu rijurin, aswanpas Isaías qelqapipas, apóstol Juanpa qelqasqanpipas rijurillantaqmi (Sal. 33:3; 40:3; 96:1; 98:1; 144:9; 149:1; Isa. 42:10; Apo. 5:9; 14:3). Chay textokunapi nisqanman jinaqa “mosoq takitaqa” takiqku Jehová Dios gobiernonrayku imatapas mosoqta ruwasqan qhepamanmi. Chaychá Salmos 96:10 textopipas nin: “Jehová Diosmi rey kapun”, nispa. Imatachá mosoqta ruwakun Jehová Dios jatunchasqa kananpaq, janaq pachapas kay pachapas allin kananpaq chaykunamantawanmi chay “mosoq takiqa” rimashan. (Sal. 96:11-13; 98:9; Isa. 42:10, 13).

21-27 OCTUBRE

BIBLIAPI QORI JINA YACHACHIKUYKUNA SALMOS 100-102

Jehová Diospa mana tukukuq munakuyninmanta agradecido kasqaykita rikuchiy

w23.03 12 párrs. 18, 19

¿Imakunatan ruwanayki bautizakunaykipaq?

18 Jehová Diosta munakuyqa ancha munaymi (leey Proverbios 3:3-6). Sichus Jehová Diosta tukuy sonqoykiwan munakunki chayqa atipallankin ima sasachakuytapas. Bibliapiqa askha kutitan willashan Jehová Diosqa mana tukukuq munakuyninta serviqninkunaman rikuchisqanta. Jehová Diosqa manan jayk’aqpas serviqninkunataqa saqerparinqachu. Imaña kaqtinpas munakushawallasunpunin (Sal. 100:5). Jehová Diosqa payman rijch’akuqtan runakunataqa kamarqan (Gén. 1:26). Chhaynaqa, ¿imaynatan noqanchispas chay mana tukukuq munakuyta rikuchisunman?

19 Chaypaqqa Jehová Diostan tukuy imamanta “gracias” ninanchis (1 Tes. 5:18). Sapa p’unchaymi kayta tapukunayki: “¿Imaynatan kay p’unchay Jehová Dios munakuyninta rikuchiwarqan?”, nispa. Chaymantataq Diosmanta mañakuspa llapa chaykunamanta “gracias” ninayki. Noqanchisrayku Diospa llapa ruwasqankunataqa, sapanka jujninchispaqpas kanman jinatan qhawarinanchis, chaytan apóstol Pablopas ruwarqan (leey Gálatas 2:20). Jinaspapas tapukunanchismi: “¿Noqapas munanichu Jehová Diosta munakusqayta rikuchiyta?”, nispa. Jehová Diosta munakuspaqa ima sasachakuytapas atipallasunmi, manataqmi faciltachu ima tentacionmanpas urmasun. Jehová Diosta munakuspaqa manan Biblia leeytapas, juñunakuyman riytapas, Diosmanta willaytapas saqesunchu. Chaykunata ruwaspan sapa p’unchay Jehová Dios munakusqanchista rikuchisun.

w23.02 17 párr. 10

“¡Allin yuyaywanpuni imatapas ruwaychis, allintapuni cuidakuychis!”

10 ¿Imakunamantan allinta cuidakunanchis? Cristianokunaqa manan pitapas pujllapayananchischu, manan machananchiskamaqa ujananchischu, manan k’araq simikunataqa rimananchischu, manan mana Diosta serviq runakunawanqa juñukunanchischu, manataqmi maqanakuymanta ni qhelli ruwaykunamanta videokunatapas qhawananchischu (Sal. 101:3). Satanasqa chay trampakunawanmi urmachiyta munawanchis Jehová Diosmanta t’aqakunanchispaq (1 Ped. 5:8). Chaykunamantachus mana cuidakusun chayqa, sonqonchispin mana allin yuyaykuna saphichakunman, jujkunamantan envidiakuyta qallarisunman, llullakuyta qallarisunman, jujkunaq kaqninkunatan munapayayta qallarisunman, jujkunata cheqnikuyta qallarisunman, jatunchakuqman sinchi phiñakuqman iman tukupusunman (Gál. 5:19-21). Yaqapaschá chaykunaqa qallariypi mana reparaylla kanman, ichaqa pisi-pisimantan sonqonchispi saphichakuyta qallarinman. Chaykunaqa venenoyoq planta jinan kanman, jinaspa mana allin ruwaykunaman apawasunman (Sant. 1:14, 15).

w11 15/7 16 párrs. 7, 8

¿Kasukusunchu Jehová Diospa willawasqanchista?

