“Allin willakuykunata [...] llapa suyukunaman, ayllukunaman, tukuy t’aqa rimaqkunaman, llaqtakunamanwan” apanaykupaqmi 750 más simikunapi qelqakunata ruwayku (Apocalipsis 14:6). ¿Imaynatan chay hatunkaray llank’ayta apariyku? Chayta ruwakunanpaqqa askha nacionkunamanta qelqa ruwaqkunan kan, hinallataq huk t’aqa traductorkuna, llapankutaqmi Jehová Diospa testigonkuna kanku.

Inglés simipin ñawpaqtaqa ruwakun. Umalliq T’aqan qhawarin oficina central nisqapi Yachachikuykuna Qelqaymanta Encargakuqkunaq ruwasqanta. Chay Encargakuqkunan oficina central nisqapi huk sucursalkunapipas qelqa ruwaypi llank’aykunata qhawarin. Chaypi askha nacionkunamanta llank’aqkuna kasqanraykun Hallp’antinpi kaq imaymana costumbreyoq runakunapaq hina qelqakunata ruwayku, chaytaqmi runakunaq sonqonman chayan.

Qelqakunata huk simiman t’ikranankupaq apachinku. Qelqakuna ruwayta tukuruspaqa computadorapin llapa nacionkunapi kaq qelqa t’ikraqkunaman apachinku. Paykunan chay qelqata huk simiman t’ikranku, chaytataq allinta qhawarinku ama imapas pantasqa kananpaq. Qelqakunata t’ikraqkunaqa ‘allin cheqaq simikunatan’ maskhanku, inglés simimanta rimasqanku simiman iman kaqllata t’ikranankupaq (Eclesiastés 12:10).

Computadoraq yanapayninwan usqhaylla ruwakun. Computadoraqa manan runakunaq ruwasqanta ruwayta atinmanchu. Ichaqa chaypin kan diccionariokuna, t’aqwirinapaq qelqakuna, huk yanapaykunapas. Testigokunan ruwayku Sistema Electrónico de Edición Plurilingüe (MEPS, inglespi pisiyachisqa simi) nisqata. Chaymi yanapawanku pachak-pachak simikunapi fotokunayoq dibujokunayoq qelqakunata ruwanaykupaq.

¿Imaraykun chaykunata ruwayku wakin simikunata pisillaña rimanku chaypas? Jehová Dios “llapan runakuna qespichisqa kanankuta, cheqaq-kayta reqsinankutapas” munasqanraykun (1 Timoteo 2:3, 4).

• ¿Imaynatan ruwakun Bibliamanta qelqakuna?

• ¿Imaraykun qelqakunata askha simikunaman t’ikrayku?

Jehová Diospa testigonkunaqa sapa watanmi waranqa-waranqanpi Bibliakunata huk qelqakunatawan askhanpi ruwaspa mana qolqellapaq rakiyku. Sucursalkunata Huñunakuna Wasikunatawan hatarichispan cuidayku mosoqllata hap’inaykupaq. Hinaspapas waranqanpi betelitakunaq, misionerokunaq gastonkupaqmi qoyku, iñiqmasikuna sinchi ñak’ariypi tarikuqtinkutaq yanapayta apachiyku. ¿Ima qolqewanmi tukuy chay gastokunata ruwayku?

Manan cuotakunata diezmotapas mañaykuchu, nitaq yanapaytachu mañakuyku. Askha qolqetaña gastayku predicacionta aparinaykupaq chaypas, manan runakunaq qolqentachu mañakuyku. Pachak wata ñawpaqtaraqmi Qhawaq revista willarqan Jehová Diospa yanapayninpi confiasqaykumanta, nirqantaq: “[Religionniykuqa] manan hayk’aqpas mañapakuspachu purinqa, nitaq runakunaq yanapaynintachu maskhanqa”, nispa. Chhaynapunitaqmi karqan (Mateo 10:8).

Sonqomanta churasqanku qolqewanmi pagakun. Askha runakunan Bibliamanta yachachisqaykuta allinpaq qhawarispa, donacionta qosqankuwan yanapawanku gastokunata ruwanaykupaq. Kikin Testigokunan tiempoykuta, kallpaykuta, ima kaqniykutapas qospa yanapayku Diospa munaynin Hallp’antinpi aparikunanpaq (1 Crónicas 29:9). Huñunakunayku Wasikunapi, hatun huñunakuykuna ruwasqayku localkunapi iman kan cajachakuna, chaypin munaqkuna donacionninkuta churankuman otaq jw.org direccionman haykuspa. Chay donacionkunataqa pisi qolqeyoq runakunan astawanqa churanku. Paykunaqa wakcha viuda hinan kanku, paymantan Jesús allinta rimarqan iskay qolqecha churasqanrayku (Lucas 21:1-4). Munaqqa ‘imaynatachus sonqonpi yuyaykusqanman hinan’ qolqenta t’aqaspa donacionta churaykunman (1 Corintios 16:2; 2 Corintios 9:7).

Jehová Diosqa pay hatunchayta munaqkunaq sonqontan kuyurichishallanqa kaqninkuwan yanapakunankupaq, chhaynapi Gobiernonmanta llank’ay aparikunanpaq munaynin hunt’akunanpaqpas (Proverbios 3:9).

• ¿Imaynapin religionniyku mana kaqllachu huk religionkunawan?

• ¿Imakunatan ruwakun donacionkuna chaskisqaykuwan?

Huñunakunayku wasikunapiqa Diospa Gobiernonmantan yachayku. Jesuspas chay Gobiernomantan astawanqa willarqan (Lucas 8:1).

Chay wasikunapin Diosta yupaychayku. Chay wasikunapin qhawarikun imaynata allin willakuykuna aparikunanta (Mateo 24:14). Wakin wasikunaqa hatunmi wakintaq huch’uylla, sapanka wasipas hukniraymi ichaqa huñukunapaq hinallan ruwasqa kashan. Wakinpiqa askha iñiq t’aqakunan huñukunku. Kay qhepa watakunapin waranqanpi wasikunata ruwarqayku, huk p’unchaypi phisqata hina, yapakuq iñiq t’aqakuna chaypi huñukunanpaq. ¿Imaynatan chay llank’ayta apariyku? (Mateo 19:26.)

Donacionkuna churakusqanwan hatarichikun. Donacionkuna churakusqan qolqetan apachikun tiyasqanku nacionpi sucursalman. Chay qolqewanmi huk Huñunakuna Wasikunata hatarichinku otaq allichanku.

Kikin Testigokunan mana qolqellapaq llank’anku. Askha nacionkunapin kan Grupos de Construcción de Salones del Reino. Chay cristianokunan tiyasqanku nacionpi huk-huk llaqtakunata rinku, mayninqa sinchi karukunata, Huñunakuna Wasi hatarichiypi umallinankupaq yachachinankupaq ima. Wakin nacionkunapin allin experienciayoq testigokunata akllakurqan Huñunakuna Wasikunata hatarichiypi otaq allichaypi yanapakunankupaq. Chay wasikunataqa chay llaqtamanta iñiqkunan hatarichinku, pisillaña wasi hatarichiypi experienciayoq kanku chaypas. Jehová Diospa espiritunpa yanapayninwan, llaqtanpi iñiqkuna kallpachakusqanwan iman chayqa aparikun (Salmo 127:1; Colosenses 3:23).

• ¿Imaynatan Huñunakuna Wasikunata Hallp’antinpi hatarichiyku?