7 ¿Imaynatan llulla yachachiqkunamanta karunchakunchis? Manan napaykunchischu nitaqmi wasinchispi chaskinchischu. Manan hayk’aqpas leenchischu nitaq kutichinchischu Internetpi qelqamusqankuman nitaqmi uyarinchischu televisionpi propagandankutapas. ¿Imarayku chayta ruwanchis? ‘Hunt’aq [otaq mana llullakuq] Diosta’ munakusqanchisraykun. Ñoqanchisqa manan interesakunchischu Diospa cheqaq Siminta q’ewispa yachachisqankupi (Sal. 31:5; Juan 17:17). Hinaspapas Diospa llaqtantan munakunchis, chaypin yacharqanchis Diospa sutinta, chay sutin ima ninanta, kay Hallp’a imapaq kamasqa kasqanta, wañupuqkuna imaynapi tarikusqanta, kawsarimpunankumantawan. ¡Anchatachá kusikurqanchis chay cheqaq yachachikuykunata chayllaraq uyarishaspaqa! Chhaynaqa, ¿imapaqmi uyarisunman Diospa llaqtan contra rimaqkunata? Paykunata uyarisunman chayqa paykuna hinachá Diospa llaqtanpaq phiñakapusunman (Juan 6:66-69).

8 Imataña chay llulla yachachiqkuna rimanqaku chaypas, ñoqanchisqa manan uyarisunchu. Chay runakunaqa ch’aki p’uytu hinan kanku, manan paykunapi ima allinpas kanchu. Ñoqanchisqa manan Jehová Diosta saqesunchu nitaqmi llaqtanmanta karunchakusunchu, chay llaqtanpin Diosqa ñawpaqkunamantapacha Simin Qelqawan yachachiwashanchis (Isa. 55:1-3; Mat. 24:45-47).

Maskhasun ancha allin yachachikuykunata

it-2-S 629

Pelícano

Pelicanoqa sajsata mijusqan qhepamanmi ch’in ladoman phalan. Chaypin payqa llakisqa jina mana kuyurispa tiyaykun, karumanta qhawarisqaqa yuraq rumi jinallan rikukun. Unaymi pelicanoqa chhaynata tiyan. Chay pelícano jinan Salmosta qelqaq runapas tarikurqan, chaymi nirqan: “Ch’in ladopi pelícano jinan kashani”, nispa (Sal. 102:6). Kaypi “ch’in” lado nispaqa manan ch’aki aqo pampamantachu rimashan, aswanpas runakunaq mana tiyasqanku ch’in ladomantan rimashan, yaqapaschá chaypiqa kanman karqan t’uru-t’uru qochakuna. Jordán wayq’oq wichay ladonpi t’uru-t’uru qochakuna kasqanpin pelicanokunaqa mayninpi tiyanku. Israel ladopiqa kinsa clase pelicanokunan kan. Pelícano vulgarmi masqa kan (Pelecanus onocrotalus), pelícano ceñudo (Pelecanus crispus) pelícano africanopiwantaq (Pelecanus rufescens) pisilla kanku.

Pelicanokunaqa manan runakunaq kasqanpiqa kayta munankuchu. Pelicanoqa sapallanmi kayta munan chhaynapi q’esanta ruwakuspa chiuchinkunata uywananpaq, challwasqan qhepamanpas ch’in ladomanmi ripun. Bibliapi pelicanomanta rimaspaqa imapas ch’usaq kapunanmantan rimashan. Chaymi Isaías willarqan Edom llaqtapi pelícano tiyapunanta, chaywanmi rikuchisharqan chay llaqta ch’usaqyachisqa kapunanta (Isa. 34:11). Sofoniaspas willarqanmi Nínive llaqta thunisqa kaqtin urmasqa columnakunapi pelicanokuna puñunanta, chaywanmi rikuchisharqan chay llaqta ch’usaqyachisqa kapunanta, runakunapas manaña chaypi tiyanankuta (Sof. 2:13, 14).

28 OCTUBRE-3 NOVIEMBRE

BIBLIAPI QORI JINA YACHACHIKUYKUNA SALMOS 103, 104

“Yachanmi jallp’allamanta ruwasqa kasqanchista”

w23.07 21 párr. 5

Jehová Dios jina llamp’u sonqo kasun

5 Chaymantapas Jehová Diosqa juch’uyaykukuq khuyapayakuq iman. Juch’uyaykukuq kasqantan rikuchirqan Sodoma llaqtata thunipunan kashaqtin. Chay kutipin Jehová Diosqa angelninkunawan Lotman willachirqan orqo-orqo wichayman ripunankupaq, Lotmi ichaqa sinchita manchakurqan chay wichayman riyta. Chaymi Jehová Diosta rogakurqan Zóar llaqtaman ripunankupaq, chay llaqtaqa juj juch’uy llaqtachan karqan; chaytapas thunipuytan Diosqa munasharqan. Diosqa yaqapaschá kasuchikunmanpuni karqan Lotwan, ichaqa manan chaytachu ruwarqan. Aswanpas Lotpa imachus mañakusqanman jinan ruwarqan, manataqmi Zóar llaqtataqa thunirqanchu (Gén. 19:18-22). Khuyapayakuq kasqantan Jehová Diosqa rikuchirqan Nínive llaqta runakunawan imachus ruwasqanpi. Payqa chay runakunaq llaqtantan thunipuyta munasharqan, chay runakunaqa sinchi millaymi karqanku. Ichaqa ñaupaqtan profetan Jonasta kacharqan paykunaman chayta willamunanpaq, chay profetaq willasqanta uyarispan chay runakunaqa juchankumanta pesapakurqanku. Jinan Jehová Diosqa paykunata khuyapayarqan, manataqmi imanarqanpaschu (Jon. 3:1, 10; 4:10, 11).

w23.09 6, 7 párrs. 16-18

Sansón jina Jehová Diosman jap’ipakusun

16 Sansonqa imaymana llakipin tarikurqan mana allin ruwasqanmanta, chaywanpas kallpachakurqanmi Jehová Diospa munayninta ruwananpaq. Pay jinan noqanchispas kananchis. Imapiña pantarusunman chaypas, chayrayku ima ruwananchistaña saqenanchis kanman chaypas, anyasqa imaña kasunman chaypas, manan pisipananchischu, ñaupaqllamanmi purishananchis. Yachasqanchis jina, Jehová Diosqa manan pantasqanraykuchu pitapas mana valeqpaq jina qhawarin (Sal. 103:8-10). Imapiña pantarusunman chaypas, sichus Sansón jina Jehová Diospi jujmanta confiasun chayqa, imaymana ruwaymanmi payqa churawasun.

17 Michael sutiyoq hermanomanta yachasunchis. Payqa yanapakuq qhari, precursor regular imas kasqa, imaymanapis Diospaq llank’ashasqa. Chayllamansi juchaparukusqa, jinaspa Diospa llaqtanpi llapa ima ruwasqanta chinkachipusqa. Paymi nin: “Chay kutikamaqa tukuy kallpaywanmi Jehová Diosta servisharqani. Chaymantan ichaqa perqamanpas chocayman karqan jina tarikurqani. Noqaqa yacharqanin Jehová Dios yanapawananta, ichaqa manan yacharqanichu atiymanchus ñaupaq jina paypaq jujmanta llank’ayta icha manachus chayta”, nispa.

18 Michaelqa manan chaywanchu pisiparqan, aswanmi kallpachakushallarqan. Paymi nin: “Tukuy atisqaytan kallpachakurqani astawan Jehová Diosman asuykunaypaq. Chaypaqmi ichaqa sapa kutilla Jehová Diosmanta mañakuq kani, chaymantapas estudiaqmi kani, chaypitaq yuyaymanaq kani”, nispa. Tiempowanqa jujmantan Michaelqa Diospa llaqtanpi imachus ruwanankunata chaskikapurqan. Kunanqa payqa umalliq, precursor regular iman kashan. Paymi nillantaq: “Noqataqa umalliqkunan allinta yanapawarqanku kallpachawarqanku ima. Chaypin sut’ita rikurqani imaynas Jehová Diosqa munakushawallarqan chayta, chhaynapin jujmanta ch’uya concienciawan payta servipurqani. Imachus pasawasqanpin sut’ita yachani: Jehová Diosqa pitapas sonqomanta arrepientekuqtaqa perdonanpunin”, nispa. Noqanchispas Michael jinan tukuy sonqo Jehová Diospi confiananchis. Imapiña pantasunman chaypas, sichus chaykunata allichapunanchispaq kallpachakusun chayqa, Jehová Diosqa imaymana bendiciontan qowasun, llaqtanpipas imaymana ruwaymanmi churawasun (Sal. 86:5; Prov. 28:13).

w23.05 26 párr. 2

Diosta astawan servinaykipaq imachus ruway munasqaykimanqa aypallawaqmi

2 Sichus Jehová Diosta astawan servinaykipaq imachus ruway munasqaykita mana aypayta atishankichu chayqa, ama pisipaychu. Imata ruwananchispaqpas necesitakunpunin kallpa tiempo ima. Kunankama mana pisipasqaykiwanmi rikuchishanki Jehová Dios munakusqaykita tukuy atisqaykita paypaq ruway munasqaykitapas. Jehová Diosqa rikushanmi chayta, manataqmi mana atinaykitaqa imatapas mañasunkimanchu (Sal. 103:14; Miq. 6:8). Chhaynaqa, imachus ruway munasqaykiqa atinaykipaq jinallan kanan. Atinaykipaq jinalla kashan chayqa, ¿iman yanapasunkiman chaykunata ruwanaykipaq? Wakinmanta yachasun.

Maskhasun ancha allin yachachikuykunata

cl-S 55 párr. 18

Jehová Diosqa atiyninwanmi janaq pachatapas kay pachatapas kamarqan

18 Jehová Diosqa atiyninwanmi tukuy imatapas kamarqan, ¿imatan chaymanta yachasunman? Jehová Diosqa imaymanatan kamarqan, chayqa may admirakunapaqmi. Chaychá Salmos librota qelqaqpas nirqan: “¡Diosníy Jehová, mana yupay atiyraqmi kamasqaykikunaqa! [...] kay pachaqa kamasqaykiwanmi junt’a kashan”, nispa (Salmos 104:24). Bibliaq chay nisqanqa cheqaqpunin. Animalkunata estudiaq runakunaq nisqanman jinaqa kay pachapiqa juj millón más animalkunas kashan, ichaqa masraqsi kashanman. Runakunaqa manan Jehová Dios jinaqa imaymanata ruwayta atisunmanchu. Jehová Diospa yachayninqa mana tukukuqmi. Atiyninpas mana tukukuqmi, chaymi payqa imaymanata ruwayta atin.

    Quechua (Cuzco) Qelqakuna (2001-2026)
    Wisq'ay
    Jaykuy
    • Quechua (Cusco)
    • Jujman apachiy
    • Imaynatan munanki
    • Copyright © 2025 Watch Tower Bible and Tract Society of Pennsylvania
    • Imatan ruwawaq imatan mana
    • Datoskunata waqaychasqaykumanta
    • Datoskuna imayna utilizakusqanmanta
    • JW.ORG
    • Jaykuy
    Jujman apachiy